১. ভূতসুত্তৱণ্ণনা

৩১. অজিতমাণৱেনাতি সোড়সসু বাৱৰিযব্ৰাহ্মণপৰিচাৰকেসু ‘‘অজিতো’’তি লদ্ধনামেন মাণৱেন. সঙ্খা ৱুচ্চতি পঞ্ঞা, সঙ্খাতা পৰিঞ্ঞাতা ধম্মা যেসং তে সঙ্খাতধম্মা, পটিৱিদ্ধসচ্চা খীণাসৱা. সেক্খা পন ৱিপাকস্স অপৰিঞ্ঞাতত্তা ‘‘সঙ্খাতধম্মা’’তি ন ৱুচ্চন্তি. সেক্খধম্মসমন্নাগমেন তে সেক্খা. তে পন কামং পুগ্গলপটিলাভৱসেন অনেকসহস্সাৱ হোন্তি, চতুমগ্গহেট্ঠিমফলত্তযস্স পন ৱসেন তংসমঙ্গিতাসামঞ্ঞেন ন সত্তজনতো উদ্ধন্তি আহ ‘‘সত্ত জনে’’তি নিযমেত্ৱা ৱিসেসেতি. সংকিলেসৱজ্জং, ততো ৱা অত্তানং ৱিয ৱিনেয্যলোকং নিপাতি ৰক্খতীতি নিপকো, তস্স ভাৱো নেপক্কং, ঞাণন্তি আহ ‘‘নেপক্কং ৱুচ্চতি পঞ্ঞা, তায সমন্নাগতত্তা নিপকো’’তি.

‘‘কো নু খো ইমস্স পঞ্হস্স অত্থো’’তি চিন্তেন্তো পঞ্হায কঙ্খতি নাম. ‘‘কথং ব্যাকৰমানো নু খো সত্থু অজ্ঝাসযং ন ৱিৰোধেমী’’তি চিন্তেন্তো অজ্ঝাসযং কঙ্খতি নাম. সুজাননীযত্থপৰিচ্ছেদং কত্ৱা চিন্তনা হেত্থ ‘‘কঙ্খা’’তি অধিপ্পেতা, ন ৱিচিকিচ্ছাতি. পহীনৱিচিকিচ্ছো হি মহাথেৰো আযস্মতো অস্সজিমহাথেৰস্স সন্তিকেযেৱ, ৱিচিননভূতং কুক্কুচ্চসদিসং পনেতং ৱীমংসনমত্তন্তি দট্ঠব্বং. পত্তং আদায চৰন্তোতি পব্বজিতভাৱলক্খণং. ধম্মসেনাপতিভাৱেন ৱা মম পত্তধম্মদেসনাৱাৰং আদায চৰন্তোতি এৱং ৱা এত্থ অত্থো দট্ঠব্বো.

জাতন্তি যথাৰহং পচ্চযতো উপ্পন্নং, সঙ্খতন্তি অত্থো. পঞ্হব্যাকৰণং উপট্ঠাসীতি পঞ্হস্স ব্যাকৰণতা পটিভাসি. ‘‘সম্মপ্পঞ্ঞায পস্সতী’’তি পাঠো, অট্ঠকথাযং পন ‘‘সম্মপ্পঞ্ঞায পস্সতো’’তি পদং উদ্ধৰিত্ৱা ‘‘পস্সন্তস্সা’’তি অত্থো ৱুত্তো. তং ‘‘ভূতন্তি…পে… পটিপন্নো হোতী’’তি ইমায পাড়িযা ন সমেতি, তস্মা যথাদস্সিতপাঠো এৱ যুত্তো. যাৱ অৰহত্তমগ্গা নিব্বিদাদীনং অত্থাযাতি সমিতাপেক্খধম্মৱসা পদং ৱদন্তি. আহাৰসম্ভৱন্তি পচ্চযহেতুকং. সেক্খপটিপদা কথিতা ‘‘নিব্বিদায ৱিৰাগায নিৰোধায পটিপন্নো হোতী’’তি ৱচনতো. এস নযো নিৰোধৱাৰেপি. নিব্বিদাতি কৰণে পচ্চত্তৱচনং, ৱিৰাগা নিৰোধাতি কৰণে নিস্সক্কৱচনন্তি আহ ‘‘সব্বানি কাৰণৱচনানী’’তি. অনুপাদাতি অনুপাদায. ভূতমিদন্তিআদিমাহ সব্বসুত্তং আহচ্চভাসিতং জিনৱচনমেৱ কৰোন্তো.

ভূতসুত্তৱণ্ণনা নিট্ঠিতা.