১১০. পঞ্চন্নং অপ্পহিতেপি অনুজাননকথা

১৯৩. পগেৱ পহিতেতি ইমিনা ‘‘অপহিতেপি গন্তব্ব’’ন্তি এত্থ পিসদ্দস্স সম্ভাৱনত্থং দস্সেতি. পঞ্চন্নং সহধম্মিকানং সন্তিকং গন্তব্বভাৱস্স কাৰণং ৱিভজিত্ৱা দস্সেন্তো আহ ‘‘ভিক্খু গিলানো হোতী’’তিআদি. দসহীতি ‘‘সঙ্ঘো কম্মং কত্তুকামো হোতি, কতং ৱা সঙ্ঘেন কম্মং হোতী’’তি ইদং অঙ্গং একং কত্ৱা দসহি. নৱহীতি পৰিৱাসাৰহং অপনেত্ৱা নৱহি. চতূহীতি গিলানঅনভিৰতিকুক্কুচ্চদিট্ঠিগতউপ্পন্নসঙ্খাতেহি চতূহি. ইতি ইমেহি ছহীতি যোজনা. সামণেৰস্সপি ছহীতি এত্থ ছন্নং সৰূপং ৱিত্থাৰেত্ৱা দস্সেন্তো আহ ‘‘আদিতো’’তিআদি. তং সুৱিঞ্ঞেয্যমেৱ. সামণেৰিযা সন্তিকং পঞ্চহি গন্তব্বন্তি যোজনা. পৰতোতি পৰস্মা, পৰস্মিং ৱা. অন্ধকট্ঠকথাযং ৱুত্তন্তি সম্বন্ধো. যে ঞাতকা ৱা যে অঞ্ঞাতকা ৱা অত্থি, তেসম্পীতি যোজনা. তন্তি ৱচনং.