৫০. মাতুঘাতকাদিৱত্থুকথা

১১২. নিক্খন্তিন্তি এত্থ ‘‘ইমস্স পাপকম্মস্সা’’তি ছট্ঠীযোগত্তা ভাৱত্থে তিপচ্চযোতি আহ ‘‘নিক্খমন’’ন্তি. অপৱাহনন্তি অপাযপটিসন্ধিৱহনতো অপগমনং. যেনাতি মনুস্সভূতেন যেন জীৱিতা ৱোৰোপিতাতি সম্বন্ধো. মনুস্সিত্থিভূতাতি মনুস্সিত্থী হুত্ৱা ভূতা, মনুস্সিত্থীভাৱং ৱা ভূতা পত্তা. ইমিনা তিৰচ্ছানগতিত্থিআদযো নিৱত্তেতি. ‘‘জনিকা’’তি ইমিনা পোসাৱনিকমাতাদযো নিৱত্তেতি. সযম্পীতি এত্থ পিসদ্দো ন কেৱলং মাতাযেৱ, অথ খো পুত্তেনাপীতি দস্সেতি. সতাতি সন্তেন. মনুস্সজাতিকেনেৱ সতা মনুস্সজাতিকো এৱ হুত্ৱা ৱোৰোপিতাতি যোজনা. অনন্তৰে ভৱে ফলং নিব্বত্তেতীতি আনন্তৰিযং, মাতুঘাতককম্মং, তেন জাতিসামঞ্ঞম্পি অজনিকং ঘাতেন্তো চ জনিকম্পি জাতিভেদং ঘাতেন্তো চ ন অনন্তৰিকো হোতি, তস্স পব্বজ্জা চ উপসম্পদা চ ন ৱাৰিতাতি দস্সেন্তো আহ ‘‘যেন পনা’’তিআদি. তত্থ পোসেতি ৱদ্ধেতীতি পোসাপনিযা, সা এৱ পোসাৱনিকা পকাৰস্স ৱকাৰং, যকাৰস্স চ ককাৰং কত্ৱা, পোসাৱনিকা চ সা মাতা চেতি পোসাৱনিকমাতা. অস্সাতি পুত্তস্স. ইদং পদং পুব্বাপৰাপেক্খং. তত্থ পুব্বপদে ভাৱসম্বন্ধো, পচ্ছিমপদে সামিসম্বন্ধো. সব্বথা এসেৱ নযো হোতীতি আহ ‘‘সচেপী’’তিআদি. ৱেসিযাতি উপলক্খণৱসেন ৱুত্তং. যায কাযচি ইত্থিযা পুত্তস্সাপি গহেতব্বত্তা. ‘‘অযং মে পিতা’’তি অজাননমেৱ হি পমাণং. অনেনাতি ইমিনা পুত্তেন. ‘‘পিতুঘাতকোত্ৱেৱ সঙ্খ্যং গচ্ছতী’’তি ইমিনা মাতুঘাতকেপি ‘‘অযং মে মাতা’’তি অজানিত্ৱা ঘাতেন্তোপি মাতুঘাতকোত্ৱেৱ সঙ্খ্যং গচ্ছতীতি দস্সেতি.

