৭. কথিনক্খন্ধকং

১৮৭. কথিনানুজাননকথা

৩০৬. কথিনক্খন্ধকে পাৱেয্যকাতি এত্থ পাৱাৰট্ঠে নিৱসন্তীতি পাৱেয্যকাতি ৱচনত্থং দস্সেন্তো আহ ‘‘পাৱাৰট্ঠৱাসিনো’’তি. তত্থাতি পাৱানামকে ৰট্ঠে. একো পিতা এতেসন্তি একপিতুকা. তে চ তে ভাতৰো চেতি একপিতুকভাতৰো, তেসং. এতন্তি ‘‘পাৱেয্যকা’’তি এতং নামং. তেসূতি পাৱেয্যকেসু. ‘‘ধুতঙ্গসমাদানৱসেনা’’তি ৱিসেসনস্স ব্যৱচ্ছেদভাৱং দস্সেতুং ৱুত্তং ‘‘ন অৰঞ্ঞৱাসমত্তেনা’’তি. ৱিসেসনঞ্হি দুৱিধং ব্যৱচ্ছেদং, তপ্পাকটিকৰণঞ্চাতি. তেসন্তি পাৱেয্যকানং. পিণ্ডপাতিকাদিভাৱেপীতি সম্বন্ধো. পিসদ্দো আৰঞ্ঞকং অপেক্খতি. এতন্তি ‘‘সব্বে আৰঞ্ঞকা’’তিআদি এতং ৱচনং. ইমে পনাতি পাৱেয্যকা পন. উদকসংগহেতি এত্থ উদকেন সংগহেতব্বন্তি দস্সেন্তো আহ ‘‘উদকেন সংগহিতে’’তি. ‘‘থলে চ নিন্নে চা’’তি ইমিনা ‘‘উদকসংগহে’’তি পদস্স সৰূপং দস্সেতি.

উদকচিক্খল্লোতি উদকেন লোড়িতো চিক্খল্লো উদকচিক্খল্লো. ওকপুণ্ণেহীতি এত্থ ওকসদ্দো উদকৱেৱচনোতি আহ ‘‘উদকপুণ্ণেহী’’তি. উদকঞ্হি উচযতি সমৱাযভাৱেন পৱত্ততীতি ওকন্তি ৱুচ্চতি. তেসন্তি পাৱেয্যকানং. ঘনানীতি নিৰন্তৰানি. তেসূতি চীৱৰেসু. তেনাতি চীৱৰানং ঘনত্তা, উদকস্স চ ন পগ্ঘৰণত্তা. ভগৱতা ‘‘অৱিৱদমানা ফাসুকং ৱস্সং ৱসিত্থা’’তি পুচ্ছিযমানাপি তে ভিক্খূ যথাপুচ্ছিতং অৱত্ৱা কস্মা ফাসুকপদং অপনেত্ৱা ‘‘অৱিৱদমানা ৱস্সং ৱসিম্হা’’তি অৱোচুন্তি আহ ‘‘অৱিৱদমানা ৱস্সং ৱসিম্হাতি এত্থা’’তিআদি. উক্কণ্ঠিততায চাতি এত্থ চসদ্দো ‘‘ফাসুতায অভাৱেনা’’তি এত্থাপি যোজেতব্বো. সেনাসনফাসুতায অভাৱেন চ ভগৱতো দস্সনালাভেন উক্কণ্ঠিততায চাতি হি অত্থো. অনমতগ্গিযকথন্তি সংযুত্তনিকাযে অনমতগ্গিযসুত্তন্তকথং (সং. নি. ২.১৩৫). সব্বেৱ তে পাৱেয্যকা ভিক্খূতি যোজনা. তন্তি অনমতগ্গিযকথং. ততোতি ধম্মকথনতো, পৰন্তি সম্বন্ধো. ভগৱা আমন্তেসীতি সম্বন্ধো. একং চীৱৰন্তি সঙ্ঘাটিং. সন্তৰুত্তৰেনাতি সহ অন্তৰেনাতি সন্তৰং, সন্তৰঞ্চ তং উত্তৰঞ্চেতি সন্তৰুত্তৰং, তেন. অস্সুতি ভৱেয্যুং. অভৱিস্সংসূতি হি অত্থো. সত্তমীৱিভত্তিকালাতিপত্তিৱিভত্তীনং সমানত্থভাৱো সদ্দসত্থেসু ৱুত্তোযেৱ. চসদ্দো উপন্যাসত্থো. এস কথিনত্থাৰো নামাতি যোজনা. অনুজানিতুকামো হুত্ৱাতি সম্বন্ধো.

