৬৪. চত্তাৰোনিস্সযাদিকথা

১২৮. উপসম্পন্নসমনন্তৰমেৱাতি উপসম্পন্নো হুত্ৱা সমনন্তৰমেৱ, ন কালন্তৰেতি অত্থো. একপোৰিসাতি এত্থ পোৰিসসদ্দো উপৰি ৱিত্থতে ভুজপমাণে চ পোসপমাণে চ ৱত্ততি. পুৰিসস্স পমাণা পোৰিসা, পমাণত্থে ণপচ্চযো. ছাযাতি আতপাভাৱো. মেতব্বাতি পমেতব্বা. ‘‘ৱস্সানো’’তিআদি ‘‘উতুপমাণং আচিক্খিতব্ব’’ন্তি এত্থ আচিক্খণাকাৰদস্সনং. উতুনো পমাণন্তি অত্থং নিৱাৰেন্তো আহ ‘‘এত্থ চা’’তিআদি. অৰতি পুনপ্পুনং গচ্ছতীতি উতু, পমিযতি সংৱচ্ছৰো পৰিচ্ছিজ্জিযতি অনেনাতি পমাণং. যত্তকেহি দিৱসেহি অপৰিপুণ্ণোতি সম্বন্ধো. যস্সাতি দিৱসভাগস্স. যো উতু অপৰিপুণ্ণো, তস্স উতুনোতি পাঠসেসো যোজেতব্বো. ‘‘উতুপমাণং আচিক্খিতব্বং, দিৱসভাগো আচিক্খিতব্বো’’তি পদানং অপৰম্পি অত্থৱিকপ্পং দস্সেন্তো আহ ‘‘অথ ৱা’’তিআদি. তত্থ অযং নাম উতূতি অযং উতু ৱস্সানো নামাতি ৱা হেমন্তো নামাতি ৱা গিম্হো নামাতি ৱা. পুব্বন্হোতি অহস্স পুব্বো পুব্বন্হো. তত্থ পচ্ছিমনযোৱ পাসংসতৰো. কস্মা? পুৰিমনযে উতুপৰিপুণ্ণে দিৱসভাগাচিক্খণস্স অভাৱা, পচ্ছিমনযে পন পৰিপুণ্ণং ৱা অপৰিপুণ্ণং ৱা উতুপমাণং আচিক্খিতব্বং. উপসম্পন্নদিৱসভাগোৱ ‘‘পুব্বন্হো’’তি ৱা ‘‘সাযন্হো’’তি ৱা আচিক্খিতব্বো. সংগীতীতি এত্থ সং একতো কত্ৱা গাযিতব্বা কথেতব্বাতি সংগীতীতি ৱচনত্থং দস্সেন্তো আহ ‘‘ইদমেৱ সব্বং একতো কত্ৱা’’তিআদি. তত্থ কিন্তি কিং উতুং. ইদং নামাতি ইদং নাম উতুং. ৱদেয্যাসীতি আগন্তুকানং ৱুড্ঢনৱকভাৱাদিঞাপনত্থং কথেয্যাসি.

১২৯. দুতিযন্তি সহাযং ভিক্খুং ৱা সামণেৰং ৱা পুৰিসং ৱা. অকৰণীযানীতি উপসম্পন্নেহি অকত্তব্বানি. পণ্ডুপলাসোতি এত্থ পণ্ডূতি সেতপীতমিস্সো ৱণ্ণো, পলাসসদ্দো পণ্ণৱাচকো, ন হৰিতৱাচকো, নাপি কিংসুকদুমৱাচকোতি দস্সেন্তো আহ ‘‘পণ্ডুৱণ্ণো পণ্ণো’’তি. পণ্ডুপলাসোতি সমাসোপি ব্যাসোপি যুত্তোযেৱ. সমাসকালে পণ্ডু যস্সত্থীতি পণ্ডু, সোযেৱ পলাসো পণ্ডুপলাসোতি কাতব্বো. পুপ্ফফলাদিং বন্ধতীতি বন্ধনন্তি ৱচনত্থেন বন্ধনসদ্দো ৱণ্টপৰিযাযোতি আহ ‘‘ৱণ্টতো’’তি. পুথুসিলাতি (ম. নি. অট্ঠ. ৩.৬০) এত্থ পুথুসদ্দো মহন্তপৰিযাযোতি আহ ‘‘মহাসিলা’’তি.

১৩০. তস্সাতি উক্খেপনীযকম্মাৰহস্স ভিক্খুনো. সামগ্গীতি সঙ্ঘসামগ্গী. তেনাতি উক্খেপনীযকম্মাৰহেন ভিক্খুনা. সম্ভোগেতি আমিসেন চ ধম্মেন চ সম্ভোগহেতু. এত্থ সহসেয্যাপি সঙ্গহিতা আপত্তিভাৱতো. অনাপত্তীতি অনুক্খিত্তকভাৱতো পাচিত্তিযাপত্তিযা অনাপত্তি, অলজ্জিলক্খণাভাৱতো দুক্কটেন অনাপত্তীতি দট্ঠব্বং.

ইতি সমন্তপাসাদিকায ৱিনযসংৱণ্ণনায

দ্ৱাসত্ততিঅধিকৱত্থুসতপটিমণ্ডিতস্স মহাখন্ধকস্স

অত্থৱণ্ণনায যোজনা সমত্তা.