২৩৯. দ্ৱেনিস্সাৰণাদিকথা

৩৯৫. ৱত্থুতোতি ৱত্থুকাৰণা. তত্থাতি ‘‘দ্ৱেমা ভিক্খৱে’’তিআদিপাঠে. ‘‘সন্ধায ৱুত্ত’’ন্তি ইমিনা ‘‘অপ্পত্তো’’তিআদিসুত্তস্স নেয্যত্থভাৱং দস্সেতি. হীতি সচ্চং, যস্মা ৱা. তন্তি পব্বাজনীযকম্মং. পুন তন্তি পব্বাজনীযকম্মমেৱ. এস ভিক্খু অপ্পত্তোতি সম্বন্ধো. কস্মা অপ্পত্তোতি আহ ‘‘যস্মা’’তিআদি. আৱেণিকলক্খণেনাতি অৱিনা হুত্ৱা পৱত্তেন লক্খণেন. অত্তনা অৱিনা হুত্ৱা অত্তনো সন্তকেন ৱিসুং ভূতেন লক্খণেনাতি ৱুত্তং হোতি. যদি অপ্পত্তো, কস্মা সুনিস্সাৰিতোতি আহ ‘‘যস্মা পনস্সা’’তিআদি. অস্সাতি ভিক্খুস্স, কৰেয্যাতি সম্বন্ধো. তং চে সঙ্ঘো তজ্জনীযকম্মাদিৱসেন নিস্সাৰেতি, সুনিস্সাৰিতোতি সম্বন্ধো. সোতি ভিক্খু. যস্মা অনুঞ্ঞাতা, তস্মা সুনিস্সাৰিতোতি যোজনা. কিত্তকেন অঙ্গেন অনুঞ্ঞাতাতি আহ ‘‘একেনপি অঙ্গেনা’’তি.

৩৯৬. ওসাৰণাতি এত্থ ওত্যূপসগ্গৱসেন সৰধাতু পৱেসনত্থোতি আহ ‘‘পৱেসনা’’তি. তত্থাতি ‘‘ওসাৰণা’’তিআদিপাঠে. ওসাৰেতীতি এত্থ অব্ভানাদিৱসেন পৱেসনং পটিক্খিপন্তো আহ ‘‘উপসম্পদকম্মৱসেনা’’তি. সহস্সক্খত্তুম্পীতি পিসদ্দো গৰহত্থো. একৱাৰাদিকে পন কা নাম কথাতি দস্সেতি. সাতিসাৰাতি সদোসা. তথাতি যথা আচৰিযুপজ্ঝাযা সাতিসাৰা, তথা. সেসো কাৰকসঙ্ঘো সাতিসাৰোতি সম্বন্ধো. ‘‘হত্থচ্ছিন্নাদযো পন দ্ৱত্তিংস সুওসাৰিতা’’তি ৱুত্তত্তা অন্ধমূগবধিৰানং অপব্বজিতানম্পি উপসম্পদা ৰুহতীতি দট্ঠব্বং. তেতি হত্থচ্ছিন্নাদযো দ্ৱত্তিংস.

৩৯৭. অভূতৱত্থুৱসেনাতি অসচ্চৱত্থুৱসেন, অসংৱিজ্জমানৱত্থুৱসেন ৱা. তত্থাতি ‘‘ইধ পন ভিক্খৱে’’তিআদিপাঠে. পটিনিস্সজ্জিতাতি এত্থ তপচ্চযস্স কম্মত্থে পৱত্তভাৱং দস্সেন্তো আহ ‘‘পটিনিস্সজ্জিতব্বা’’তি.