১১৩. অন্তৰাযে অনাপত্তিৱস্সচ্ছেদকথা

২০১. অৱিদূৰেতি আসন্নে. তত্থাতি গামে. সত্তাহৱাৰেনাতি সত্তাহে একৱাৰেন. অৰুণো উট্ঠাপেতব্বোতি ৱিহাৰে অৰুণো উট্ঠাপেতব্বো. তত্ৰেৱাতি গামেযেৱ. মযন্তি ভিক্খূ সন্ধায ৱুত্তং. পুন মযন্তি মনুস্সে সন্ধায ৱুত্তং. তেসংযেৱাতি ৱস্সচ্ছেদভিক্খূনং এৱ. তন্তি সলাকভত্তাদিং. ৱস্সগ্গেনাতি ৱস্সগণনায.

ৱস্সাৱাসিকন্তি ৱস্সাৱাসানং দাতব্বং চীৱৰং. তত্থাতি তস্মিং ৱিহাৰে. যেসং পাপিতন্তি সম্বন্ধো. ৱিহাৰেতি ৱুট্ঠিতগামৱিহাৰে. উপনিক্খিত্তকং ভণ্ডন্তি সম্বন্ধো. ইধাতি ভিক্খুনো নিৱাসট্ঠানে. যং চীৱৰাদিৱেভঙ্গিযভণ্ডং অত্থি, তন্তি যোজনা. তত্থেৱাতি ৱুট্ঠিতগামৱিহাৰে এৱ. ইতোতি খেত্তৱত্থুআদিতো. কপ্পিযকাৰকানং হত্থেতি সম্বন্ধো. তত্ৰুপ্পাদেপীতি তস্স ৱিহাৰস্স দিন্নখেত্তৱত্থুআদিতো উপ্পাদে পচ্চযেপি. ‘‘তত্থেৱ গন্ত্ৱা অপলোকেত্ৱা ভাজেতব্ব’’ন্তি ৱচনস্স যুত্তিং দস্সেন্তো আহ ‘‘সঙ্ঘিকঞ্হী’’তিআদি. অন্তোৱিহাৰে ৱাতি অন্তোসীমায ৱা. উভযত্থাতি অন্তোসীমবহিসীম সঙ্খাতেসু দ্ৱীসু ঠানেসু ঠিতং ৱেভঙ্গিযভণ্ডন্তি সম্বন্ধো.