১১২. পহিতেযেৱঅনুজাননকথা

১৯৯. ভিক্খুগতিকোতি ভিক্খু এৱ গতি পতিট্ঠা এতস্সাতি ভিক্খুগতিকোতি ৱুত্তে ভিক্খুনিস্সিতকো পুৰিসোতি আহ ‘‘ভিক্খূহি সদ্ধিং ৱসনকপুৰিসো’’তি. পলুজ্জতীতি ৱিনস্সতি. ভণ্ডং ছেদাপিতন্তি এত্থ ভণ্ডসদ্দো পৰিক্খাৰত্থো এৱ, ন মূলধনত্থোতি আহ ‘‘দব্বসম্ভাৰভণ্ড’’ন্তি. ছেদাপিতন্তি চুৰাদিগণিকধাতুং ‘‘ছিন্দাপিত’’ন্তি ৰুধাদিগণিকধাতুযা ৱণ্ণেতি. দজ্জাহন্তি একাৰলোপসন্ধীতি আহ ‘‘দজ্জে অহ’’ন্তি. ‘‘দজ্জেহ’’ন্তিপি পাঠো. এৱঞ্হি সতি অকাৰলোপসন্ধি. দজ্জেতি দদেয্যং, দদামি ৱা. সঙ্ঘকৰণীযেনাতি সঙ্ঘস্স কাতব্বেন কিচ্চেন. তমত্থং দস্সেন্তো আহ ‘‘যংকিঞ্চী’’তিআদি. তত্থ যংকিঞ্চি কাতব্বন্তি যোজনা. চেতিযছত্তৱেদিকাদীসূতি চেতিযস্স ছত্তে চ ৱেদিকায চ. আদিসদ্দেন সুধালিম্পাদযো সঙ্গণ্হাতি. তস্সাতি সঙ্ঘকৰণীযস্স. নিপ্ফাদনত্থং গন্তব্বন্তি সম্বন্ধো.

এত্থাতি ৱস্সূপনাযিকক্খন্ধকে. ‘‘অনিমন্তিতেনা’’তি পদং ‘‘গন্তু’’ন্তি পদে ভাৱকত্তা. গন্তুন্তি গমিতুং, গমনং ৱা ‘‘ন ৱট্টতী’’তি পদে কত্তা. পঠমংযেৱাতি ধম্মস্সৱনতো পঠমমেৱ. সন্নিপতিতব্বং ইতি কতিকা কতা হোতীতি যোজনা. ভণ্ডকন্তি চীৱৰাদিভণ্ডকং. গন্তুং ন ৱট্টতীতি সযমেৱ গন্তুং ন ৱট্টতীতি অত্থো দট্ঠব্বো. তেন ৱুত্তং ‘‘সচে পনা’’তিআদি. তত্থাতি তং ৱিহাৰং. ‘‘ৱট্টতী’’তি ইমিনা ৱস্সচ্ছেদো চ আপত্তি চ ন হোতীতি দস্সেতি. অত্থাযপীতি পিসদ্দেন ‘‘ভণ্ডকং ধোৱিস্সামী’’তি অত্থং অপেক্খতি. নন্তি অন্তেৱাসিকং. ৱট্টতীতি আচৰিযস্স আণায সত্তাহে অনতিক্কন্তে ৱট্টতি, ৱস্সচ্ছেদো চ আপত্তি চ ন হোতি. সত্তাহে অতিক্কন্তে ৱস্সচ্ছেদোৱ হোতি, ন আপত্তীতি অধিপ্পাযো.