তত্থাতি ‘‘অনুজানামি ভিক্খৱে’’তিআদিপাঠে. ৱোকাৰস্স নিপাতমত্তে সতি কথমত্থো ভৱিস্সতীতি আহ ‘‘অত্থতকথিনানন্তি অত্থো’’তি. অত্থতকথিনানং ভিক্খূনন্তি সম্বন্ধো. লদ্ধগুণং দস্সেন্তো আহ ‘‘এৱঞ্হী’’তিআদি. হিসদ্দো লদ্ধগুণজোতকো. পৰতোতি পৰম্হি. ‘‘সো তুম্হাক’’ন্তি ৱা ‘‘সো ৱো’’তি ৱা অৱত্ৱা ‘‘সো নেসং ভৱিস্সতী’’তি ৱুত্তত্তা ৱো-কাৰো নিপাতমত্তোতি অধিপ্পাযো. ‘‘ৱোতি সামিৱচনমেৱেত’’ন্তি ইমিনা ৱো তুম্হাকন্তি অত্থং দস্সেতি. এৱং সতি ‘‘পৰতো সো নেস’’ন্তি এত্থ কথমত্থো ভৱিস্সতীতি আহ ‘‘সো নেসন্তি এত্থ পনা’’তিআদি. যে তুম্হে অত্থতকথিনা, তেসং তুম্হাকন্তি যোজনা. কথিনসদ্দো থিৰত্থৱাচকো অনিপ্ফন্নপাটিপদিকো. অনামন্তচাৰাদিকানং পঞ্চানিসংসানং অন্তোকৰণসমত্থভাৱে থিৰন্তি অত্থো.

তত্থাতি অনামন্তচাৰাদীসু পঞ্চানিসংসেসু. অনামন্তচাৰোতি এত্থ চৰণং চাৰো, অনামন্তেত্ৱা চাৰো অনামন্তচাৰোতি দস্সেন্তো আহ ‘‘অনামন্তেত্ৱা চৰণ’’ন্তি. ‘‘অসমাদায চৰণ’’ন্তি ইমিনা অসমাদানচাৰোতি এত্থ পুব্বপদে ত্ৱাপচ্চযস্স অনাদেসং কত্ৱা অসমাদানচাৰোতি ৱুত্তন্তি দস্সেতি. যাৱতত্থচীৱৰন্তি এত্থ আকাৰলোপেন সন্ধীতি আহ ‘‘যাৱতা চীৱৰেন অত্থো’’তি. ‘‘যাৱদত্থচীৱৰ’’ন্তিপি পাঠো, এৱং সতি দকাৰো পদসন্ধিমত্তো. যাৱসদ্দো পৰিচ্ছেদত্থৱাচকো, ন অভিৱিঝত্থৱাচকো. অত্থসদ্দেন সমাসো হোতি. যো চ তত্থ চীৱৰুপ্পাদোতি এত্থ তত্থসদ্দস্স ৱিসযং দস্সেন্তো আহ ‘‘কথিনত্থাৰসীমায’’ন্তি. তত্ৰুপ্পাদেনাতি তত্ৰ কথিনত্থাৰসীমাযং উপ্পাদেন মূলেন. ‘‘চীৱৰং উপ্পজ্জতী’’তি ইমিনা চীৱৰুপ্পাদোতি এত্থ চীৱৰমেৱ উপ্পাদো চীৱৰুপ্পাদোতি ৱিসেসনপৰপদত্তং দস্সেতি.