১১৪. সঙ্খেপেন ৱুত্তমত্থং ৱিত্থাৰেন দস্সেন্তো আহ ‘‘মনুস্সজাতিযং হী’’তিআদি. অপব্বজিতন্তি গিহিভূতং. পব্বজ্জা চস্সাতি এত্থ চসদ্দেন উপসম্পদাপি ৱাৰিতাতি দস্সেতি. অস্সাতি অৰহন্তঘাতকস্স. অৱসেসন্তি অৰহন্ততো অৱসেসং. অস্সাতি অৰিযঘাতকস্স. আনন্তৰিযো ন হোতি তিৰচ্ছানগতত্তা পনস্স পব্বজ্জা ৱাৰিতাতি অত্থো নেতব্বো. এত্থাতি মাতুঘাতকাদিকম্মেসু. ৱধাযাতি তদত্থে চতুত্থীতি আহ ‘‘ৱধত্থাযা’’তি. ‘‘মাৰেতু’’ন্তি ইমিনা ‘‘ৱধত্থাযা’’তি এত্থ হনধাতু হিংসনত্থোতি দস্সেতি. ‘‘নীযন্তী’’তি ইমিনা ওনীযন্তীতি এত্থ ওত্যূপসগ্গো ধাত্ৱত্থানুৱত্তকোতি দস্সেতি. যং পন ৱচনং ৱুত্তন্তি সম্বন্ধো. তস্স ৱচনস্স অত্থোতি যোজনা. ‘‘সচা চ ইতি অযং নিপাতো ৱুত্তো’’তি ইমিনা ভযপীড়িতত্তা চ নিৰুত্তীসু অকুসলত্তা চ দৱাভণনেন ৰৱাভণনেন অযং নিপাতো চোৰেহি ৱুত্তোতি দস্সেতি. ‘‘সচে চ ইচ্চেৱ ৱা পাঠো’’তি ইমিনা তেহি তথা ৱুত্তেপি সঙ্গীতিকালে ৱা পোত্থকাৰূড়্হকালে ৱা যথাভূতং সঙ্গীতত্তা, পোত্থকাৰূড়্হত্তা চ যথাভূতো পাঠো অত্থীতি দস্সেতি. তত্থাতি তেসু পদেসু. নিদ্ধাৰণে ভুম্মং. তস্সাতি ‘‘সচজ্জ ময’’ন্তি পাঠস্স. ‘‘সচে অজ্জ ময’’ন্তি ইমিনা একাৰলোপসন্ধিং দস্সেতি. ‘‘সচেজ্জ ময’’ন্তি অকাৰলোপসন্ধিনাপি পাঠো অত্থি.

১১৫. পকতত্তন্তি পকতিযা সীলসঙ্খাতো অত্তা সভাৱো এতিস্সাতি পকতত্তা, তং. কাযসংসগ্গেন ভিক্খুনীনং পাৰাজিকত্তা ৱুত্তং ‘‘সীলৱিনাসং পাপেতী’’তি. অনিচ্ছমানংযেৱ ভিক্খুনিন্তি সম্বন্ধো.

ইচ্ছমানন্তি ওদাতৱত্থৱসনং ইচ্ছমানং. যস্মা অভিক্খুনী হোতি, তস্মা ভিক্খুনীদূসকো ন হোতীতি যোজনা. সীলৱিপন্নং ভিক্খুনিন্তি সম্বন্ধো.

যো দেৱদত্তো সঙ্ঘং ভিন্দতি ৱিয, ভিন্দতীতি যোজনা. উদ্ধম্মন্তি ধম্মতো ৱিৰহিতং. উব্বিনযন্তি ৱিনযতো ৱিৰহিতং. চতুন্নং কম্মানন্তি অপলোকনাদীনং চতুন্নং কম্মানং.

যো দেৱদত্তো লোহিতং উপ্পাদেতি ৱিয, উপ্পাদেতীতি যোজনা. দুট্ঠচিত্তেনাতি এত্থ ন যংকিঞ্চি দুট্ঠচিত্তং দুট্ঠচিত্তং নাম, অথ খো ৱধকচিত্তন্তি আহ ‘‘ৱধকচিত্তেনা’’তি. সৰীৰেতি সৰীৰব্ভন্তৰে. তথাগতস্স হি অভেজ্জকাযত্তা পৰূপক্কমেন চম্মচ্ছেদং কত্ৱা লোহিতস্স উপ্পাদনং নাম নত্থি. যো পন জীৱকো ফাসুং কৰোতি ৱিয, ফাসুং কৰোতীতি যোজনা. লোহিতঞ্চাতি পূতিলোহিতঞ্চ.