১০৮. ৱস্সানেচাৰিকাপটিক্খেপাদিকথা

১৮৫. আপত্তি ৱেদিতব্বাতি অনপেক্খগমনেন উপচাৰাতিক্কমে সাপেক্খগমনেন অঞ্ঞত্থ অৰুণুট্ঠাপনে আপত্তি ৱেদিতব্বা. ৱিহাৰগণনায আপত্তিযো ৱেদিতব্বাতি এত্থ ৱস্সূপনাযিকদিৱসে ৱস্সং অনুপগন্তুকামতাচিত্তেন ৱিহাৰং অতিক্কমেয্য, ৱিহাৰগণনায আপত্তিযো ৱেদিতব্বা. তমেৱত্থং ৱিত্থাৰেন্তো আহ ‘‘সচে হী’’তিআদি. তং দিৱসন্তি তস্মিং ৱস্সূপগমনদিৱসে. সতং আপত্তিযোতি এত্থ সতন্তি সঙ্খ্যাপধানত্তা একৱচনন্তি সদ্দসত্থেসু ৱুত্তং. একা এৱ আপত্তীতি অত্তনো ৱিহাৰস্স অতিক্কমনেযেৱ একা এৱ আপত্তি. কেনচি অন্তৰাযেন অনুপগতেনাতি সম্বন্ধো.

ৱস্সনামো ইমস্সত্থীতি ৱস্সোতি ৱচনত্থং দস্সেন্তো আহ ‘‘ৱস্সনামক’’ন্তি. ‘‘পঠমং মাস’’ন্তি ইমিনা অঞ্ঞপদস্স সৰূপং দস্সেতি. পঠমং মাসন্তি চতূসু ৱস্সমাসেসু পঠমং মাসং. উক্কড্ঢিতুকামোতি উপৰি কড্ঢিতুকামো. আসড়্হীমাসমেৱ, ন সাৱণমাসন্তি অত্থো. জুণ্হসদ্দো চন্দপভাযুত্তো মাসোতি আহ ‘‘মাসে’’তি. চন্দপভাযুত্তো মাসোতি আহ ‘‘মাসে’’তি. চন্দপভাযুত্তো হি মাসো জোততি দিপ্পতীতি জুণ্হোতি ৱুচ্চতি. তস্মা ‘‘মাসে’’তি সামঞ্ঞতো ৱুত্তেপি পুণ্ণমিযুত্তো মাসোৱ গহেতব্বো. কাচি পৰিহানি নামাতি কিঞ্চি সীলাদীনং হাযনং নাম. অঞ্ঞস্মিম্পীতি ৱস্সূপগমনতো অঞ্ঞস্মিম্পি. ধম্মিকেতি ধম্মেন যুত্তে.