১৪৪. ভণ্ডনকাৰকৱত্থুকথা

২৪০. চতুত্থপঞ্চমাতি ছসু পক্খেসু পোট্ঠপাদমাসস্স জুণ্হপক্খকাড়পক্খসঙ্খাতা চতুত্থপঞ্চমা. ততিযোতি সাৱণমাসস্স কাড়পক্খো ততিযো. ততিযচতুত্থপঞ্চমা ৱাতি এত্থ ততিযোতি সাৱণমাসস্স কাড়পক্খো. চতুত্থোতি পোট্ঠপাদমাসস্স জুণ্হপক্খো. পঞ্চমোতি তস্সেৱ কাড়পক্খো. ‘‘ততিয…পে… পঞ্চমা ৱা’’তি পদানি ‘‘দ্ৱে ৱা তযো ৱা’’তি পদেহি যথাক্কমং যোজেতব্বানি. চতুত্থে ৱা কতেতি চতুত্থপক্খে ৱা পন্নৰসিভাৱেন কতে. দ্ৱে চাতুদ্দসিকাতি ততিযপক্খে চ চাতুদ্দসিযা সদ্ধিং দ্ৱে চাতুদ্দসিকা. ইমেতি ভণ্ডনকাৰকা. তেতি ভণ্ডনকাৰকা.

অসংৱিহিতাতি এত্থ অকাৰস্স ৱিৰহত্থং দস্সেন্তো আহ ‘‘সংৱিদহনৱিৰহিতা’’তি. তত্থ সংৱিদহনৱিৰহিতাতি সংৱিদহনৰক্খৱিৰহিতা. আগমনজাননত্থাযাতি ভণ্ডনকাৰকানং আগমনস্স জাননত্থায. কিলন্তত্থাতি তুম্হে কিলন্তা ভৱথ. ‘‘সম্মোহং কত্ৱা’’তি ইমিনা ৱিক্খিত্ৱাতি পদস্স ৱিক্খেপং কত্ৱাতি অত্থং দস্সেতি. নো চে লভেথাতি এত্থ কিমত্থায ন লভেথাতি আহ ‘‘বহিসীমং গন্তু’’ন্তি. ‘‘ভণ্ডনকাৰকানং…পে… হোন্তী’’তি ইমিনা অলভনস্স কাৰণং দস্সেতি. যন্তি আগমং জুণ্হং. কোমুদিযা চাতুমাসিনিযাতি পচ্ছিমকত্তিকপুণ্ণমাযং. সা হি কুমুদানমত্থিতায কোমুদী, চতুন্নং ৱস্সিকানং মাসানং পূৰণত্তা চাতুমাসিনীতি ৱুচ্চতি. তদা হি কুমুদানি সুপুপ্ফিতানি হোন্তি, তস্মা কুমুদানং সমূহা, কুমুদানি এৱ ৱা কোমুদা, তে এত্থ অত্থীতি কোমুদীতি ৱুচ্চতি, কুমুদৱতীতি ৱুত্তং হোতি. অৱস্সং পৱাৰেতব্বন্তি ধুৱং পৱাৰেতব্বং. হীতি সচ্চং, যস্মা ৱা. তন্তি কোমুদিং চাতুমাসিনিং.