৪৯. তিৰচ্ছানগতৱত্থু

১১১. দেৱসম্পত্তিসদিসং ইস্সৰিযসম্পত্তিং অনুভৱন্তোপি সো নাগো কস্মা নাগযোনিযা অট্টীযতীতি আহ ‘‘কিঞ্চাপী’’তিআদি.

তত্থ কিঞ্চাপি অনুভোতীতি সম্বন্ধো. কিঞ্চাপিসদ্দো হেত্থ সম্ভাৱনাজোতকো, পনসদ্দো গৰহত্থজোতকো. কুসলৱিপাকেনাতি অহেতুককুসলৱিপাকেন. তস্সাতি নাগস্স. সজাতিযাতি সমানজাতিযা নাগিযা. উদকসঞ্চাৰিমণ্ডূকভক্খন্তি উদকে সঞ্চৰণসীলং মণ্ডূকসঙ্খাতং ভক্খং পাতুভৱতীতি যোজনা. সোতি নাগো. অট্টীযতীতি অৰমণং পীড়িযতি. হৰাযতীতি এত্থ হৰেধাতু লজ্জনত্থোতি আহ ‘‘লজ্জতী’’তি. একাৰন্তো ধাতু ভূৱাদিগণিকো (সদ্দনীতিধাতুমালাযং ১৬ ৰকাৰন্তধাতু). জিগুচ্ছতীতি এত্থ গুপধাতুযা কম্মং দস্সেন্তো আহ ‘‘অত্তভাৱ’’ন্তি. ‘‘তস্স ভিক্খুনো’’তিপদস্স ‘‘নিক্খন্তে’’তিপদেন যোজিতব্বত্তা ভুম্মত্থে সামিৱচনন্তি আহ ‘‘তস্মিং ভিক্খুস্মি’’ন্তি. অথ ৱা তস্স ভিক্খুনোতি সামিযোগত্তা ‘‘নিক্খন্তে’’তি এত্থ ভাৱত্থে মানপচ্চযোতি আহ ‘‘নিক্খমনে’’তি. ইমিনা নিক্খন্তেতি এত্থ ন অন্তপচ্চযো, মানপচ্চযস্সেৱ অন্তভাৱং কত্ৱা ৱুত্তোতি দস্সেতি. ৱিস্সট্ঠোতি সতিৱিস্সজ্জিতো. তস্মিন্তি ভিক্খুম্হি. কপিমিদ্ধৱসেনেৱাতি কপিনো মিদ্ধৱসেন এৱ. অথ ৱা কপিমিদ্ধৱসেন নিদ্দাযন্তো ইৱ নিদ্দাযন্তোতি যোজনা. পটিনিপজ্জীতি পুন নিপজ্জি. ৱিস্সৰমকাসীতি এত্থ ৱিসদ্দো ৱিৰূপত্থজোতকো, সৰসদ্দো সদ্দৱাচকোতি দস্সেন্তো আহ ‘‘ৱিৰূপং মহাসদ্দমকাসী’’তি.

‘‘অকাৰস্স লোপং কত্ৱা’’তি ইমিনা তুম্হে খোত্থাতি এত্থ ‘‘তুম্হে খো অত্থা’’তি পদৱিভাগং কত্ৱা ওকাৰতো পৰস্স অকাৰস্স লোপং দস্সেতি. ‘‘অকাৰস্সালোপ’’ন্তিপি পাঠো. এৱঞ্হি সতি অকাৰস্স অলোপং কত্ৱাতি অত্থো দট্ঠব্বো. ইমিনা ‘‘তুম্হে খো অত্থা’’তি পদচ্ছেদং কত্ৱা অকাৰে পৰে ওকাৰস্স ৱকাৰং কত্ৱা তুম্হে খ্ৱত্থা’’তি পাঠো দস্সিতো. কস্মা ইমস্মিং ধম্মৱিনযে অৱিৰূড়্হিধম্মাতি আহ ‘‘ঝান…পে… অভব্বত্তা’’তি. ‘‘ভৱথা’’তি ইমিনা অত্থাতি এত্থ অসধাতু সত্তত্থৱাচকো থৱিভত্তীতি দস্সেতি. সজাতিযাতি এত্থ সমানা জাতি এতিস্সাতি সজাতীতি ৱুত্তে নাগী এৱাতি আহ ‘‘নাগিযা এৱা’’তি. মনুস্সিত্থিআদীতি এত্থ আদিসদ্দেন তিৰচ্ছানগতিত্থীপেতিত্থীদেৱিত্থিযো সঙ্গণ্হাতি. ‘‘দ্ৱেমে ভিক্খৱে পচ্চযা’’তি দেসনা সাৱসেসদেসনাতি দস্সেন্তো আহ ‘‘এত্থ চা’’তি. এত্থাতি তিৰচ্ছানগতৱত্থুম্হি. অভিণ্হন্তি অভিক্খণং পুনপ্পুনন্তি অত্থো.

তিৰচ্ছানগতোতি এত্থ কিং অপাযপৰিযাপন্নো দুগ্গতিঅহেতুকপটিসন্ধিকোৱাধিপ্পেতোতি আহ ‘‘নাগো ৱা হোতূ’’তিআদি.