কেতি কিত্তকা. ইদং ‘‘গণৱসেনা’’তি ৱচনং সন্ধায ৱুত্তং. অথ ৱা কেতি কিন্নাম ৱুত্থৱস্সা. ইদং ‘‘ৱুত্থৱস্সৱসেনা’’তি ৱচনং সন্ধায ৱুত্তং. সতসহস্সম্পি জনা লভন্তীতি যোজনা. পিসদ্দেন ততো অধিকম্পি লভন্তীতি দস্সেতি. ছিন্নৱস্সা ৱাতি পুৰিমিকায উপগন্ত্ৱা ছিন্নৱস্সা ৱা. অঞ্ঞস্মিং ৱিহাৰেতি কথিনত্থাৰৱিহাৰতো অপৰস্মিং ৱিহাৰে. সব্বে ছিন্নৱস্সাদিকা ভিক্খূ পুৰিমিকায ৱস্সূপগতানং ভিক্খূনং গণপূৰকা হোন্তীতি যোজনা. ইতৰেসংযেৱাতি পুৰিমিকায ৱস্সং উপগন্ত্ৱা পঠমপৱাৰণায পৱাৰিতানমেৱ. পৰিপুণ্ণৱস্সোতি পৰিপুণ্ণো ৱীসতিৱস্সো, অচ্ছিন্নৱস্সো ৱা. সোতি সামণেৰো. ইতি এত্থাপীতি এৱং এতেসু তীসু ৱাৰেসুপি.

কেন দিন্নং কথিনচীৱৰং ৱট্টতীতি যোজনা. যেন কেনচি দিন্নং চীৱৰং ৱট্টতীতি সম্বন্ধো. তন্তি ৱত্তং. অজানন্তোতি অজাননহেতু. হেত্ৱত্থে হি অন্তপচ্চযো. তস্সাতি কথিনদাযকস্স. এৱন্তি ইমিনা ৱক্খমাননযেন. অঞ্ঞতৰপহোনকং ৱত্থন্তি সম্বন্ধো. তস্সাতি কথিনচীৱৰস্স. এত্তকা নাম সূচিযো ৱট্টতীতি সম্বন্ধো. ইতি আচিক্খিতব্বন্তি যোজনা.

কথিনত্থাৰকেনাপি ৱত্তং জানিতব্বন্তি সম্বন্ধো. পিসদ্দো কথিনদাযকং অপেক্খতি. ৱত্তং ৱিত্থাৰেন্তো আহ ‘‘তন্তৱাযগেহতো হী’’তিআদি. আভতসন্তানেনেৱাতি আভতসন্ততিযা এৱ. খলিমক্খিতসাটকোতি অহতসাটকো. সো হি খলেন তক্কেন কঞ্জিকেন মক্খিতসাটকত্তা ‘‘খলিমক্খিতসাটকো’’তি ৱুচ্চতি. কথিনত্থাৰসাটকন্তি কথিনত্থাৰত্থায দিন্নং সাটকং. তদহেৱাতি তস্মিং দিন্নঅহনি এৱ. তস্মিন্তি পঠমং দিন্নে কথিনত্থাৰসাটকে. অঞ্ঞানি চাতি কথিনসাটকতো অঞ্ঞানি চ. চসদ্দেন ন কথিনসাটকমেৱ আহৰতি, অঞ্ঞানি চাতি দস্সেতি. যোতি কথিনদাযকো. ইতৰোতি পঠমং কথিনদাযকো. যথা তথা ওৱদিত্ৱাতি তৱ সন্তকতো এতস্স সন্তকং সঙ্ঘস্স বহুপকাৰং, সঙ্ঘস্স বহুপকাৰত্তং তযাপি ইচ্ছিতব্বং, এৱমিচ্ছন্তস্স বহুপুঞ্ঞন্তি যেন তেনাকাৰেন ওৱদিত্ৱা.

কেন ভিক্খুনাতি সম্বন্ধো. যস্স সঙ্ঘো কথিনচীৱৰং দেতি, তেন ভিক্খুনা অত্থৰিতব্বন্তি যোজনা. কস্স ভিক্খুস্সাতি সম্বন্ধো. যো জিণ্ণচীৱৰো হোতি, তস্স দাতব্বন্তি যোজনা. মহতী পৰিসা এতস্সাতি মহাপৰিসো থেৰো. ‘‘নৱকতৰো সক্কোতি, তস্স দাতব্ব’’ন্তি ৱচনস্স অনেকন্তভাৱং দস্সেন্তো আহ ‘‘অপি চা’’তিআদি. অপি চাতি একন্তেন. তদত্থাযাতি তস্স জিণ্ণচীৱৰস্স অত্থায. অস্সাতি ভিক্খুস্স. পেলৱোতি ৱিৰড়ো. তেনাপীতি কথিনত্থাৰকেনাপি. তন্তি ৱিধিং. দানকম্মৱাচাতি দানকাৰণকম্মৱাচা.

