৪২. সিক্খাপদদণ্ডকম্মৱত্থুকথা

১০৬. নাসনৱত্থূতি লিঙ্গনাসনায অধিট্ঠানং, কাৰণন্তি ৱুত্তং হোতি. পচ্ছিমানং পঞ্চন্নন্তি যোজনা. দণ্ডকম্মৱত্থূতি দণ্ডকম্মস্স কাৰণং.

১০৭. অপ্পতিস্সাতি এত্থ ভিক্খূনং ৱচনস্স পটিমুখং আদৰেন অসৱনং ভিক্খূ জেট্ঠকট্ঠানে ন ঠপেন্তি নামাতি দস্সেন্তো আহ ‘‘ভিক্খূ জেট্ঠকট্ঠানে’’তিআদি. ‘‘সমানজীৱিকা’’তি ইমিনা অসভাগৱুত্তিকাতি এত্থ সভাগসদ্দো সমানসদ্দপৰিযাযো, ৱুত্তিসদ্দো জীৱিকপৰিযাযোতি দস্সেতি. পৰিসক্কতীতি এত্থ সক্ক গতিযন্তিধাতুপাঠেসু (সদ্দনীতিধাতুমালাযং ১৬ ড়কাৰন্তধাতু) ৱুত্তত্তা পৰিপুব্বো সক্কসদ্দো গত্যত্থোতি আহ ‘‘পৰক্কমতী’’তি. কিন্তীতি কিমেৱ. ইতিসদ্দো হেত্থ এৱসদ্দত্থো, কেন এৱ উপাযেনাতি হি অত্থো. অক্কোসতি চেৱাতি জাতিআদীহি অক্কোসতি চেৱ. ভেদেতীতি ভেদাপেতি. আৱৰণং কাতুন্তি এত্থ আৱৰণসদ্দো নিৱাৰণসদ্দৱেৱচনোতি আহ ‘‘নিৱাৰণং কাতু’’ন্তি. যত্থাতি যস্মিং পৰিৱেণে, সেনাসনে ৱা. ৱস্সগ্গেনাতি ৱস্সগণনায. (তস্সাতি পৰিৱেণসেনাসনস্স. উপচাৰেতি আসন্নে). মুখদ্ৱাৰিকন্তি মুখসঙ্খাতেন দ্ৱাৰেন অজ্ঝোহৰিতব্বং. ‘‘ৱদতোপী’’তি ইমিনা ৱচীপযোগেন দুক্কটাপত্তিং দস্সেতি, ‘‘নিক্খিপতোপী’’তি ইমিনা কাযপযোগেন. অনাচাৰস্সাতি দণ্ডকম্মে অনাচাৰস্স. এত্তকে নাম দণ্ডকম্মেতি এত্তকে নাম উদকাহৰাপনাদিসঙ্খাতে দণ্ডকম্মে. ইদন্তি যাগুভত্তাদিং. লচ্ছসীতি লভিস্সসি. ‘‘এত্তকে নাম দণ্ডকম্মে’’তি ৱুত্তৱচনস্স যুত্তিং দস্সেন্তো আহ ‘‘ভগৱতা হী’’তিআদি. দণ্ডকম্মন্তি দণ্ডেন্তি দমেন্তি এতেনাতি দণ্ডো, সোযেৱ কত্তব্বত্তা কম্মন্তি দণ্ডকম্মং আৱৰণাদি. অপৰাধানুৰূপন্তি ৱীতিক্কমস্স অপৰাধস্স অনুৰূপং. তম্পীতি উদকদাৰুৱালিকাদিআহৰাপণম্পি. তঞ্চ খোতি তঞ্চ কৰণং. ওৰমিস্সতীতি কাযেন ওৰমিস্সতি. ৱিৰমিস্সতীতি ৱাচায ৱিৰমিস্সতি. উণ্হপাসাণে ৱাতিআদীসু ৱাসদ্দেন অঞ্ঞানিপি অত্ততাপনপৰিতাপনাদীনি কম্মানি সঙ্গণ্হাতি.