১২১. পৱাৰণাভেদকথা

২১২. চাতুদ্দসিকাযাতি ভণ্ডনকাৰকেহি উপদ্দুতত্তা পচ্চুক্কড্ঢিতায পুব্বকত্তিকমাসস্স কাড়পক্খচাতুদ্দসিকায. ‘‘অজ্জ পৱাৰণা পন্নৰসী’’তি পুব্বকিচ্চং কাতব্বন্তি যোজনা.

পৱাৰণাকম্মেসূতি নিদ্ধাৰণে ভুম্মং, ‘‘অধম্মেন ৱগ্গং পৱাৰণাকম্ম’’ন্তিআদীসু সম্বন্ধিতব্বং. অধম্মেন ৱগ্গন্তি এত্থ অধম্মং নাম সঙ্ঘো হুত্ৱাপি সঙ্ঘপৱাৰণমকত্ৱা গণপৱাৰণায কৰণং, গণো হুত্ৱাপি গণপৱাৰণমকত্ৱা সঙ্ঘপৱাৰণায কৰণঞ্চ. ৱগ্গং নাম একসীমাযং ৱসন্তানম্পি সব্বেসং একতো অসন্নিপতনং.

অধম্মেন সমগ্গন্তি এত্থ অধম্মং ৱুত্তনযমেৱ. সমগ্গং নাম সব্বেসং একতো সন্নিপতনং.

ধম্মেন ৱগ্গন্তি এত্থ ধম্মং নাম সঙ্ঘো হুত্ৱা সঙ্ঘপৱাৰণায কৰণং, গণো হুত্ৱা গণপৱাৰণায কৰণঞ্চ. ৱগ্গং ৱুত্তনযমেৱ. ধম্মেন সমগ্গং সুৱিঞ্ঞেয্যমেৱ. ইতিসদ্দো পৰিসমাপনত্থো.

২১৩. এৱং দিন্নাযাতি এৱং পাড়িযং ৱুত্তনযেনেৱ দিন্নায. পৱাৰেতব্বন্তি ৱস্সংৱুত্থপৱাৰণায পৱাৰেতব্বং. তিস্সোতি তিস্সনামকো. দিট্ঠেন ৱা ৱদতূতি সম্বন্ধো. তন্তি তিস্সনামকং ভিক্খুং. সঙ্ঘো অনুকম্পং উপাদায ৱদতূতি যোজনা. ৱুড্ঢতৰোতি পৱাৰণাদাযকো তংহাৰকতো ৱুড্ঢতৰো. হীতি লদ্ধগুণো. তেনাতি পৱাৰণাহাৰকেন. তস্সাতি পৱাৰণাদাযকস্স.

ইধাপি চাতি ইমস্মিং পৱাৰণাক্খন্ধকেপি চ. অপিসদ্দো উপোসথক্খন্ধকং অপেক্খতি. অৱসেসকম্মত্থাযাতি পৱাৰণাকম্মতো অৱসেসানং কম্মানমত্থায হোতীতি সম্বন্ধো. পৱাৰণায আহটায সতিযাতি যোজনা. তস্স চাতি পৱাৰণাদাযকস্স চ. সব্বেসন্তি পৱাৰণাদাযকস্স চ সঙ্ঘস্স চাতি সব্বেসং. অঞ্ঞং পন কম্মন্তি পৱাৰণাকম্মতো অঞ্ঞং কম্মং পন. তেন পন ভিক্খুনাতি পৱাৰণাদাযকেন ভিক্খুনা পন. এত্থ চ তদহুপৱাৰণায অত্তনো চ সঙ্ঘস্স চ সচে পৱাৰণাকম্মমেৱ হোতি, পৱাৰণাযেৱ দাতব্বা. অথ অঞ্ঞমেৱ কম্মং হোতি, ছন্দোযেৱ দাতব্বো. যদি পৱাৰণাকম্মঞ্চ অঞ্ঞকম্মঞ্চ হোতি, পৱাৰণা চ ছন্দো চ দাতব্বো. তং সন্ধায ৱুত্তং ‘‘তদহু পৱাৰণায পৱাৰণং দেন্তেন ছন্দম্পি দাতু’’ন্তি (মহাৱ. ২১৩). তেনাতি দানহেতুনা.

২১৮. অজ্জ মে পৱাৰণাতি এত্থ পাড়িনযতো অঞ্ঞং অট্ঠকথানযং দস্সেন্তো আহ ‘‘সচে’’তিআদি.

২১৯. ৱুত্তনযমেৱাতি উপোসথক্খন্ধকে (মহাৱ. অট্ঠ. ১৬৯) ৱুত্তনযমেৱ.

