৪৩. অনাপুচ্ছাৱৰণৱত্থুআদিকথা

১০৮. উপজ্ঝাযং অনাপুচ্ছাতি এত্থ উপজ্ঝাযং অনাপুচ্ছিত্ৱা. সব্বথা কিং ন কাতব্বন্তি আহ ‘‘তুম্হাক’’ন্তিআদি. দণ্ডকম্মমস্সাতি দণ্ডকম্মং অস্স. অস্সাতি সামণেৰস্স. সদ্ধিং উপজ্ঝাযেন ৱিহৰন্তীতি সদ্ধিৱিহাৰিকা. নিস্সযাচৰিযাদীনং অন্তে সমীপে ৱসন্তীতি অন্তেৱাসিকা, উপসম্পন্নাযেৱ.

অপলাড়েন্তীতি এত্থ লড় উপসেৱাযন্তি ধাতুপাঠেসু ৱুত্তত্তা (সদ্দনীতিধাতুমালাযং ১৮ ড়কাৰন্তধাতু) থেৰে লড়তো উপসেৱতো অপগমেন্তীতি অত্থো দট্ঠব্বো. ইধ পন অধিপ্পাযত্থং দস্সেন্তো আহ ‘‘তুম্হাক’’ন্তিআদি. অপলাড়েতব্বাতি অঞ্ঞং লড়তো উপসেৱতো অপগমেতব্বা. পৰিসভূতে সামণেৰূপসম্পন্নেতি যোজনা. আদীনৱন্তি দুস্সীলং নিস্সায ৱসনস্স দোসং. ন্হাযিতুং আগতেন তযা গূথমক্খনং কতং ৱিয দুস্সীলং নিস্সায ৱিহৰন্তেন দুস্সীলং কতন্তি যোজনা. ‘‘দুস্সীল’’ন্তি পদং পুৰিমপচ্ছিমপদাপেক্খং, তস্মা দ্ৱিন্নং পদানং মজ্ঝে ৱুত্তং. তত্থ পুৰিমপদাপেক্খকালে ৱুত্তকম্মং, পচ্ছিমপদাপেক্খকালে অৱুত্তকম্মং. সোতি সামণেৰূপসম্পন্নো. উপজ্ঝাযং ৱাতি সামণেৰং সন্ধায ৱুত্তং. নিস্সযং ৱাতি উপসম্পন্নং সন্ধায ৱুত্তং.

তীসু নাসনাসূতি সংৱাসলিঙ্গদণ্ডকম্মনাসনসঙ্খাতাসু তীসু নাসনাসু. যোতি সামণেৰো. নানাআপত্তিযোতি পাৰাজিকথুল্লচ্চয পাচিত্তিযাপত্তিযো. হীতি সচ্চং, যস্মা ৱা. কুন্থকিপিল্লিকম্পীতি এত্থ পাণখাদকেহি সত্তেহি কুথিযতি হিংসিযতীতি কুন্থো, কুং পথৱিং ৱা ধাৰেতীতি কুন্ধো.

কিমিযেৱ পিল্লিকং পোতকং কিপিল্লিকং মিকাৰস্স লোপং কত্ৱা. পিল্লিকসদ্দো হি পোতকপৰিযাযো. কিমীনং, কিমীসু ৱা পিল্লিকং কিপিল্লিকং. নাসেতব্বতংযেৱাতি লিঙ্গেন নাসেতব্বভাৱমেৱ. তাৱদেৱাতি তস্মিং মাৰণভিন্দনক্খণেযেৱ. অস্সাতি সামণেৰস্স. সেনাসনগ্গাহো চ পটিপ্পস্সম্ভতীতি ৱস্সচ্ছেদো হোতীতি অধিপ্পাযো. আকিণ্ণদোসোৱাতি লিঙ্গনাসনদোসেন চ দণ্ডকম্মনাসনদোসেন চ আকুলদোসোৱ. ৱিৰজ্ঝিত্ৱাতি ৱিৰাধেত্ৱা. যথানিৱত্থপাৰুতস্সেৱ সামণেৰস্সাতি সম্বন্ধো. তস্মাতি সৰণগমনউপসম্পদকম্মৱাচানং সদিসত্তা. ভিক্খুনা সমাদিন্নং ৱিয ইমিনাপি সমাদিন্নানেৱ হোন্তীতি যোজনা. এৱন্তি এৱমিজ্ঝনে, সমাদিন্নে ৱা. দড়্হীকৰণত্থন্তি সিক্খাপদানং দড়্হীকৰণত্থং. পতিট্ঠাপনত্থন্তি সামণেৰস্স পতিট্ঠাপনত্থং. লচ্ছতীতি লভিস্সতি. সঙ্ঘেন দাতব্বোতি সম্বন্ধো. অপলোকেত্ৱাতি সঙ্ঘং আপুচ্ছিত্ৱা. ইমিনা ছিন্নৱস্সকং দস্সেতি.

