২৮. চোৰৱত্থুকথা

৯১. দিট্ঠপুব্বোতি অঙ্গুলিমালো পুব্বে দিট্ঠো. অযন্তি চোৰো. সোতি অঙ্গুলিমালো. অঞ্ঞেসং সন্তিকা ৱচনং সুণন্তীতি যোজনা. তেতি মনুস্সা. উব্বিজ্জন্তিপীতি কাযেন উব্বিজ্জন্তিপি. উত্তসন্তিপীতি চিত্তেন উত্তসন্তিপি. অঙ্গুলিমালো ভিক্খূহি ন পব্বাজিতো, ননু ভগৱতা পন সযং পব্বাজিতো, অথ কস্মা ‘‘ন ভিক্খৱে’’তি ৱুত্তন্তি আহ ‘‘ভগৱা সযং ধম্মস্সামী’’তি. ধম্মস্সামীতি চ ধম্মস্স ইস্সৰো, ধম্মেন ৱা দেৱমনুস্সানং ইস্সৰো, অধিপতীতি অত্থো. ভিক্খূনং অকৰণত্থায ভিক্খূনং সিক্খাপদন্তি যোজনা. তত্থাতি ‘‘ন ভিক্খৱে’’তিআদিৱচনে. ‘‘ধজং বন্ধিত্ৱা’’তিআদিনা ধজস্স বন্ধনং ধজবন্ধো, ধজবন্ধো ৱিযাতি ধজবন্ধো, ধজবন্ধো হুত্ৱা চৰতীতি ধজবন্ধোতি ৱচনত্থং দস্সেতি. তস্মাতি যস্মা ধজবন্ধো, তস্মা. যোতি চোৰো. পন্থদুহনং ৱাতি পন্থে দুহনং ৱা. পঞ্ঞাযতি চাতি এত্থ চসদ্দো ৱাক্যসম্পিণ্ডনত্থো. ন কেৱলঞ্হি ৱিচৰতিযেৱ, অথ খো পঞ্ঞাযতি চাতি অত্থো. ইদন্তি চোৰকম্মং. ৰজ্জন্তি ৰাজভাৱং. সোতি ৰাজপুত্তো. হীতি সচ্চং, যস্মা ৱা. তস্মিন্তি ৰাজপুত্তে. পুব্বেতি পুব্বকালে. তন্তি চোৰং. এৱন্তি ইমিনাকাৰেন, জানন্তি চেতি যোজনা. অদিস্সমানাতি অত্তানং অপঞ্ঞাযমানা. ইদং সন্ধিচ্ছেদাদিচোৰে সন্ধায ৱুত্তং, ন অম্বলবুজাদিচোৰে. পচ্ছাপীতি থেয্যকৰণতো পচ্ছাপি. তেপীতি চোৰেপি.