২২২. পুন পৱাৰেতব্বন্তি এত্থ ন কেৱলং পৱাৰণাযেৱ পুন কাতব্বা, পুব্বকিচ্চাদীনিপি পুন কাতব্বানীতি দস্সেন্তো আহ ‘‘পুন পুব্বকিচ্চ’’ন্তিআদি.

২২৮. এসেৱ নযোতি ‘‘অজ্জ পৱাৰণা পন্নৰসী’’তি পুব্বকিচ্চং অতিদিসতি. অস্সাতি ৱচনস্স. ঞত্তিন্তি ‘‘সুণাতু মে ভন্তে সঙ্ঘো অজ্জ পৱাৰণা’’তি ঞত্তিং. পচ্ছিমেহীতি পচ্ছিমৱস্সং উপগতেহি ভিক্খূহি. উপোসথগ্গেতি উপোসথস্স গণ্হনট্ঠানে গেহে. দ্ৱে ঞত্তিযোতি পৱাৰণাঞত্তি চ উপোসথঞত্তি চাতি দ্ৱে ঞত্তিযো. ইদঞ্চাতি ইদং ৱক্খমানং পন. এত্থাতি পুৰিমিকপচ্ছিমিকভিক্খূনং সংসগ্গট্ঠানে. পুৰিমিকায উপগতেহীতি ৱিভত্তঅপাদানং অনুমেয্যৱিসযঅপাদানং, থোকতৰাতি সম্বন্ধো, সহাদিযোগো ৱা, সমসমাতি সম্বন্ধো. সমসমাতি সমেন, সমতো ৱা সমা সমসমা, অতিৰেকসমাতি অত্থো. কিঞ্চি ঊনং ৱা অধিকং ৱা নত্থীতি অধিপ্পাযো. ইতীতি ইদং লক্খণং.

সোতি পচ্ছিমিকো ভিক্খু. ইতৰেনাতি পচ্ছিমিকেন. তেসন্তি পুৰিমিকানং. একেনাতি পুৰিমিকেন. একস্সাতি পচ্ছিমিকস্স. পুন একেনাতি পচ্ছিমিকেন. ‘‘একস্সা’’তি অনুৱত্তেতব্বো, পুৰিমিকস্সাতি অত্থো. পুৰিমৱস্সূপগতেহি অধিকতৰাতি সম্বন্ধো. থোকতৰেহীতি পচ্ছিমৱস্সূপগতেহি থোকতৰেহি পুৰিমৱস্সূপগতেহীতি যোজনা.

কত্তিকাযাতি পচ্ছিমকত্তিকায. চাতুমাসিনিযা পৱাৰণাযাতি চতুন্নং মাসানং পূৰণিযা পৱাৰণায. পৱাৰণাঞত্তিং ঠপেত্ৱাতি সমসমা হুত্ৱাপি পৱাৰণাদিৱসত্তা পৱাৰণাঞত্তিং ঠপেত্ৱা. তেহীতি পচ্ছিমিকেহি. ইতৰেহীতি পুৰিমিকেহি. তেসন্তি পচ্ছিমিকানং. থোকতৰা ৱাতি একাদিনা থোকতৰা ৱা. তেসন্তি পুৰিমিকানং. তেহীতি পচ্ছিমিকেহি.

২৩৩. সঙ্ঘসামগ্গিযাতি এত্থ কীদিসী সঙ্ঘসামগ্গী ৱেদিতব্বাতি আহ ‘‘কোসম্বকসামগ্গীসদিসাৱ ৱেদিতব্বা’’তি. এত্থাতি সামগ্গীপৱাৰণাযং. অপ্পমত্তকেতি পত্তচীৱৰাদিং পটিচ্চ উপ্পন্নে অপ্পমত্তকে ৱিৱাদে. পৱাৰণাযমেৱাতি পৱাৰণাদিৱসেযেৱ. কস্মিং দিৱসে সামগ্গীপৱাৰণা কাতব্বাতি আহ ‘‘সামগ্গীপৱাৰণ’’ন্তিআদি. পঠমপৱাৰণন্তি পুব্বকত্তিকপুণ্ণমিং. যাৱ কত্তিকচাতুমাসিনী পুণ্ণমাতি অযং অৱধি অনভিৱিধিঅৱধি নাম. কস্মা? কত্তিকচাতুমাসিনিপুণ্ণমিং ঠপেত্ৱা অন্তোযেৱ গহেতব্বত্তা. এত্থন্তৰেতি এতস্মিং দ্ৱিন্নং পুণ্ণমিনমন্তৰে অট্ঠৱীসতিপমাণে দিৱসে কাতব্বা. ততোতি এত্থন্তৰসঙ্খাতা অট্ঠৱীসদিৱসতো.