২৭. ৰাজভটৱত্থুকথা

৯০. উচ্চিনথাতি এত্থ চিধাতুযা ৱড্ঢনত্থং দস্সেন্তো আহ ‘‘ৱড্ঢেথা’’তি. সোতাপন্নত্তাতি বিম্বিসাৰৰঞ্ঞো =০৮ সোতাপন্নভাৱতো. ঘাতেথাতি জীৱিতা ৱোৰোপেথ. হনথাতি পহৰথ. ততোতি উপজ্ঝাযতো. আচৰিযো সেট্ঠোতি সম্বন্ধো. ততোতি আচৰিযতো. ইদন্তি ৱচনং, আগতন্তি সম্বন্ধো. আহংসু ৱোহাৰিকা মহামত্তা মুসাৱাদেনাতি যোজনা. অমচ্চোতি সব্বৰাজকিচ্চেসু অমা সহ ৰঞ্ঞা ভৱতীতি অমচ্চো. অমাসদ্দো সহত্থে নিপাতো. ‘‘অমা’’তি নিপাততো ভৱত্থে অচ্চপচ্চযো (মোগ্গল্লানে ৪.২৩ সুত্তে). মহামত্তোতি মহন্তো মত্তা ইস্সৰিযা এতস্সাতি মহামত্তো. মত্তাসদ্দো হেত্থ ইস্সৰিযৱাচকো. সেৱকোতি ৰাজানং সেৱতি ভজতীতি সেৱকো. ভত্তৱেতনভটোতি ভত্তৱেতনানমত্থায ভটো. তস্সাতি ৰাজভটস্স. পুত্তনত্তভাতুকাদযোতিআদিসদ্দেন ভাগিনেয্যাদযো সঙ্গণ্হাতি. যো পনাতি ৰাজভটো পন. নিয্যাতেতীতি অপ্পেতি. তং ঠানন্তি তং ৰাজভটট্ঠানং. যেন ৱাতি কম্মকাৰেন ৱা. যংকম্মকাৰণাতি যস্স কম্মস্স কাৰণা. যো ৱাতি ৰাজভটো ৱা. পব্বজস্সূতি পব্বাজেহি.