৯২. ভযেনাতি ভযতো. এতে পনাতি ভিক্খূ পন. লদ্ধাভযত্তাতি ৰাজতো লদ্ধো অভযো ইমেহীতি লদ্ধাভযা, তেসং ভাৱো লদ্ধাভযত্তং, তস্মা. কাৰভেদকোতি এত্থ কাৰসদ্দো ৰুক্খৱিসেসে =০৯ চ সক্কাৰে চ বন্ধনালযে চ পৱত্ততি, ইধ পন বন্ধনালযেতি দস্সেন্তো আহ ‘‘কাৰং ৱুচ্চতি বন্ধনাগাৰ’’ন্তি. বন্ধনাগাৰঞ্হি কৰোন্তি তং পৱেসিতে জনে হিংসন্তি এত্থাতি ‘‘কাৰা’’তি ৱুচ্চতি. ইধাতি ‘‘কাৰভেদকো’’তিপদে. দীপবন্ধনং ৱা হোতূতি যোজনা. ইমেহি পদেহি ন কেৱলং বন্ধনাগাৰংযেৱ কাৰা নাম হোতি, অথ খো অন্দুবন্ধনাদীনিপি কাৰাযেৱ নামাতি দস্সেতি. যোতি চোৰো. এতেসূতি বন্ধনেসু. মুঞ্চিত্ৱা ৱাতি ৰজ্জুবন্ধনং নিব্বেঠেত্ৱা ৱা. ইমেহি পদেহি ন কেৱলং কাৰায ভিন্দনতো এৱ কাৰভেদকো নাম হোতি, অথ খো ছিন্দনমুঞ্চনৱিৱৰণেহিপি কাৰভেদকোযেৱ নামাতি দস্সেতি. দীপন্তৰন্তি বন্ধনদীপতো অন্তৰং অঞ্ঞং দীপন্তি অত্থো. চক্কৱাড়বন্ধনং ভিন্দিত্ৱা চক্কৱাড়ন্তৰং গতো অট্ঠকথাযং ন ৱুত্তো. সোতি নচোৰকো. গামনিগমপট্টনাদীনীতি এত্থ পট্টনন্তি নাৱাপট্টনং, সকটপট্টনঞ্চ. কেণিযাতি ৰঞ্ঞো দাতব্বআযেন. তন্তি কেণিং. নিধানন্তি নিক্খণিত্ৱা ঠপিতং ধনং. উপসংহৰিত্ৱাতি ৰাজাদীনং সন্তিকং হৰিত্ৱা. তন্তি কসিকম্মাদীহি সম্পাদেত্ৱা জীৱন্তং. তত্থেৱাতি বন্ধাপিতট্ঠানেযেৱ.

৯৩. যত্থাতি যস্মিং ঠানে. যো কোচি পলাতোতি সম্বন্ধো. নন্তি যং কিঞ্চি জনং, লিখাপেতীতি যোজনা. পণ্ণে ৱাতি কুসে ৱা. অস্সাতি জনস্স. দণ্ডন্তি ধনদণ্ডং. লিখিতকোতি লিখিতব্বোতি লিখিতো, সোযেৱ লিখিতকো.

৯৪. যো পন কসাহি হঞ্ঞতীতি সম্বন্ধো. ইমিনা অঞ্ঞেহি কসাহি হঞ্ঞতীতি কসাহতোতি ৱচনত্থং দস্সেতি. ‘‘অযমেৱ তে দণ্ডো হোতূ’’তি ইমিনা কতং দণ্ডকম্মং ইমস্সাতি কতদণ্ডকম্মোতি ৱচনত্থং দস্সেতি. অল্লৱণোতি তিন্তৱণো. ঘাতেত্ৱাতি হনিত্ৱা পহৰিত্ৱাতি অত্থো. গণ্ডিগণ্ডিযোতি ফোটফোটা. সন্নিসিন্নাসূতি গণ্ডীসু পকতিসৰীৰেন সমং নিসিন্নাসু.

৯৫. কতদণ্ডকম্মভাৱো তাৱ পুৰিমনযেনেৱ ৱেদিতব্বো হোতু, কথং পন লক্খণাহতভাৱো ৱেদিতব্বোতি আহ ‘‘যস্স পনা’’তিআদি. তত্থ তত্তেনাতি তাপেন. লক্খণন্তি সঞ্ঞাণং. সোতি জনো. ভুজিস্সোতি ভুজো এতস্সত্থীতি ভুজিস্সো (ম. নি. টী. ২.৪২৬). পৰেহি অপালিতো চ অনজ্ঝোহৰাপিতো চ হুত্ৱা সযমেৱ অত্তানং পালনেন চ ভোজনং অজ্ঝোহৰণেন চ সমন্নাগতোতি ৱুত্তং হোতি. অস্সাতি লক্খণাহতস্স. ৱণাতি অৰূনি. তানি হি যস্মা ৱণন্তি গত্তানি ৱিচুণ্ণানি কৰোন্তি, তস্মা ৱণাতি ৱুচ্চন্তি. ৰূড়্হাতি তৰুণমংসেন ৰুহা. তিমণ্ডলৱত্থস্স লক্খণাহতস্স জনস্সাতি সম্বন্ধো.