১০৭. ৱস্সূপনাযিকানুজাননকথা

১৮৪. ৱস্সূপনাযিকক্খন্ধকে ‘‘অননুঞ্ঞাতো’’তি ইমিনা অপঞ্ঞত্তোতি এত্থ ঞাধাতুযা অনুজাননত্থং দস্সেতি, ‘‘অসংৱিহিতো’’তি ইমিনা ঞাধাতুযা ঠপনত্থং. তেধাতি তে ইধ. ইধসদ্দো সাসনঞ্চ লোকঞ্চ দেসঞ্চ পদপূৰণঞ্চ উপাদায ৱত্ততি, ইধ পন পদপূৰণেতি দস্সেন্তো আহ ‘‘ইধসদ্দো নিপাতমত্তো’’তি. সংহননং সঙ্ঘাতো, ৱিনাসোতি অত্থো. ইতি ইমমত্থং দস্সেতি ‘‘ৱিনাস’’ন্তি ইমিনা. সকুন্তকসদ্দো সকুণপৰিযাযোতি আহ ‘‘সকুণা’’তি. সকুণাতি চ ৱিহঙ্গমা. তে হি আকাসে গন্তুং সক্কোন্তীতি সকুণাতি ৱুচ্চন্তি. সংকসাযিস্সন্তীতি এত্থ ‘‘সং কসে অচ্ছনে’’তি ধাতুপাঠেসু (সদ্দনীতিধাতুমালাযং ১৬ সকাৰন্তধাতু) ৱুত্তত্তা সংপুব্বো কসেধাতু অচ্ছনত্থোতি আহ ‘‘ৱসিস্সন্তী’’তি. একাৰন্তোযং ধাতু. নিবদ্ধৱাসন্তি নিচ্চৱাসং. ৱস্সাননামকেতি ৱস্সানউতুনামকে. ৱস্সানস্স চতুমাসত্তা ‘‘তেমাসে’’তি ৱুত্তং. ৱস্সূপনাযিকাতি এত্থ নীধাতু গমনত্থোতি আহ ‘‘ৱস্সূপগমনানী’’তি. অপৰজ্জূতি পুণ্ণমিতো অপৰং অহন্তি অপৰজ্জু, অহত্থে জ্জুপচ্চযো, অত্থতো পাটিপদদিৱসো. অযং অপৰজ্জুসদ্দো পঠমন্তনিপাতো. অস্সাতি আসড়্হীপুণ্ণমিযা. অসমানাধিকৰণৱিসযো বাহিৰত্থসমাসোযং, অতিক্কন্তায সতিযাতি যোজনা. অপৰস্মিং দিৱসেতি পাটিপদদিৱসে. অস্সাতি সাৱণমাসপুণ্ণমিযা. তস্মাতি যস্মা চ অপৰজ্জুগতা, যস্মা চ মাসগতা, তস্মা. ‘‘অনন্তৰে পাটিপদদিৱসে’’তি ইমিনা পাড়িযং অপৰজ্জুগতায আসড়্হিযা অনন্তৰে পাটিপদদিৱসে পুৰিমিকা উপগন্তব্বাতি অত্থং দস্সেতি. আসড়্হিযাতি আসড়্হীপুণ্ণমিযা. পচ্ছিমনযেপি মাসগতায আসড়্হিযা অনন্তৰে পাটিপদদিৱসে পচ্ছিমিকা উপগন্তব্বাতি অত্থো দট্ঠব্বো. আসড়্হিযাতি আসড়্হীপুণ্ণমিযা সমীপে পৱত্তত্তা আসড়্হীসঙ্খাতায সাৱণপুণ্ণমিযাতি অত্থো. পাটিপদদিৱসেযেৱ ৱস্সং উপগন্তব্বন্তি সম্বন্ধো. সকিং ৱাতিআদীসু ৱাসদ্দো অনিযমৱিকপ্পত্থো. নিচ্ছাৰেত্ৱাতি নিচ্চাৰেত্ৱা, উচ্চাৰেত্ৱাতি অত্থো. অফুট্ঠক্খৰসঞ্ঞোগেহি পৰো ক্ৱচি ফুট্ঠত্তমাপজ্জতি ‘‘নিক্খমতী’’তিআদীসু ৱিয. তস্মা পৰস্স চকাৰস্স ছকাৰং কত্ৱা ‘‘নিচ্ছাৰেত্ৱা’’তি ৱুত্তং.