২৩৬. ঞত্তিৱিপন্নকম্মাদিকথা

৩৮৫. অঞ্ঞত্ৰাপি ধম্মাতি এত্থ ধম্মাতি উপযোগত্থে নিস্সক্কৱচনমেতন্তি আহ ‘‘অঞ্ঞত্ৰ ধম্ম’’ন্তি. ‘‘অঞ্ঞত্ৰা’’তি নিপাতপযোগে দুতিযাততিযাপঞ্চমীসু অঞ্ঞতৰস্স সম্ভৱতো উপযোগৱচনম্পি হোতি. তস্মা ৱুত্তং ‘‘অযমেৱ ৱা পাঠো’’তি. ‘‘ভূতেন ৱত্থুনা’’তি ইমিনা ধম্মসদ্দস্স সচ্চত্থং দস্সেতি. ‘‘এসেৱ নযো’’তি ইমিনা সদ্দসভাৱমেৱ সন্ধায অতিদিসতি, ন অত্থং. তেন ৱুত্তং ‘‘এত্থ পনা’’তিআদি. সত্থুসাসনন্তি সত্থু আণা. সত্থুআণা নাম ঞত্তিঅনুসাৱনানং সম্পদাতি আহ ‘‘ঞত্তিসম্পদা অনুসাৱনসম্পদা চা’’তি. ‘‘পটিকুট্ঠঞ্চেৱ কতঞ্চা’’তি ইমিনা পটিকুট্ঠকতন্তি পদস্স দ্ৱন্দৱাক্যং দস্সেতি. পটিকুসিতব্বন্তি পটিকুট্ঠং, কত্তব্বন্তি কতং, কম্মং. তমেৱত্থং দস্সেন্তো আহ ‘‘যং অঞ্ঞেসূ’’তিআদি. তত্থ যন্তি কম্মং.

৩৮৭. পাড়িযাতি ৱিনযপাড়িযা. যন্তি কম্মং, ন কৰিযতীতি সম্বন্ধো. এত্থাতি অট্ঠকথাযং. সো চ খোতি সো চ ৱিত্থাৰো, আগতোতি সম্বন্ধো. কস্মা ঞত্তিদুতিযঞত্তিচতুত্থকম্মানমেৱ ৱসেন আগতো, ননু ঞত্তিঅপলোকনকম্মৱসেনপি আগতেন ভৱিতব্বন্তি আহ ‘‘যস্মা পনা’’তিআদি. ঞত্তিদুতিযঞত্তিচতুত্থেসু হাপনং ৱা অঞ্ঞথা কৰণং ৱা অত্থি ৱিয ঞত্তিকম্মে নত্থীতি যোজনা. ঞত্তিকম্মে ঞত্তিট্ঠপনতো অঞ্ঞকিচ্চস্স অসম্ভৱতো হাপনং ৱা অঞ্ঞথা কৰণং ৱা নত্থীতি অধিপ্পাযো. তানীতি ঞত্তিকম্মঅপলোকনকম্মানি. সব্বেসম্পি কম্মানন্তি সব্বেসম্পি চতুন্নং কম্মানং. পৰতোতি পৰস্মিং পৰিৱাৰাৱসানে (পৰি. অট্ঠ. ৪৮২).