১২০. অফাসুকৱিহাৰকথা

২০৯. পৱাৰণাক্খন্ধকে অল্লাপোতি এত্থ আত্যূপসগ্গস্স আদিকম্মত্থং, লপধাতুযা চ কথনত্থং দস্সেন্তো আহ ‘‘পঠমৱচন’’ন্তি. আদিতো, আদিম্হি ৱা লপনং কথনং, লপতি অনেনাতি ৱা অল্লাপো সংযোগে পৰে ৰস্সো. সং পুন লপনং, লপতি ৱা অনেনাতি সল্লাপো. হত্থৱিলঙ্ঘকেনাতি এত্থ ৱিপুব্বো লঘিধাতু উক্খিপনত্থোতি আহ ‘‘হত্থুক্খেপকেনা’’তি. পসুসংৱাসন্তি এত্থ পসূতি সব্বচতুপ্পদা. তে হি অঞ্ঞমঞ্ঞং পসন্তি বাধন্তি, মনুস্সাদীহি ৱা পসীযন্তি বাধীযন্তীতি পসৱোতি ৱুচ্চন্তি. পসূনং ৱিয সংৱাসন্তি পসূনং সংৱাসো ৱিয সংৱাসোতি পসুসংৱাসো, তং পসুসংৱাসং. তমত্থং ৱিত্থাৰেন্তো আহ ‘‘পসৱোপি হী’’তিআদি. তথাতি যথা ন কৰোন্তি, তথাতি অত্থো. এতেপীতি ভিক্খৱোপি. তস্মাতি যস্মা অকংসু, তস্মা. নেসন্তি ভিক্খূনং. সব্বত্থাতি সব্বেসু এড়কসংৱাসসপত্তসংৱাসেসু. মূগব্বতন্তি মূগস্স ৱতং ৱিয ৱতন্তি মূগব্বতং, সুঞ্ঞৱচনৱতন্তি অত্থো. তিত্থিযসমাদানন্তি তিত্থিযেহি সমাদাতব্বং. ৱতসমাদানন্তি সমাদাতব্বং ৱতং. অঞ্ঞমঞ্ঞানুলোমতাতি এত্থ তাসদ্দস্স ভাৱত্থং দস্সেন্তো আহ ‘‘অনুলোমভাৱো’’তি. ইমিনা ‘‘দেৱতা’’তিআদীসু (সং. নি. অট্ঠ. ১.১.১; খু. পা. অট্ঠ. ৫.এৱমিচ্চাদিপাঠৱণ্ণনা; সু. নি. অট্ঠ. ২.অঙ্গলসুত্তৱণ্ণনা) ৱিয তাপচ্চযস্স স্ৱত্থং ‘‘জনতা’’তিআদীসু (পে. ৱ. অট্ঠ. ৪৬০) ৱিয সমূহত্থঞ্চ নিৱত্তেতি. ‘‘অঞ্ঞমঞ্ঞং ৱত্তু’’ন্তি ৱচনস্স যুত্তিং দস্সেন্তো আহ ‘‘ৱদন্তু ম’’ন্তিআদি. ৱদন্তং ভিক্খুং ৱত্তুন্তি যোজনা. ‘‘আপত্তীহি ৱুট্ঠানভাৱো’’তি ইমিনা আপত্তিৱুট্ঠানতাতি পদস্স পঞ্চমীসমাসঞ্চ তাপচ্চযস্স ভাৱত্থঞ্চ দস্সেতি. ‘‘ৱিনয’’ন্তিআদিনা পুৰতো কত্ৱা কৰণং পুৰেক্খাৰো, তস্স ভাৱো পুৰেক্খাৰতা, ৱিনযং পুৰেক্খাৰতা ৱিনযপুৰেক্খাৰতাতি ৱচনত্থং দস্সেতি. এত্থ পুৰসদ্দস্স একাৰত্তং সদ্দসত্থেসু (মোগ্গল্লানব্যাকৰণে ৫.১৩৪ সুত্তে) ৱদন্তি. তস্স যুত্তিং দস্সেন্তো আহ ‘‘ৱদন্তুম’’ন্তিআদি (মোগ্গল্লানব্যাকৰণে ৫.১৩৪ সুত্তে).

২১০. সব্বসঙ্গাহিকাতি ‘‘সঙ্ঘো পৱাৰেয্যা’’তি সামঞ্ঞতো ৱুত্তত্তা সব্বেসং তেৱাচিকাদীনং সঙ্গাহকা. ঞত্তীতি ঞাপেতি সঙ্ঘং এতায ৱচনাযাতি ঞত্তি. সব্বসঙ্গাহিকভাৱং ৱিত্থাৰেন্তো আহ ‘‘এৱঞ্হি ৱুত্তে’’তিআদি. তেৱাচিকন্তি তিস্সো ৱাচা এতস্সাতি তেৱাচিকং, তীহি ৱাচাহি কত্তব্বন্তি ৱা তেৱাচিকং. এসেৱ নযো সেসেসুপি. সমানৱস্সিকন্তি সমানং ৱস্সং এতেসন্তি সমানৱস্সা, তেহি কত্তব্বন্তি সমানৱস্সিকং. অঞ্ঞন্তি দ্ৱেৱাচিকএকৱাচিকং.

২১১. অচ্ছন্তীতি এত্থ আসধাতুযা উপৱেসনত্থং দস্সেন্তো আহ ‘‘নিসিন্নাৱ হোন্তী’’তি. ‘‘ন উট্ঠহন্তী’’তি ইমিনা এৱফলং দস্সেতি. তদমন্তৰাতি এত্থ ‘‘তদন্তৰা’’তি ৱত্তব্বে ৱাচাসিলিট্ঠৱসেন মকাৰাগমং কত্ৱা ৱুত্তন্তি আহ ‘‘তদন্তৰা’’তি. তস্স অত্তনো পৱাৰিতকালস্স অন্তৰা. ‘‘যাৱ পৱাৰেন্তী’’তি পদস্স নিযমত্থং দস্সেতুং ৱুত্তং ‘‘তাৱতকং কাল’’ন্তি. যাৱাতি নিপাতস্স পযোগত্তা ‘‘তদমন্তৰা’’তি এত্থ অভিৱিধিঅৱধ্যত্থে পঞ্চমীৱিভত্তি হোতীতি দট্ঠব্বং.