১২. সত্তসতিকক্খন্ধকং
দসৱত্থুকথা
৪৪৭. সত্তসতিকক্খন্ধকে ৱড্ঢেন্তি কটসিন্তি এত্থ কটসীসদ্দো সুসানভূমিৱাচকোতি দস্সেন্তো আহ ‘‘পুনপ্পুনং কড়েৱৰং নিক্খিপমানা ভূমিং ৱড্ঢেন্তী’’তি. তত্থ কড়েৱৰন্তি দেহং. তঞ্হি কড়ে অঙ্গপচ্চঙ্গানং অৱযৱে সম্পিণ্ডেত্ৱা ৱৰিযতি ইচ্ছিযতীতি কড়েৱৰন্তি ৱুচ্চতি. এৱং ঘোৰং কটসিং ৱড্ঢেন্তাৱ পুনব্ভৱং আদিযন্তীতি যোজনা.
৪৫৪. পাপকং নো আৱুসো কতন্তি এত্থ নোসদ্দো অম্হসদ্দকাৰিযো, ছট্ঠীকত্তা চ হোতীতি দস্সেন্তো আহ ‘‘আৱুসো অম্হেহি পাপকং কত’’ন্তি.
৪৫৫. ‘‘পিযৱচন’’ন্তি ইমিনা কতমেন ত্ৱং ভূমি-ৱিহাৰেনাতি এত্থ ভূমিসদ্দো পিযৱাচকো ৰুড়্হীসদ্দোতি দস্সেতি. ‘‘আমন্তেতী’’তি ইমিনা আলপনপদন্তি দস্সেতি. আৱুসো ভূমীতি অত্থো. কুল্লৱিহাৰো নাম মেত্তাৱিহাৰো, সো চ হেট্ঠিমঝানত্তযে যুত্তত্তা উত্তানৱিহাৰোতি আহ ‘‘উত্তানৱিহাৰেনা’’তি.
৪৫৭. সাৱত্থিযাতি সাৱত্থিনগৰে. সুত্তৱিভঙ্গেতি পদভাজনীযে. পটিক্খিত্তভাৱং ৱিত্থাৰেন্তো আহ ‘‘তত্ৰ হী’’তিআদি. তত্ৰাতি সুত্তৱিভঙ্গে, পটিক্খিত্তং হোতীতি সম্বন্ধো. তত্ৰাতি ‘‘সন্নিধিকাৰকে অসন্নিধিকাৰকসঞ্ঞী’’তিআদিৱচনে. একে আচৰিযা এৱং মঞ্ঞন্তীতি যোজনা. কিন্তি মঞ্ঞন্তীতি আহ ‘‘যো পন ভিক্খূ’’তিআদি. অলোণকং যম্পি আমিসন্তি যোজনা. তেনাতি পুৰেপৰিগ্গহিতলোণেন. তন্তি আমিসং. তদহুপটিগ্গহিতমেৱাতি তস্মিং অহনি পটিগ্গহিতমেৱ. তস্মাতি যস্মা তদহুপটিগ্গহিতমেৱ, তস্মা. ৱদতোতি ৱদন্তস্স, ভগৱতো ৱচনেনাতি সম্বন্ধো. এত্থাতি অলোণকামিসপৰিভুঞ্জনে, দুক্কটেন ভৱিতব্বং ইতি মঞ্ঞন্তীতি যোজনা. তেতি একে আচৰিযা. দুক্কটেনপীতি পিসদ্দেন পগেৱ পাচিত্তিযেনাতি দস্সেতি. হীতি সচ্চং, যস্মা ৱা. এত্থাতি যাৱজীৱিকযাৱকালিকেসু. যাৱজীৱিকং ন তদহুপটিগ্গহিতং, যাৱকালিকমেৱ তদহুপটিগ্গহিতন্তি যোজনা. তদহুপটিগ্গহিতঞ্চ যাৱকালিকন্তি সম্বন্ধো. তং দুক্কটং তুম্হে যদি মঞ্ঞথাতি যোজনা. যাৱজীৱিকমিস্সন্তি লোণসঙ্খাতেন যাৱজীৱিকেন সংসট্ঠং. ব্যঞ্জনমত্তন্তি ৱিকালে ন কপ্পতীতি ব্যঞ্জনমত্তং.