অদিন্নাদানে তিণসলাকমত্তেনাপি ৱত্থুনা অসমণো হোতীতি যোজনা. ৱিপ্পটিপত্তিযাতি ৱিকাৰেন পটিপজ্জনতো. ভণিতেতি ভণনে. জানিত্ৱাতি জানিত্ৱা এৱ. এৱকাৰো হেত্থ অজ্ঝাহৰিতব্বো, তেন ৱুত্তং ‘‘ন অজানিত্ৱা’’তি. যানি পঞ্চ সিক্খাপদানীতি যোজনা. অস্সাতি সামণেৰস্স. ঠপনত্থাযাতি সিক্খাপদানং ঠপনত্থায. অযন্তি পাৰাজিকো. ৱিসেসোতি ভিক্খূনং পাচিত্তিযতো ৱিসেসো.

পটিপক্খৱসেনাতি ‘‘অনৰহং অসম্মাসম্বুদ্ধো’’তিআদিনা চ ‘‘দ্ৱাক্খাতো’’তিআদিনা চ ‘‘দুপ্পটিপ্পন্নো’’তিআদিনা চ পটিৱিৰুদ্ধৱসেন গৰহন্তো সামণেৰো নিৱাৰেতব্বোতি সম্বন্ধো. কণ্ডকনাসনাযাতি কণ্ডকনামকস্স সামণেৰস্স দণ্ডকম্মনাসনায. তং লদ্ধিন্তি অৱণ্ণভাসনদিট্ঠিং. অচ্চযন্তি অতিক্কমং, দোসং ৱা. দেসাপেতব্বোতি ‘‘অচ্চযো মং ভন্তে অচ্চগমা’’তিআদিনা দেসাপেতব্বা. তং যুত্তন্তি ‘‘লিঙ্গনাসনায নাসেতব্বো’’তি তং ৱচনং পতিৰূপং. হীতি সচ্চং, যস্মা ৱা. ইধাতি খন্ধকে, ‘‘সামণেৰং নাসেতু’’ন্তিৱচনে ৱা.

‘‘এসেৱ নযো’’তি ৱুত্তৱচনং পাকটং কৰোন্তো আহ ‘‘সস্সতুচ্ছেদানঞ্হী’’তিআদি. অঞ্ঞতৰদিট্ঠিকো সামণেৰোতি যোজনা. এত্থাতি দসসু নাসনঙ্গেসু. ‘‘কাম’’ন্তিপদেন পুনৰুত্তিনিৰত্থকদোসাৰোপনেন গৰহং দস্সেতি. ‘‘পনা’’তিপদেন তেসং দোসানং পহানেন সম্ভাৱনং দস্সেতি. অব্ৰহ্মচাৰিং সামণেৰন্তি সম্বন্ধো. উপসম্পাদেতুং ৱট্টতীতি উপসম্পাদনং ৱট্টতি. ভিক্খুনিদূসকো সামণেৰোতি সম্বন্ধো. পব্বজ্জম্পীতি এত্থ পিসদ্দস্স গৰহত্থভাৱং দস্সেতুং ৱুত্তং ‘‘পগেৱ উপসম্পদ’’ন্তি. এতমত্থন্তি এতাদিসমত্থং.