১০৯. সত্তাহকৰণীযানুজাননকথা

১৮৭. সত্তাহকৰণীযেসু এৱং ৱিনিচ্ছযো ৱেদিতব্বোতি যোজনা. ‘‘সত্তাহকৰণীযেনা’’তি পদস্স সত্তমীসমাসঞ্চ অনীযসদ্দস্স কম্মত্থঞ্চ দস্সেন্তো আহ ‘‘সত্তাহব্ভন্তৰে যং কত্তব্ব’’ন্তি. তত্থ ‘‘সত্তাহব্ভন্তৰে’’তি ইমিনা সত্তমীসমাসং দস্সেতি, ‘‘কত্তব্ব’’ন্তি ইমিনা কম্মত্থং. ‘‘সত্তাহব্ভন্তৰে’’তি ইমিনা সত্তাহস্স অব্ভন্তৰং সত্তাহন্তি উত্তৰপদলোপং দস্সেতি. পহিতে গন্তুন্তি এত্থ পহিতেসদ্দস্স কত্তুকম্মানি দস্সেতুং ৱুত্তং ‘‘ভিক্খুআদীহি দূতে’’তি. তত্থ ‘‘ভিক্খুআদীহী’’তি ইমিনা কত্তাৰং দস্সেতি, ‘‘দূতে’’তি ইমিনা কম্মং. সত্তাহন্তি এত্থ উত্তৰপদলোপঞ্চ ভুম্মত্থে উপযোগৱচনঞ্চ দস্সেন্তো আহ ‘‘অন্তোসত্তাহেযেৱা’’তি. তত্থেৱাতি তস্মিং পহিতট্ঠানেযেৱ. ‘‘ন উট্ঠাপেতব্বো’’তি ইমিনা ‘‘সত্তাহেযেৱা’’তি এত্থ এৱসদ্দস্স ফলং দস্সেতি.

১৮৯. ৰসো এতস্মিং অত্থীতি ৰসৱতীতি ৱুত্তে ভত্তগেহং গহেতব্বন্তি আহ ‘‘ভত্তগেহং ৱুচ্চতী’’তি. ভত্তগেহন্তি ভত্তপচনগেহং. পুৰাযং সুত্তন্তোতি এত্থ পুৰা অযন্তি পদচ্ছেদং কত্ৱা পুৰাসদ্দো যাৱপৰিযাযোতি আহ ‘‘যাৱ অযং সুত্তন্তো’’তি. ন পলুজ্জতীতি এত্থ লুজধাতু ৱিনাসত্থোতি আহ ‘‘ন ৱিনস্সতী’’তি. পৰিসঙ্খতন্তি পৰিসঙ্খৰিতব্বং. সব্বত্থাতি সব্বেসু পহিতেসু. ইমিনাৱ কপ্পিযৱচনেনাতি ইমিনা এৱ কপ্পিযেন তিৱাক্যসঙ্খাতেন ৱচনেন. এতেসন্তি এতেসং তিণ্ণং ৱাক্যানং. ৱেৱচনেনাতি ‘‘যঞ্ঞঞ্চ যজিতুং, সুত্তঞ্চ উগ্গণ্হিতুং, সমণে চ দস্সিতু’’ন্তি পৰিযাযেন. সত্তসূতি উপাসক উপাসিক ভিক্খুভিক্খুনী সিক্খমান সামণেৰ সামণেৰী সঙ্খাতাসু সত্তসু.