৫৬. অপত্তকাদিৱত্থুকথা

১১৮. যো পিণ্ডো হত্থেসু লব্ভতীতি যোজনা. তদত্থাযাতি তস্স পিণ্ডস্স অত্থায. সেয্যথাপি তিত্থিযাতি এত্থ সেয্যথাপিসদ্দো উপমত্থো, তিত্থিযসদ্দো আজীৱকনামকে তিত্থিযে হোতীতি দস্সেন্তো আহ ‘‘যথাপি আজীৱকনামকা তিত্থিযা’’তি. তস্মা আজীৱকসঙ্খাতে তিত্থিযে উপমং কত্ৱা উজ্ঝাযন্তীতি আহ ‘‘সূপব্যঞ্জনেহী’’তিআদি. হীতি সচ্চং, যস্মা ৱা. তেতি আজীৱকা. কম্মং পন ন কুপ্পতীতি পত্তচীৱৰেসু অসন্তেসুপি কম্মৱাচায ‘‘পৰিপুণ্ণস্স পত্তচীৱৰ’’ন্তি পৰিকিত্তিতত্তা কম্মং ন কুপ্পতীতি অধিপ্পাযো.

যাচিতকেনাতি এত্থ যাচিতো হুত্ৱা গহিতো যাচিতকোতি দস্সেন্তো আহ ‘‘যাচিত্ৱা গহিতেনা’’তি. ‘‘ঈদিসেন হী’’তিআদিনা দোসং দস্সেতি. তস্মাতি যস্মা আপত্তি হোতি, তস্মা. তস্সাতি উপসম্পদাপেক্খস্স. নিৰপেক্খেহি আচৰিযুপজ্ঝাযাদীহীতি যোজনা. নিস্সজ্জিত্ৱাতি ব্ৰহ্মদেয্যেন নিস্সজ্জিত্ৱা. অনধিট্ঠানুপগানং পত্তচীৱৰানং অপত্তচীৱৰত্তা ৱুত্তং ‘‘অধিট্ঠানুপগং পত্তচীৱৰ’’ন্তি. পণ্ডুপলাসন্তি সমণুদ্দেসভাৱাপেক্খং. সো হি ৰূড়্হিৱসেন পণ্ডুপলাসোতি ৱুচ্চতি. অথ ৱা যথা পণ্ডুপলাসো ন হৰিতো, নাপি সুক্খো হোতি, এৱং সোপি পব্বজাপেক্খো ন গিহী হোতি, নাপি সামণেৰো, তস্মা সমণুদ্দেসভাৱাপেক্খো ‘‘পণ্ডুপলাসো’’তি ৱুচ্চতি.

ৱসন্তস্স পণ্ডুপলাসস্সাতি সম্বন্ধো. অনামট্ঠপিণ্ডপাতন্তি ভিক্খূহি অনামসিতব্বগ্গং পিণ্ডপাতং. সামণেৰভাগসমকোতি সামণেৰেহি লদ্ধেন ভাগেন সমং পৱত্তো. অস্সাতি পণ্ডুপলাসস্স. সামণেৰস্স সব্বং পটিজগ্গনকম্মং কাতুং ৱট্টতি ৱিয, অস্স কাতুং ৱট্টতীতি যোজনা.