২৫. অঞ্ঞতিত্থিযপুব্বৱত্থুকথা

৮৬. যো পনাতি যো পন অঞ্ঞতিত্থিযপুব্বো. অঞ্ঞোপীতি পসূৰতো অপৰোপি. ইধাতি ইমস্মিং সাসনে. তস্মিন্তি অঞ্ঞতিত্থিযপুব্বে. তত্থাতি ‘‘যো সো ভিক্খৱে অঞ্ঞোপী’’তিআদিৱচনে. অযন্তি পৰিৱাসো. নগ্গপৰিব্বাজকস্সেৱাতি ৱত্ৱা তস্স ভেদং দস্সেতুং ৱুত্তং ‘‘আজীৱকস্স ৱা অচেলকস্স ৱা’’তি. তত্থ আজীৱকো উপৰি একমেৱ ৱত্থং উপকচ্ছকে পৱেসেত্ৱা পৰিদহতি, হেট্ঠা নগ্গো. অচেলকো পন সব্বেন সব্বং নগ্গোযেৱ. সোপীতি =০৩ নগ্গপৰিব্বাজকোপি. ৱালকম্বলাদীনন্তি ৱালেন কতং কম্বলং, আদিসদ্দেন কেসকম্বলাদযো সঙ্গণ্হাতি. অস্সাতি পৰিব্বাজকস্স. অঞ্ঞস্সাতি নগ্গপৰিব্বাজকতো অপৰস্স. পণ্ডৰঙ্গাদিকস্সাতি পণ্ডৰং সেতৱত্থং অঙ্গে সৰীৰে এতস্সত্থীতি পণ্ডৰঙ্গো, আদিসদ্দেন নীলঙ্গাদযো সঙ্গণ্হাতি.

এৱন্তি ইমিনা কেসমস্সুওৰোপনাদিনা. পব্বাজেন্তেহি ভিক্খূহীতি সম্বন্ধো. তস্মিন্তি অঞ্ঞতিত্থিযপুব্বে, নিসিন্নেযেৱাতি যোজনা. অনাদৰে চেতং ভুম্মৱচনং. তস্সাতি অঞ্ঞতিত্থিযপুব্বস্স. নযিমেতি ন ইমে, ভিক্খূতি সম্বন্ধো. তন্তি অঞ্ঞতিত্থিযপুব্বং.

৮৭. ‘‘এৱং খো…পে… অনাৰাধকো’’তি অযং কথা মাতিকাতি যোজনা. অস্সাতি অঞ্ঞতিত্থিযপুব্বস্স. তস্সেৱাতি তস্সাযেৱ মাতিকায. তত্থাতি ৱিভঙ্গে. অতিকালেনাতি এত্থ ভত্তকিচ্চং কত্ৱা ৱত্তকৰণৱেলাযেৱ অতিকালো নামাতি দস্সেন্তো আহ ‘‘ৱত্তকৰণৱেলাযমেৱা’’তি. ইমিনা ভুম্মত্থে কৰণৱচনন্তিপি দস্সেতি. তত্থেৱাতি কুলঘৰেসুযেৱ. অঞ্ঞদত্থূতি একংসেন, ‘‘কৰোন্তো’’তি ইমিনা পাঠসেসং দস্সেতি. এৱম্পি কৰোন্তো অঞ্ঞতিত্থিযপুব্বোতি যোজনা. ‘‘সম্পাদকো’’তি ইমিনা অনাৰাধকোতি এত্থ আৰাধসদ্দস্স সাধনত্থং দস্সেতি, তোসনত্থাদযো নিৱত্তেতি.

