৩. পব্বাজনীযকম্মকথা

২৭. এত্থাতি অস্সজিপুনব্বসুকৱত্থুম্হি. কাযিকোতি এত্থ কাযেন কীড়তীতি কাযিকোতি ৱচনত্থং দস্সেন্তো আহ ‘‘কাযকীড়া ৱুচ্চতী’’তি. ‘‘এসেৱ নযো’’তি ইমিনা ৱাচায কীড়তীতি ৱাচসিকো, কাযিকো চ ৱাচসিকো চ কাযিকৱাচসিকোতি ৱচনত্থং অতিদিসতি. এত্থ চ পচ্ছিমৱচনত্থো সমাহাৰদ্ৱন্দো, সমাহাৰদ্ৱন্দেপি কত্থচি পুল্লিঙ্গমিচ্ছন্তি সদ্দৱিদূ ‘‘ধম্মৱিনযো’’তিআদীসু (ৱিভ. অট্ঠ. ৫০৯) ৱিয. কাযদ্ৱাৰপঞ্ঞত্তসিক্খাপদং ৱীতিক্কমতীতি কাযিকোতি ৱচনত্থং দস্সেন্তো আহ ‘‘কাযদ্ৱাৰে পঞ্ঞত্তসিক্খাপদৱীতিক্কমো ৱুচ্চতী’’তি. কাযেন পঞ্ঞত্তসিক্খাপদং ৱীতিক্কমেতীতি কাযিকোতি ৱচনত্থোপি যুজ্জতেৱ. ‘‘উপহননং ৱুচ্চতী’’তি ইমিনা উপহননং উপঘাতং, তমেৱ উপঘাতিকন্তি ৱচনত্থং দস্সেতি. ‘‘নাসন’’ন্তি ইমিনা হনধাতুযা হিংসনত্থং দস্সেতি. পটিক্খিত্তৱেজ্জকম্মাদিৱসেন তেলপচনঅৰিট্ঠপচনাদীনি কাযিকো মিচ্ছাজীৱো নামাতি যোজনা. ইমিনা মিচ্ছাজীৱস্স সৰূপং দস্সেতি.