এৱং দিন্নে পন কথিনে নিট্ঠাপেতব্বানীতি যোজনা. একেনাপীতি পিসদ্দেন পগেৱ বহূহি পনাতি দস্সেতি. বুদ্ধপ্পসত্থন্তি বুদ্ধেহি পসত্থং. অতীতে কপ্পসতসহস্সমত্থকেতি যোজনা. তস্সাতি পদুমুত্তৰস্স. কথিনং গণ্হি কিৰাতি যোজনা. তন্তি কথিনং, সত্থা অকাসীতি সম্বন্ধো.

কতপৰিযোসিতং কথিনং কিং কাতব্বন্তি আহ ‘‘কতপৰিযোসিতং পনা’’তিআদি. কথিনং গহেত্ৱা অত্থৰিতব্বন্তি সম্বন্ধো. ‘‘তেন কথিনত্থাৰকেন ভিক্খুনা’’তি পদং ‘‘ৱচনীযো’’তি পদে সুদ্ধকত্তা, ‘‘অনুমোদাপেতব্ব’’ন্তি পদে কাৰিতকত্তা. কিং ৱচনীযোতি আহ ‘‘অত্থতং…পে… অনুমোদথা’’তি. ‘‘তেহি অনুমোদকেহি ভিক্খুহী’’তি পদং ‘‘ৱচনীযো’’তি পদে অৱুত্তকত্তা, ‘‘অনুমোদাপেতব্ব’’ন্তি পদে কাৰিতকম্মং অৱুত্তকম্মং, ৱা. ‘‘কথিন’’ন্তি ধাতুকম্মং ৱা ৱুত্তকম্মং ৱা উপনেতব্বং. কিং ৱচনীযোতি আহ ‘‘অত্থতং…পে… অনুমোদামা’’তি. ইতৰেহি চাতি অনুমোদকেহি চ. সব্বেসন্তি অত্থাৰকঅনুমোদকানং. হীতি সচ্চং. এতন্তি সব্বেসং অত্থতভাৱং, ‘‘দ্ৱিন্নং…পে… অনুমোদকস্স চা’’তি ৱচনং ৱা.

এৱং কথিনে অত্থতে সতি পনাতি যোজনা. যেনাতি ভিক্খুনা. অৱিচাৰেত্ৱাৱাতি ‘‘কথিনত্থাৰকস্স দেমা’’তি ৱা ‘‘সঙ্ঘস্স দেমা’’তি ৱা অৱিচাৰেত্ৱা এৱ. সেসচীৱৰানিপীতি কথিনত্থাৰচীৱৰতো সেসচীৱৰানিপি. সঙ্ঘেন দাতব্বানীতি সম্বন্ধো. ‘‘অপলোকেত্ৱা’’তি ইমিনা কম্মৱাচায কিচ্চাভাৱং দস্সেতি. ৱস্সাৱাসিকট্ঠিতিকাযাতি ৱস্সাৱাসকালে পৱত্তায ঠিতিকায. গৰুভণ্ডন্তি মঞ্চবিব্বোহনাদিগৰুভণ্ডং. একসীমাযাতি একায উপচাৰসীমায.

৩০৮. যথা চাতি এত্থ যথাসদ্দো যংসদ্দত্থো. যেন ৱিধিনাতি হি অত্থো. মহাভূমিকন্তি মহাৱিসযং. চতুৱীসতিআকাৰৱন্ততায মহাৱিত্থাৰিকন্তি ৱুত্তং হোতি. ততোতি অনত্থতলক্খণতো. পৰিৱাৰেপীতি পিসদ্দো ন ইধ এৱাতি দস্সেতি.

