৮৮. ছন্দদানকথা

১৬৫. ছন্দদানেপি ৱিনিচ্ছযো ৱেদিতব্বোতি যোজনা. উপোসথো কতো হোতীতি পাৰিসুদ্ধিদাযকস্স চ সঙ্ঘস্স চ উপোসথো কতো হোতি. অঞ্ঞন্তি উপোসথকম্মতো অঞ্ঞং. যং পন কম্মন্তি সম্বন্ধো. কম্মম্পীতি উপোসথকম্মতো অঞ্ঞং কম্মম্পি. এত্থ চ তদহুপোসথে অত্তনো চ সঙ্ঘস্স চ সচে উপোসথকম্মং হোতি, পাৰিসুদ্ধিযেৱ দাতব্বা. অথ অঞ্ঞং কম্মং হোতি, ছন্দোযেৱ দাতব্বো. যদি উপোসথকম্মঞ্চ অঞ্ঞকম্মঞ্চ হোতি, পাৰিসুদ্ধি চ ছন্দো চ দাতব্বো. তং সন্ধায ৱুত্তং ‘‘তদহুপোসথে পাৰিসুদ্ধিং দেন্তেন ছন্দম্পি দাতু’’ন্তি. সীমায ৱাতি বদ্ধসীমায ৱা. অচ্ছিতুন্তি উপৱেসিতুং. ‘‘আস উপৱেসনে’’তি হি ধাতুপাঠেসু (সদ্দনীতিধাতুমালাযং ১৬ সকাৰন্তধাতু) ৱুত্তং. সামগ্গী ৱাতি কাযসামগ্গী ৱা.

১৬৭. সৰতিপি উপোসথং, নপি সৰতীতি এত্থ পিসদ্দস্স অনিযমৱিকপ্পত্থং দস্সেতুং ৱুত্তং ‘‘একদা সৰতি, একদা ন সৰতী’’তি. ‘‘একন্ত’’ন্তি ইমিনা নেৱ সৰতীতি এত্থ এৱসদ্দস্স সন্নিট্ঠানত্থং দস্সেতি. কম্মং ন কোপেতীতি সম্মুতিলদ্ধোপি অলদ্ধোপি উম্মত্তকো কম্মং ন কোপেতি.