চোদনাকণ্ডং

অনুৱিজ্জককিচ্চৱণ্ণনা

৩৬০-১. ইদানি আৰদ্ধন্তি সম্বন্ধো. একো ভিক্খু একেন মাতুগামেনাতি যোজনা. সোতি পস্সন্তো ভিক্খু. তন্তি নিক্খমন্তং পৱিসন্তং ৱা ভিক্খুং. ইতৰোতি চুদিতকো. তস্সাতি চোদকস্স. ন উপেতীতি ন উপগচ্ছতি. ন পটিজানাতীতি ন পটিস্সৱং কৰোতি. এত্থাতি মাতুগামেন নিক্খমন্তপৱিসন্তট্ঠানে. যন্তি কম্মং. তেনাতি চোদকেন. তস্সাতি চোদকস্স ৱচনেনাতি সম্বন্ধো. ইতৰোতি চুদিতকো. অসুদ্ধপৰিসঙ্কিতোতি অসুদ্ধায অট্ঠানে উপ্পন্নায পৰিসঙ্কায পৰিসঙ্কিতো. তদত্থং দস্সেতি ‘‘অমূলকপৰিসঙ্কিতো’’তি ইমিনা. তস্স পুগ্গলস্সাতি চুদিতকস্স পটিঞ্ঞাযাতি সম্বন্ধো. সব্বত্থাতি সব্বেসু অনুৱিজ্জককিচ্চেসু.

ইতি অনুৱিজ্জককিচ্চৱণ্ণনায যোজনা সমত্তা.

চোদকপুচ্ছাৱিস্সজ্জনা

৩৬২-৩. সচ্চে চ অকুপ্পে চাতি পধানং সম্বন্ধট্ঠানং দস্সেন্তো আহ ‘‘পতিট্ঠাতব্ব’’ন্তি. ‘‘য’’ন্তিআদিনা সচ্চে পতিট্ঠাতব্বভাৱং দস্সেতি. যন্তি কম্মং. ‘‘ন চা’’তিআদিনা অকুপ্পে পতিট্ঠাতব্বভাৱং দস্সেতি. ওতিণ্ণঞ্চাতি ৱিনিচ্ছযং ওতিণ্ণঞ্চ. ‘‘ৱচন’’ন্তি ইমিনা ওতিণ্ণানোতিণ্ণসৰূপং দস্সেতি. তত্ৰাতি পুৰিমৱচনাপেক্খং. ‘‘ওতিণ্ণানোতিণ্ণং জানিতব্ব’’ন্তি ৱচনেতি হি অত্থো. চোদকস্স পমাণন্তি ‘‘ধম্মো’’তি ৱা ‘‘অধম্মো’’তি ৱা ‘‘বালো’’তি ৱা ‘‘পণ্ডিতো’’তি ৱা চোদকস্স পমাণং. চুদিতকস্স পমাণন্তি ধম্মচুদিতকো নু খো, নোতি চুদিতকস্স পমাণং. অনুৱিজ্জকস্স পমাণন্তি সক্কা নু খো ৱিনিচ্ছিতুং, নোতি অনুৱিজ্জকস্স পমাণং. অনুৱিজ্জকো ৱত্তব্বোতি সম্বন্ধো. যেন ধম্মেনাতিআদীসু ধম্মাদীনং সৰূপং দস্সেন্তো আহ ‘‘ধম্মোতি ভূতং ৱত্থূ’’তিআদি. এতেন ধম্মেন চ এতেন ৱিনযেন চ এতেন সত্থুসাসনেন চাতি যোজনা. তস্মা অনুৱিজ্জকেন ৱূপসমেতব্বন্তি সম্বন্ধো. এত্থাতি অনুৱিজ্জকস্স পটিপজ্জিতব্বট্ঠানে.

অৱঞ্ঞন্তি অৱজাননং. ইমেতি থেৰা. ‘‘খতত্তা’’তি ইমিনা অত্তনাৱ অত্তা খঞ্ঞতীতি খতোতি ৱচনত্থং দস্সেতি. উপহনিযন্তীতি উপহতানি, উপহতানি ইন্দ্ৰিযানি অনেনাতি উপহতিন্দ্ৰিযো. ‘‘পঞ্ঞায অভাৱতো’’তি ইমিনা দুম্মেধোতি এত্থ দুসদ্দো অভাৱত্থো, মেধাসদ্দো পঞ্ঞাপৰিযাযোতি দস্সেতি. নত্থি মেধা এতস্সাতি দুম্মেধোতি নিব্বচনং কাতব্বং. খতো…পে… দুম্মেধো সো অনুৱিজ্জকো উপগচ্ছতীতি যোজনা. তস্মাতি যস্মা উপগচ্ছতি, তস্মা ৱুত্তন্তি সম্বন্ধো. তস্সাতি পাঠস্স, গাথায ৱা. ৱিত্থাৰং দস্সেন্তো আহ ‘‘চুদিতকচোদকেসু হী’’তিআদি. উভোপেতেতি উভোপি এতে আমিসপুগ্গলনিস্সযে. ধম্মোতি সাসনধম্মো. ইতীতি অযমত্থো.

উপকণ্ণকং জপ্পতীতি এত্থ কণ্ণস্স সমীপং উপকণ্ণং, তদেৱ উপকণ্ণকন্তি দস্সেন্তো আহ ‘‘এৱং কথেহী’’তিআদি. ‘‘কণ্ণমূলে’’তি ইমিনা উপকণ্ণকন্তি এত্থ উপসদ্দস্স সমীপত্থং দস্সেতি. মন্তেতীতি কথেতি. ইমিনা জপ্পধাতুযা কথনত্থং দস্সেতি. জিম্হং পেক্খতীতি এত্থ জিম্হসদ্দো কুটিলৱাচকো, কুটিলং নাম অত্থতো ইধ দোসোতি আহ ‘‘দোসমেৱা’’তি.

কথানুসন্ধীতি চুদিতকঅনুৱিজ্জকানং কথায অনুসন্ধি. ৱিনিচ্ছযানুসন্ধীতি অনুৱিজ্জকেন কতস্স আপত্তানাপত্তিৱিনিচ্ছযস্স অনুসন্ধি. সব্বত্থাতি চোদনাকণ্ডে.

ইতি চোদনাকণ্ডৱণ্ণনায যোজনা সমত্তা.