তত্থাতি চতুৱীসতিযা আকাৰেসু. উল্লিখিতমত্তেনাতি এত্থ পমাণস্স উগ্গহণত্থং নখাদীহি লিখনং উল্লিখিতং, উল্লিখিতং মত্তং পমাণং উল্লিখিতমত্তন্তি দস্সেন্তো আহ ‘‘দীঘতো চ পুথুলতো চ পমাণগহণমত্তেনা’’তি. তমেৱত্থং ৱিত্থাৰেন্তো আহ ‘‘পমাণং হী’’তিআদি. দস্সেন্তো হুত্ৱা উল্লিখতীতি যোজনা. পঞ্চকন্তি পঞ্চপমাণং, পঞ্চসমূহং ৱা খণ্ডং. ৱাসদ্দেন অঞ্ঞানিপি তেৰসকাদীনি সঙ্গণ্হাতি. মোঘসুত্তকাৰোপনমত্তেনাতি মোঘসুত্তস্স চীৱৰস্সূপৰি আৰোপনমত্তেন. দীঘসিব্বিতমত্তেনাতি দীঘতো সিব্বিতমত্তেন. মুদ্দিযপট্টবন্ধনমত্তেনাতি মুদ্দিযপট্টস্স বন্ধনমত্তেন. দ্ৱে চিমিলিকাযোতি দ্ৱে পিলোতিকাযো. পঠমচিমিলিকাতি কথিনচিমিলিকতো অঞ্ঞা অত্তনো পকতিচিমিলিকা ঘটেত্ৱা ঠপিতা হোতীতি যোজনা. ‘‘তং পঠমচিমিলিক’’ন্তি পাঠসেসং অজ্ঝাহৰিত্ৱা কথিনসাটকস্স কুচ্ছিচিমিলিকং কত্ৱাতি ইমিনা সম্বন্ধিতব্বং. পকতিচীৱৰস্সাতি অত্তনো পকতিচীৱৰস্স. পকতিপট্টবন্ধচীৱৰন্তি পকতিপট্টেন বন্ধচীৱৰং. পিট্ঠিঅনুৱাতাৰোপনমত্তেনাতি দীঘতো অনুৱাতস্স চীৱৰস্সূপৰি আৰোপনমত্তেন. দীঘানুৱাতঞ্হি পাৰুপনকালে পিট্ঠিযং ঠিতত্তা পিট্ঠিঅনুৱাতন্তি ৱুচ্চতি. কুচ্ছিঅনুৱাতাৰোপনমত্তেনাতি পুথুলতো অনুৱাতস্স চীৱৰস্সূপৰি আৰোপনমত্তেন. পুথুলানুৱাতঞ্হি পাৰুপনকালে কুচ্ছিযং ঠিতত্তা কুচ্ছিঅনুৱাতন্তি ৱুচ্চতি. আগন্তুকপট্টাৰোপনমত্তেনাতি আগন্তুকপট্টস্স চীৱৰস্সূপৰি আৰোপনমত্তেন. ৱাতি অথৱা.

সাৰুপ্পন্তি সমণানুচ্ছৱিকং. পৰিকথাযাতি পৰিযাযেন উপ্পাদিতায কথায. অতিউক্কট্ঠং ৱট্টতীতি অতিউক্কট্ঠং এৱ ৱট্টতি. ওতিণ্ণসদিসমেৱাতি ওতিণ্ণেন ৱত্থেন সদিসমেৱ কথিনচীৱৰন্তি সম্বন্ধো. তত্থাতি দুৱিধেসু সন্নিধীসু. তদহেৱাতি তস্মিং দিন্নঅহনি এৱ.

ৰত্তিনিস্সগ্গিযেনাতি ৰত্তিঅতিক্কন্তং হুত্ৱা নিস্সগ্গিযেন. অঞ্ঞেনাতি তিচীৱৰতো অঞ্ঞেন. সমণ্ডলিকতন্তি সহ মহামণ্ডলঅড্ঢমণ্ডলেন কতং.

৩০৯. এৱং চতুৱীসতিআকাৰং অনত্থতলক্খণং দস্সেত্ৱা ইদানি সত্তৰসাকাৰং অত্থতলক্খণং দস্সেন্তো আহ ‘‘অহতেনা’’তিআদি. তত্থ পৰিভোগং ন হনিত্থ ন গচ্ছিত্থাতি অহতং, পৰিভোগেন ন হনিতব্বং ন হিংসিতব্বন্তি ৱা অহতন্তি দস্সেন্তো আহ ‘‘অপৰিভুত্তেনা’’তি. ‘‘অহতসদিসেনা’’তি ইমিনা অহতকপ্পেনাতি এত্থ কপ্পসদ্দো সদিসত্থোতি দস্সেতি. পাপণিকেনাতি এত্থ পসাৰিতো আপণো পাপণো, তস্মিং পতিতং পাপণিকন্তি দস্সেন্তো আহ ‘‘আপণদ্ৱাৰে পতিত’’ন্তি. ‘‘পিলোতিক’’ন্তি ইমিনা ণিকপচ্চযস্স সৰূপং দস্সেতি. ৱুত্তৱিপল্লাসেনেৱাতি ৱুত্তেহি ‘‘নিমিত্তকতেনা’’তিআদীহি ৱিপল্লাসেন এৱ. তত্থাতি পৰিৱাৰে. হীতি সচ্চং, যস্মা ৱা. ইধাতি কথিনক্খন্ধকে. অৱুচ্চমানেন তেন ৱচনেন পৰিহাযতীতি সম্বন্ধো.