এত্থাতি ‘‘যাৱকালিকেন ভিক্খৱে’’তিআদিৱচনে (মহাৱ. ৩০৫) তদহুপটিগ্গহিতং যাৱজীৱিকন্তি যোজনা. যাৱকালিকস্স গতি ৱিয গতি এতস্সাতি যাৱকালিকগতিকং. তস্মা দুক্কটং ন হোতীতি সম্বন্ধো. এত্থাতি পুৰেপটিগ্গহিতলোণেন আমিসপৰিভুঞ্জনে. তদহুপটিগ্গহিতং যাৱকালিকেন সম্ভিন্নৰসং যাৱজীৱিকন্তি যোজনা. তন্তি যথাৱুত্তং যাৱজীৱিকং, ৱিকালভোজনপাচিত্তিযা এৱ কাৰণং হোতীতি যোজনা. এৱন্তি তথা, অজ্জ পটিগ্গহিতম্পি যাৱজীৱিকন্তি সম্বন্ধো. অপৰজ্জু পটিগ্গহিতেন যাৱকালিকেনাতি যোজনা. তন্তি যাৱজীৱিকেন সম্মিস্সং যাৱকালিকং, অজানন্তোপীতি সম্বন্ধো. ইদন্তি যথাৱুত্তং যাৱকালিকং. ততোতি সন্নিধিভোজনপাচিত্তিযতো. হীতি সচ্চং. ‘‘সাৱত্থিযা সুত্তৱিভঙ্গে’’তি ইদং ব্যাকৰণং পৰিসুদ্ধন্তি যোজনা.
‘‘ৰাজগহে উপোসথসংযুত্তে’’তি ইদং ৱচনং ৱুত্তন্তি সম্বন্ধো. উপোসথসংযুত্তেতি উপোসথেন সম্বন্ধে উপোসথক্খন্ধকে. কিং সন্ধায ৱুত্তন্তি আহ ‘‘ন ভিক্খৱে…পে… দুক্কটস্সাতি (মহাৱ. ১৪১) এতং সন্ধাযা’’তি. অতিসাৰেতি অতিক্কমিত্ৱা সৰণে গমনে পৱত্তনেতি অত্থো. নিমিত্তত্থে চেতং ভুম্মং. ‘‘চম্পেয্যকে ৱিনযৱত্থুস্মি’’ন্তি ইদং ৱুত্তন্তি সম্বন্ধো. ‘‘চম্পেয্যক্খন্ধকে আগত’’ন্তি ইমিনা চম্পেয্যে আগতং চম্পেয্যকন্তি ৱচনত্থং দস্সেতি.
ধম্মিকন্তি ভূতেন পৱত্তং. সুত্তৱিভঙ্গে হি যস্মা আগতন্তি সম্বন্ধো. দসাযেৱাতি দসাযমেৱ, আধাৰে চেতং ভুম্মং. ৱিদত্থিমত্তাতি ৱিদত্থিপমাণা. দসায ৱিনাতি দসং ৱজ্জেত্ৱা. তং পমাণন্তি ৱিদত্থিত্তযসঙ্খাতং তং পমাণং কৰোন্তস্স ৱুত্তপাচিত্তিযং আপজ্জতীতি সম্বন্ধো. ‘‘তং অতিক্কামযতো ছেদনকং পাচিত্তিয’’ন্তি (পাচি. ৫৩৩) ইদং ৱচনং আগতমেৱ হোতীতি যোজনা. সব্বত্থাতি সব্বস্মিং সত্তসতিকক্খন্ধকে.
ইতি সমন্তপাসাদিকায ৱিনযসংৱণ্ণনায
সত্তসতিকক্খন্ধকৱণ্ণনায
যোজনা সমত্তা.
দ্ৱিৱগ্গসঙ্গহাতি মহাৱগ্গচূড়ৱগ্গৱসেন দ্ৱীহি ৱগ্গেহি সঙ্গহিতা. দ্ৱাৱীসতিপভেদনাতি মহাৱগ্গে দস, চূড়ৱগ্গে দ্ৱাদসাতি এৱং দ্ৱাৱীসতিপকাৰা. পঞ্চক্খন্ধদুক্খপ্পহাযিনোতি পঞ্চক্খন্ধসঙ্খাতং দুক্খং পজহনসীলস্স, ভগৱতোতি সম্বন্ধো. আসাপীতি ইচ্ছাপি. অযং পনেত্থ যোজনা-পঞ্চক্খন্ধদুক্খপ্পহাযিনো ভগৱতো সাসনে দ্ৱিৱগ্গসঙ্গহা দ্ৱাৱীসতিপভেদনা যে খন্ধকা ভগৱতা ৱুত্তা, তেসং খন্ধকানং এসা ৱণ্ণনা অন্তৰাযং ৱিনা যথা সিদ্ধা, এৱং তথা পাণীনং কল্যাণা আসাপি সিজ্ঝন্তূতি.
ইতি সমন্তপাসাদিকায ৱিনযসংৱণ্ণনায
চূড়ৱগ্গসংৱণ্ণনায
যোজনা সমত্তা.
জাদিলঞ্ছিতনামেন, নেকানং ৱাচিতো মযা;
চূড়ৱগ্গখন্ধকস্স, সমত্তো যোজনানযোতি.
নমো তস্স ভগৱতো অৰহতো সম্মাসম্বুদ্ধস্স