১১. পঞ্চসতিকক্খন্ধকং

১. খুদ্দানুখুদ্দকসিক্খাপদকথা

৪৪১. পঞ্চসতিকক্খন্ধকে ‘‘চত্তাৰি…পে… খুদ্দকানী’’তি এৱমাদি ৱুত্তন্তি সম্বন্ধো. পৰিযাযেনাতি কাৰণেন. ধূমকালিকন্তি এত্থ ধূমস্স কালো ধূমকালো, ধূমস্স উট্ঠিতকালোতি অত্থো. সো এতস্সত্থীতি ধূমকালিকং, সিক্খাপদপঞ্ঞত্তং. ইতি ইমমত্থং দস্সেন্তো আহ ‘‘যাৱা’’তিআদি.

৪৪৩. ইদন্তি ‘‘কতমানি পন ভন্তে খুদ্দানুখুদ্দকানি সিক্খাপদানী’’তি অপুচ্ছনং. ‘‘তযা’’তি ইমিনা ইদং তেতি এত্থ তেসদ্দস্স ‘‘তুয্হং, তৱা’’তি অত্থে পটিক্খিপতি. আপত্তিন্তি দুক্কটাপত্তিং. হীতি সচ্চং, যস্মা ৱা. তেতি থেৰা. ‘‘সঙ্ঘো…পে… ন সমুচ্ছিন্দতী’’তি এতং ৱচনং অনুস্সাৱিতন্তি যোজনা. ‘‘দেসেহি তং আৱুসো দুক্কট’’ন্তি ইদম্পি চ ৱুত্তন্তি সম্বন্ধো. থেৰো পনাতি আনন্দত্থেৰো পন আহাতি সম্বন্ধো. তত্থাতি অপুচ্ছনে. যথাতি যেনাকাৰেন. চতূসু ঠানেসূতি ‘‘ভগৱতো ৱস্সিকসাটিকং অক্কমিত্ৱা সিব্বেসী’’তিআদীসু চতূসু ঠানেসু. এত্থাতি পঞ্চসতিকক্খন্ধকে.

ইতি পঞ্চসতিকক্খন্ধকৱণ্ণনায যোজনা সমত্তা.