২১৭. তিচীৱৰানুজাননকথা

৩৪৬. ‘‘উক্খিত্তভণ্ডিকভাৱং আপাদিতে’’তি ইমিনা উব্ভণ্ডিতেতি এত্থ উক্খিত্তং ভণ্ডং উব্ভণ্ডং, উব্ভণ্ডভাৱং ইতা আপাদিতাতি উব্ভণ্ডিতাতি ৱচনত্থং দস্সেতি. তে উব্ভণ্ডিতে ভিক্খূ অদ্দসাতি যোজনা. ভিসিসঙ্খেপেনাতি ভিসিযং পক্খেপেন, পৱেসেনাতি অত্থো, ভিসিআকাৰেনাতি ৱুত্তং হোতি. তত্থাতি দক্খিণাগিৰিং. গচ্ছন্তা তে ভিক্খূতি যোজনা. ‘‘অট্ঠপমাণাসূ’’তি ইমিনা অন্তৰট্ঠকাসূতি এত্থ কপচ্চযো পমাণত্থে হোতীতি দস্সেতি, কেসুচি পোত্থকেসু পমাণসদ্দো ন দিস্সতি, গড়িতোতি দট্ঠব্বো. ৰত্তীসূতি সম্বন্ধো. ভগৱন্তন্তি এত্থ সম্পদানত্থে উপযোগৱচনন্তি আহ ‘‘ভগৱতো’’তি. সীতালুকাতি এত্থ সীতং পকতি এতেসন্তি সীতালুনো, তেযেৱ সীতালুকাতি ৱচনত্থং দস্সেন্তো আহ ‘‘সীতপকতিকা’’তি. যে কুলপুত্তা পকতিযাৱ সীতেন কিলমন্তি, তে সীতালুকা নামাতি যোজনা. একচ্চিযন্তি এত্থ একচ্চসদ্দো একপৰিযাযোতি আহ ‘‘একং পট্ট’’ন্তি. ইমিনা একোযেৱ একচ্চোতি কত্ৱা সকত্থে অচ্চপচ্চযোতি দস্সেতি. ‘‘পট্ট’’ন্তি ইমিনা একচ্চেন নিযুত্তং একচ্চিযন্তি ৱচনত্থং কত্ৱা নিযুত্তত্থে পৱত্তস্স ইযপচ্চযস্স সৰূপং দস্সেতি. ইতীতি এৱং. ভগৱা অনুজানাতীতি সম্বন্ধো. ইতৰেতি সঙ্ঘাটিতো ইতৰে উত্তৰাসঙ্গঅন্তৰৱাসকে.