১৪৫. পৱাৰণাসঙ্গহকথা

২৪১. অঞ্ঞতৰো ফাসুৱিহাৰোতি এত্থ ফাসুৱিহাৰো নাম কোতি আহ ‘‘তৰুণসমথো ৱা তৰুণৱিপস্সনা ৱা’’তি. ইমিনা তৰুণসমথৱিপস্সনা ফাসুং ৱিহৰতি অনেনাতি ফাসুৱিহাৰোতি দস্সেতি. পৰিবাহিৰা ভৱিস্সামাতি এত্থ কস্মা ইমম্হা ফাসুৱিহাৰা পৰিবাহিৰা ভৱিস্সন্তীতি আহ ‘‘অনিবদ্ধৰত্তিট্ঠানদিৱাট্ঠানাদিভাৱেনা’’তিআদি. তত্থ অনিবদ্ধৰত্তিট্ঠানদিৱাট্ঠানাদিভাৱেনাতি অনিবদ্ধদিৱাট্ঠানাদিভাৱেন হেতুভূতেন, অসক্কোন্তাতি সম্বন্ধো. আদিসদ্দেন অনিবদ্ধচঙ্কমাদযো সঙ্গণ্হাতি. ‘‘ছন্দদানং পটিক্খিপতী’’তি ইমিনা ‘‘সব্বেহেৱ একজ্ঝং সন্নিপতিতব্ব’’ন্তি ৱাক্যস্স অঞ্ঞত্থাপোহনং দস্সেতি. হীতি সচ্চং, যস্মা ৱা. ইমেসু তীসু ছন্দদানং ন ৱট্টতি, তস্মা পটিক্খিপতীতি যোজনা. অযং পৱাৰণাসঙ্গহো নাম ন দাতব্বোতি যোজনা. তৰুণসমথৱিপস্সনালাভী একপুগ্গলো ৱা হোতূতি যোজনা. ‘‘একস্সপি দাতব্বোযেৱা’’তি ইমিনা অযং পৱাৰণাসঙ্গহো একস্স দিন্নোপি সব্বেসং দিন্নো হোতীতি দস্সেতি. পৱাৰণাসঙ্গহে দিন্নে সতীতি যোজনা. আগন্তুকাতি সট্ঠিৱস্সাপি আগন্তুকা. তেসন্তি দিন্নপৱাৰণাসঙ্গহানং. অন্তৰাপীতি কোমুদিযা চাতুমাসিনিযা অন্তৰাপি.

ইতি পৱাৰণাক্খন্ধকৱণ্ণনায যোজনা সমত্তা.