(১) অৱিপ্পৱাসপঞ্হাৱণ্ণনা

৪৭৯. সেদমোচিকগাথাসূতি অধিপ্পাযত্থস্স গম্ভীৰত্তা তং চিন্তেন্তানং ৱিনযধৰানং কাযে সেদং মোচেতীতি সেদমোচিকা, সাযেৱ গাথা সেদমোচিকগাথা, তাসু. ‘‘অকপ্পিযসম্ভোগো ন লব্ভতী’’তি ইমিনা কপ্পিযসম্ভোগো লব্ভতীতি দস্সেতি. কপ্পিযসম্ভোগং দস্সেতুং ‘‘নহাপনভোজনাদী’’তি ৱুত্তং. অনাপত্তীতি মাতুভিক্খুনিযা অনাপত্তি. এসা পঞ্হাতি এত্থ পঞ্হসদ্দো সভাৱতিলিঙ্গোতি সদ্দসত্থেসু (সদ্দনীতিধাতুমালাযং ১৬ হকাৰন্তধাতু; অভিধানপ্পদীপিকাযং ১১৫ গাথাযং) ৱুত্তো, ইধ ইত্থিলিঙ্গৱসেন ৱুত্তো. ‘‘পণ্ডিতেহী’’তি ইমিনা কুসলস্স কাৰণং দস্সেতি, পণ্ডিতত্তা কুসলোতি অধিপ্পাযো. অস্সাতি পঞ্হায. এতন্তি ৱিস্সজ্জনং. অস্সাতি গাথায.

একাদস ৱিৱজ্জিযাতি অৱিভত্তিকনিদ্দেসো, একাদস ৱিৱজ্জিযেতি অত্থো. তেন ৱুত্তং ‘‘যে’’তিআদি. তেপীতি পিসদ্দো গাথাযং লুত্তনিদ্দিট্ঠগম্যমানভাৱং দস্সেতি.

অযন্তি ন্হাপিতপুব্বকো ভিক্খু. নিম্মিতবুদ্ধন্তি বুদ্ধেন নিম্মিতং বুদ্ধৰূপং.

ৱিৱজ্জিযাতি এত্থ যকাৰো ত্ৱাপচ্চযস্স কাৰিযোতি আহ ‘‘ৱিৱজ্জেত্ৱা’’তি. অসীসকং যং তং কবন্ধং অত্থীতি যোজনা. অসীসকত্তা কেন সৰীৰেন জীৱিতং বন্ধতীতি কবন্ধো. যস্সাতি কবন্ধস্স.

হীতি সচ্চং. তেতি অভব্বপুগ্গলা.

ৱাচাতি এত্থ যকাৰলোপোতি আহ ‘‘ৱাচাযা’’তি. ইতি মেতি এৱং মম. এৱং ৱদমানে মম ৱচনন্তি যোজনা. অথৱা ইতিমেতি এৱং ইমে, এৱং ৱদমানে ইমে জনাতি যোজনা. সদ্দম্পীতি ইমিনা গিৰসদ্দো সদ্দপৰিযাযোতি দস্সেতি. হীতি সচ্চং. তুণ্হীভূতস্স নিসিন্নস্স তস্স ভিক্খুনোতি যোজনা. যদি মনোদ্ৱাৰে আপত্তি নাম নত্থি, এৱং সতি কস্মা আপজ্জেয্য ৱাচসিকন্তি ৱুত্তন্তি আহ ‘‘যস্মা পনা’’তিআদি. তেনাতি তস্মা. অস্সাতি ভিক্খুস্স.

সাতি ভিক্খুনী, আপজ্জতীতি সম্বন্ধো. ৱুত্তপ্পকাৰন্তি ‘‘গামন্তৰপৰিযাপন্ন’’ন্তি ৱুত্তপ্পকাৰং.

তাসূতি দ্ৱীসু ভিক্খুনীসু.

চতুৰো জনাতি এত্থ চতুন্নং জনানং সৰূপং দস্সেন্তো আহ ‘‘আচৰিযো চ তযো চ অন্তেৱাসিকা’’তি. সাহত্থিকাতি সহত্থা অৱহৰিতা. আণত্তিযাপীতি আণত্তেন অৱহৰিতাপি. ইতৰেসন্তি অন্তেৱাসিকানং, একেকো মাসকোতি সম্বন্ধো. এত্থাতি পৰিৱাৰে সেদমোচিকগাথাযং.