৩১০. তত্থাতি ‘‘কথঞ্চ ভিক্খৱে উব্ভতং হোতি কথিন’’ন্তিআদিপাঠে. জনেত্তিযো মাতৰোতি যোজনা. ইমিনা ধম্মেন পুত্তে মানেতীতি মাতা, ধম্মেন পুত্তেহি মানিযতীতি ৱা মাতা, সা ৱিয হোন্তীতি মাতিকাতি দস্সেতি. কথিনুব্ভাৰন্তি চ কথিনুদ্ধাৰন্তি চ অত্থতো সদিসং. এতাতি এতা পদজাতিযো. তাসূতি অট্ঠসু মাতিকাসু. অস্সাতি কথিনুব্ভাৰস্স.

১৮৮. আদাযসত্তককথা

৩১১. ন পচ্চেস্সন্তি এত্থ পতীত্যূপসগ্গস্স পুনত্থং, ইধাতুযা চ গত্যত্থং দস্সেন্তো আহ ‘‘ন পুন আগমিস্স’’ন্তি. এৱং পক্কমতো ছিজ্জতীতি সম্বন্ধো.

এতঞ্চাতি পক্কমনন্তিকং, কথিনুদ্ধাৰঞ্চ. তাহন্তি তে অহং. তেতি তুয্হং.

অঞ্ঞন্তি অত্তনো ৱিহাৰতো অঞ্ঞং. এৱং হোতীতি এসো পৰিৱিতক্কো হোতি. সোতি আৱাসপলিবোধো. আদিচ্চবন্ধুনা ৱুত্তোতি যোজনা.

দ্ৱে পলিবোধা একতো ছিজ্জন্তীতি সম্বন্ধো. অপুব্বং অচৰিমন্তি একপহাৰেনেৱ. সো পলিবোধূপচ্ছেদো কস্মা ৱিত্থাৰতো ন ৱুত্তোতি আহ ‘‘সো পনা’’তিআদি. সো পনাতি পলিবোধূপচ্ছেদো পন. ন ৱুত্তোতি সম্বন্ধো. এত্থাতি ইমস্মিং কথিনুব্ভাৰে. কস্মা অযং কথিনুদ্ধাৰো ‘‘নাসনন্তিকো’’তি ৱুত্তোতি আহ ‘‘যস্মা’’তিআদি. তস্সাতি ভিক্খুনো.

আসাৱচ্ছেদিকে ছিজ্জতীতি সম্বন্ধো. অযং পনাতি আসাৱচ্ছেদিকো কথিনুদ্ধাৰো পন. অনেকপভেদো হোতীতি সম্বন্ধো. তস্সাতি ভিক্খুস্স. ৱুত্তোতি অযং আসাৱচ্ছেদিকো কথিনুদ্ধাৰো ৱুত্তোতি যোজনা. এত্থ পনাতি ইমস্মিং পন ঠানে. তত্থাতি সীমাতিক্কন্তিকে.

৩১২-৩২৫. এৱন্তিআদি নিগমনং. সত্তকেতি অট্ঠসু মাতিকাসু আসাৱচ্ছেদতো সেসে সত্তপমাণে, সত্তসমূহে ৱা. তেযেৱাতি সত্তকে এৱ. ততোতি ৱাৰতো. যে যেতি কথিনুদ্ধাৰা. ইতৰেহীতি আসাৱচ্ছেদতো অঞ্ঞেহি. যে পলিবোধা ৱুত্তাতি সম্বন্ধো. আৱাসো চজীযতি অনেনাতি চত্তন্তি ৱচনত্থং দস্সেন্তো আহ ‘‘যেন চিত্তেনা’’তিআদি. তন্তি চিত্তং. ‘‘এসেৱ নযো’’তি ইমিনা আৱাসো ৱমীযতি অনেনাতি ৱন্তং. আৱাসতো মুচ্চতি অনেনাতি মুত্তন্তি ৱচনত্থং অতিদিসতি. সব্বত্থাতি সব্বস্মিং কথিনক্খন্ধকে.

ইতি কথিনক্খন্ধকৱণ্ণনায যোজনা সমত্তা.