অজ্ঝাচাৰত্থিকা ৱিসন্তি পৱিসন্তি এত্থাতি ৱেসিযা, সোভণৰূপসঙ্খাতং ৱেসং ধাৰেতীতি ৱা ৱেসিযা. তেন ৱুত্তং ‘‘সুলভজ্ঝাচাৰা’’তিআদি. আমিসোযেৱ কিঞ্জক্খো অপ্পমত্তকট্ঠেনাতি আমিসকিঞ্জক্খো, ৱিসেসনপৰপদো. অথ ৱা আমিসো চ ততো অঞ্ঞো কিঞ্জক্খো চ আমিসকিঞ্জক্খং, তস্স সম্পদানং আমিসকিঞ্জক্খসম্পদানং. কিঞ্জক্খসদ্দো কেসৰস্সেৱ মুখ্যতো ৱাচকো, অপ্পমত্তকস্স পন ৰূড়্হীৱসেন. ৱিধৱাতি এত্থ ধৱসদ্দো পতিনোযেৱ ৱাচকো, ন ৰুক্খৱিসেসস্সাতি দস্সেন্তো আহ ‘‘মতপতিকা ৱা’’তিআদি. ইমেহি পদেহি মতৱসেন ৱা পৱুত্থৱসেন ৱা ৱিগতো ধৱো এতাসং, ধৱেন ৱা ৱিগতাতি ৱিধৱাতি ৱচনত্থং দস্সেতি. তাতি ৱিধৱা. যোব্বনপত্তত্তা ৱা যোব্বনাতীতত্তা ৱা থুল্লা মহন্তা কুমাৰিকাতি থুল্লকুমাৰিকাতি দস্সেন্তো আহ ‘‘যোব্বনপত্তা’’তিআদি. পণ্ডকাতি এত্থ আসিত্তপণ্ডকাদীসু পঞ্চসু পণ্ডকেসু নপুংসকপণ্ডকোৱাধিপ্পেতোতি আহ ‘‘নপুংসকা’’তি. সমানপব্বজ্জাতি ভিক্খূহি সমানপব্বজ্জা. ততোতি ৱিস্সাসতো.

তত্থাতি ৱেসিযাদীসু. তাসন্তি ৱেসিযানং. সোতি অঞ্ঞতিত্থিযপুব্বো. সব্বত্থাতি সব্বেসু =০৪ ৱিধৱাদীসু. গন্তব্বতং দস্সেন্তো আহ ‘‘সচে পনা’’তিআদি. তথাতি যথা গন্তব্বত্তং ৱুত্তং, তথা.

উচ্চাৱচানীতি এত্থ উদ্ধং চযতি ৱড্ঢতীতি উচ্চং, চযতো অৱগতো ৱিযোগোতি অৱচং. উচ্চঞ্চ অৱচঞ্চ উচ্চাৱচানীতি ৱচনত্থেন মহন্তখুদ্দকত্থোতি আহ ‘‘মহন্তখুদ্দকানী’’তি. ‘‘কম্মানী’’তি ইমিনা ‘‘কৰণীযানী’’তিপদস্স সৰূপং দস্সেতি. তংদস্সনেন চ কত্তব্বানীতি কৰণীযানীতি ৱচনত্থো কাতব্বো. তত্থাতি মহন্তখুদ্দকেসু কম্মেসু. তত্থ ন দক্খোতি এত্থ তসদ্দস্স ৱিসযং দস্সেতুং ৱুত্তং ‘‘তেসু তেসু নৱকম্মেসূ’’তি. ‘‘উট্ঠানৱীৰিযসম্পন্নো’’তি ইমিনা নত্থি অলসো কোসজ্জং এতস্সাতি অনলসোতি ৱচনত্থং দস্সেতি. তত্ৰাতি এত্থ ত্ৰপচ্চযো সত্তম্যত্থে ৱিচ্ছাজোতকোতি আহ ‘‘তেসু তেসূ’’তি. ‘‘ঠানুপ্পত্তিকায ৱীমংসাযা’’তি ৱুত্তৱচনস্সত্থং দস্সেন্তো আহ ‘‘ইদমেৱ’’ন্তিআদি. ‘‘তস্মিংযেৱ খণে উপ্পন্নপঞ্ঞাযা’’তি ইমিনা ‘‘ঠানুপ্পত্তিকাযা’’তি এত্থ ঠানসদ্দো তঙ্খণত্থোতি দস্সেতি. অলং কাতুন্তি এত্থ অলংসদ্দো ভূসনৱাৰণপৰিযত্তসঙ্খাতেসু তীসু অত্থেসু পৰিযত্তত্থোতি আহ ‘‘কাতুং সমত্থো’’তি.

তিব্বচ্ছন্দোতি তিখিণছন্দো. ‘‘বলৱচ্ছন্দো’’তি ইমিনা অধিপ্পাযত্থং দস্সেতি. লোকিযসমাধিভাৱনাযাতি লোকিযায অট্ঠসমাপত্তিসঙ্খাতায সমাধিভাৱনায.

