মহাসঙ্গামং

ৱোহৰন্তেন জানিতব্বাদিৱণ্ণনা

৩৬৮-৭৪. মহাসঙ্গামে এতেনেৱ নযেন ৱেদিতব্বন্তি সম্বন্ধো. ৱত্থুসঙ্কমনাকাৰং দস্সেত্ৱা অৱজাননপটিজাননাকাৰং দস্সেন্তো আহ ‘‘যো পনা’’তিআদি. যো পন ৱদতীতি সম্বন্ধো. এসেৱাতি এসো এৱ, অৱজাননপটিজাননভিক্খূতি অত্থো.

৩৭৫. নীলাদিৱণ্ণাৱণ্ণৱসেনাতি নীলাদিৱণ্ণৱসেন চ আৰোগ্যত্থাদিঅৱণ্ণৱসেন চ. সঞ্চৰিত্তং যস্মা অনেন সিক্খাপদেন ধনং অনুপদীযতি, তস্মা ধনমনুপ্পদানন্তি ৱুচ্চতি. পুব্বপযোগোতি পুব্বে পযুজ্জিতব্বো.

অগতিঅগন্তব্বৱণ্ণনা

৩৭৯. বহুজনঅহিতায পটিপন্নো হোতীতি পাড়িং ৱিত্থাৰেন্তো আহ ‘‘ৱিনযধৰেন হী’’তিআদি. তত্থ ৱিনযধৰেনাতি অনুৱিজ্জকেন, ৱিনিচ্ছিতেতি সম্বন্ধো. ওৱাদূপজীৱিনিযোতি ভিক্খূনং ওৱাদং উপনিস্সায জীৱিনিযো. উপাসকাপীতি ৰতনত্তযং পটিস্সৰণন্তি উপাসকাপি. দাযকাপীতি ভিক্খূনং পচ্চযদাযকাপি. তেসন্তি উপাসকাদীনং. তথেৱাতি যথা উপাসকাদযো দ্ৱিধা ভিজ্জন্তি, তথেৱ. ততোতি আৰক্খদেৱতাহি পৰন্তি সম্বন্ধো. তেনাতি দ্ৱিধাকাৰণেন.

৩৮২. গহননিস্সিতোতি এত্থ গহনসদ্দো দিট্ঠিপৰিযাযোতি আহ ‘‘মিচ্ছাদিট্ঠিঅন্তগ্গাহিকদিট্ঠিসঙ্খাতং গহন’’ন্তি.

৩৯৩. তস্স অৱজানন্তোতি এত্থ ‘‘তস্সা’’তি পদং ‘‘ৱচন’’ন্তি পাঠসেসেন সম্বন্ধিতব্বন্তি আহ ‘‘তস্স ৱচন’’ন্তি. তস্সাতি নৱকস্স. তন্তি নৱকং.

৩৯৪. ‘‘যংঅত্থাযা’’তি এসো সদ্দো সমাসোতি আহ ‘‘যদত্থাযা’’তি. ‘‘তং অত্থ’’ন্তি এসো সদ্দো লিঙ্গৱিপল্লাসোতি আহ ‘‘সো অত্থো’’তি. অত্থসদ্দো হি পুল্লিঙ্গো, পাড়িযং ন পৰিহাপেতব্বন্তি এত্থাপি লিঙ্গৱিপল্লাসো ৱেদিতব্বো. সব্বত্থাতি সব্বস্মিং মহাসঙ্গামে.

ইতি মহাসঙ্গামৱণ্ণনায যোজনা সমত্তা.