১০০. সীমোক্কন্তিকপেয্যালকথা

১৭৭. আৱাসিকেনআগন্তুকপেয্যালে সব্বং ৱেদিতব্বন্তি সম্বন্ধো. ৱেদিতব্বাকাৰং সহ উপমায দস্সেন্তো আহ ‘‘যথা’’তিআদি. আগন্তুকেনআৱাসিকপেয্যালে পন আনেতব্বন্তি সম্বন্ধো. পুৰিমপেয্যালেতি আৱাসিকেনআগন্তুকপেয্যালে. আগন্তুকেনআগন্তুকপেয্যালে পন যোজেতব্বোতি সম্বন্ধো. এত্থ চ পেয্যালন্তি সদিসনযস্স চ তংজাননঞাণস্স চ পাতব্বং ৰক্খনং পেয্যং, পেয্যং, পেয্যে ৱা, পেয্যায ৱা অলতি সমত্থেতীতি পেয্যালন্তি ৱচনত্থো কাতব্বো.

১৭৮. আৱাসিকানং চাতুদ্দসো হুত্ৱা কস্মা আগন্তুকানং পন্নৰসোতি আহ ‘‘যেস’’ন্তিআদি. তত্থ যেসন্তি আগন্তুকানং. তিৰোৰট্ঠতোতি আৱাসিকানং ৰট্ঠস্স অঞ্ঞৰট্ঠতো. তিৰোজনপদতোতি একৰট্ঠেপি অঞ্ঞজনপদতো. চাতুদ্দসিকং অকংসূতি সঞ্ঞানানত্তৱসেন চাতুদ্দসিকং অকংসু. অনুৱত্তিতব্বন্তি অনুমতিং ৱত্তিতব্বং. ন পটিক্কোসিতব্বন্তি ‘‘ন চাতুদ্দসো’’তি ৱত্ৱা ন ৱাৰিতব্বং. ন অকামাতি এত্থ কমুধাতু ইচ্ছত্থো, কৰণত্থে চ নিস্সক্কৱচনন্তি আহ ‘‘ন অনিচ্ছায দাতব্বা’’তি.