খন্ধকপুচ্ছাৱাৰো

পুচ্ছাৱিস্সজ্জনাৱণ্ণনা

৩২০. উপসম্পদক্খন্ধকন্তি মহাখন্ধকং. ‘‘নিদানেন চ নিদ্দেসেন চ সদ্ধি’’ন্তি ইমিনা সহ নিদানেনাতি সনিদানং, সহ নিদ্দেসেনাতি সনিদ্দেসন্তি ৱচনত্থং দস্সেতি. এত্থ নিদানেনাতি সিক্খাপদপঞ্ঞত্তিদেসসঙ্খাতেন নিদানেন. নিদ্দেসেনাতি পুগ্গলাদিনিদ্দেসেন. তত্থাতি উপসম্পদক্খন্ধকে. সমুক্কট্ঠপদানন্তি এত্থ সমুক্কট্ঠসদ্দো উত্তমপৰিযাযোতি আহ ‘‘উত্তমানী’’তি. পদানীতি ‘‘ন ভিক্খৱে ঊনৱীসতিৱস্সো পুগ্গলো উপসম্পাদেতব্বো’’তি (পাচি. ৪০২-৪০৩; মহাৱ. ১২৪) আদিনা নযেন ৱুত্তানি পদানি. ইমেহি পদেহি ‘‘সমুক্কট্ঠানি পদানি সমুক্কট্ঠপদানী’’তি ৱচনত্থং দস্সেতি. ইতীতি অযমত্থো. কস্মা পনেত্থ ‘‘সমুক্কট্ঠপদানং কতি আপত্তিযো’’তি পদানমেৱ সামিৱসেন নিদ্দেসো কতো, ননু আপত্তিযো নাম পুগ্গলানঞ্ঞেৱ হোন্তীতি আহ ‘‘যেন যেন হী’’তিআদি. হীতি যস্মা. যেন যেন পদেন পঞ্ঞত্তাতি সম্বন্ধো. সা সাতি আপত্তি. দ্ৱে আপত্তিযোতি এত্থ দ্ৱিন্নং আপত্তীনং সৰূপং দস্সেন্তো আহ ‘‘পাচিত্তিযং, দুক্কট’’ন্তি.

নস্সন্তেতেতি নস্সন্তু এতে. ৱিনস্সন্তেতেতি ৱিনস্সন্তু এতে ভিক্খূতি অত্থো. তেহীতি ভিক্খূহি. ৱদতোতি ৱদন্তানং. সেসেসু উপোসথকৰণেসূতি সম্বন্ধো. ‘‘দুক্কটাপত্তিযেৱা’’তি ইমিনা একা আপত্তীতি এত্থ অত্থপকৰণাদিৱসেন দুক্কটাপত্তিযেৱাতি দস্সেতি.

পৱাৰণক্খন্ধকেপীতি পিসদ্দো উপোসথক্খন্ধকং অপেক্খতি.

চম্মসংযুত্তেপীতি চম্মেন সংযুত্তং কত্ৱা দেসিতে খন্ধকেপি, চম্মক্খন্ধকেপীতি অত্থো. পিসদ্দো পৱাৰণক্খন্ধকং অপেক্খতি. ভেসজ্জক্খন্ধকেপীতি পিসদ্দো চম্মক্খন্ধকং অপেক্খতি. সমন্তাতি অঙ্গজাতস্স সমন্ততো.

তত্থাতি কথিনক্খন্ধকে. চীৱৰসংযুত্তেতি চীৱৰক্খন্ধকে.

চম্পেয্যকেতি চম্পেয্যক্খন্ধকে. সমুচ্চযক্খন্ধকেসুপীতি পিসদ্দো চম্পেয্যক্খন্ধকং অপেক্খতি.

সমথক্খন্ধকে ইমা দ্ৱে আপত্তিযো হোন্তীতি যোজনা. এসেৱ নযো সেসেসুপি. খুদ্দকৱত্থুকেতি খুদ্দকৱত্থুক্খন্ধকে. গৰুভণ্ডৱিস্সজ্জনেতি গৰুভণ্ডস্স ৱিস্সজ্জনে.

সঙ্ঘভেদেতি সঙ্ঘভেদক্খন্ধকে. ‘‘সমাচাৰং পুচ্ছিস্সন্তি ৱুত্তে ৱত্তক্খন্ধকে’’তি ইমিনা সমাচাৰসদ্দেন ৱত্তক্খন্ধকং গহেতব্বন্তি দস্সেতি. সাতি দুক্কটাপত্তি. ‘‘তথা’’তি পদেন ‘‘একা দুক্কটাপত্তিযেৱা’’তি পদং অতিদিসতি. ‘‘পাতিমোক্খট্ঠপনে’’তি ইমিনা পাড়িযং ঠপনং পুচ্ছিস্সন্তি এত্থ ‘‘পাতিমোক্খ’’ন্তিআদিপদস্স লোপং দস্সেতি. পঞ্চসতিকসত্তসতিকেসূতি পঞ্চসতিকক্খন্ধকসত্তসতিকক্খন্ধকেসু. আৰোপিতোতি এত্থ ৰুপধাতুযা দ্ৱিকম্মিকত্তা, ন্যাদিগণত্তা চ ‘‘ধম্মো’’তি পধানকম্মমেৱ ৱুত্তং, ন ‘‘সঙ্গহ’’ন্তি অপধানকম্মং. তেন ৱুত্তং ‘‘ধম্মো সঙ্গহ’’ন্তি. তত্থাতি পঞ্চসতিকসত্তসতিকেসু.

ইতি খন্ধকপুচ্ছাৱণ্ণনায যোজনা সমত্তা.