ইধাগতোতি ইমস্মিং সাসনে আগতো. তিত্থাযতনসামিকস্সাতি তৰন্তি উপ্লৱন্তি সত্তা উম্মুজ্জনিমুজ্জং কৰোন্তি এত্থাতি তিত্থং, দ্ৱাসট্ঠি দিট্ঠিযো. তমেৱ আযতনং দিট্ঠিগতিকানন্তি তিত্থাযতনং. অথ ৱা তিত্থমেতেসমত্থীতি তিত্থিনো, তেসমাযতনং তিত্থাযতনং, তস্স সামিকো তিত্থাযতনসামিকো, তস্স. তস্স দিট্ঠিযাতি এত্থ দিট্ঠিসদ্দো লদ্ধিপৰিযাযোতি আহ ‘‘তস্স সন্তকায লদ্ধিযা’’তি. কস্মা সা লদ্ধি ‘‘খন্তী’’তি চ ‘‘ৰুচী’’তি চ ‘‘আদাযো’’তি চ ৱুচ্চতীতি আহ ‘‘ইদানী’’তিআদি. সাযেৱ লদ্ধি খমতি চেৱ ৰুচ্চতি চ গহিতা চাতি যোজনা. তস্স তিত্থকৰস্সাতি কত্ৱত্থে সামিৱচনং. তস্সাতি তিত্থাযতনসামিকস্স. ভঞ্ঞমানাযাতি ভণিযমানায. অনভিৰদ্ধোতি এত্থ অনভিৰাধিতো অপৰিতোসিতচিত্তোতি অত্থং দস্সেন্তো আহ ‘‘অপৰিপুণ্ণসঙ্কপ্পো, নো পগ্গহিতচিত্তো’’তি. যদিদন্তি যং ইদং ‘‘অনত্তমনত্ত’’ন্তি ৱা ‘‘অত্তমনত্ত’’ন্তি ৱা সম্বন্ধো. ইমিনা ‘‘ইদ’’ন্তিপদস্স অনিযমং দস্সেতি. ইমেতি ভিক্খূ. যঞ্চ অনত্তমনত্তন্তি যোজনা. তস্সেৱাতি অঞ্ঞতিত্থিযপুব্বস্স এৱ অনত্তমনত্তন্তি সম্বন্ধো. ইদন্তি দ্ৱে অত্তমনত্তানি, দ্ৱে অনত্তমনত্তানীতি চতুব্বিধং ইদং ধম্মজাতং. সঙ্ঘাটনীযন্তি সঙ্ঘটিতব্বং, সন্নিচযং কাতব্বন্তি অত্থো. ‘‘অনাৰাধকে’’তিআদিনা অনাৰাধনীযস্মিন্তি =০৫ এত্থ ন আৰাধেতি ৱত্তং অনেন কম্মেনাতি অনাৰাধনীযন্তি ৱচনত্থং দস্সেতি. ইদন্তি চতুব্বিধং. লিঙ্গন্তি কাৰণং. লক্খণন্তি চিহনং. ইতোতি অট্ঠঙ্গতো নীহটেনাতি সম্বন্ধো. ৱুত্তৱিপল্লাসেনাতি কণ্হপক্খে ৱুত্তৱিপৰীতেন.

সুক্কপক্খে অট্ঠঙ্গানি সমোধানেত্ৱা দস্সেন্তো আহ ‘‘নাতিকালেন গামপৱেসনং নাতিদিৱা পটিক্কমন’’ন্তিআদি. কণ্হপক্খেপি ইমিনা নযেন অট্ঠঙ্গানি সমোধানেতব্বানি. ‘‘পৰিতোসকো’’তি ইমিনা আৰাধকসদ্দস্স তোসনত্থং দস্সেতি. হেট্ঠা পন ‘‘সম্পাদকো’’তি ৱুত্তত্তা সাধনত্থং দস্সেতীতি দট্ঠব্বং.

উপসম্পদমাড়কেপীতি উপসম্পাদট্ঠানে এককূটযুত্তে অনেককোণে পতিস্সযৱিসেসেপি. সো হি এককূটং কত্ৱা অনেকেহি কোণেহি মলীযতি ৱিভূসীযতীতি মাড়োতি ৱুচ্চতি. ‘‘চত্তাৰো মাসে পৰিৱসিতব্ব’’ন্তিৱচনং অসদিসূপমায পাকটং কৰোন্তো ‘‘যথা পনা’’তিআদিমাহ. হীতি সচ্চং. অস্সাতি অঞ্ঞতিত্থিযপুব্বস্স. পৰিৱসন্তো অঞ্ঞতিত্থিযপুব্বোতি সম্বন্ধো. অন্তৰাতি চতুমাসস্স অব্ভন্তৰে. কুপ্পনসভাৱোতি নস্সনসভাৱো. পৰিগ্গণ্হাতীতি পৰিচ্ছিন্দিত্ৱা গণ্হাতি. নামৰূপং ৱৱত্থপেতীতি ‘‘ইদং নামং, ইদং ৰূপ’’ন্তি ৱৱত্থপেতি. লক্খণন্তি নমনৰুপ্পনলক্খণং, অনিচ্চাদিলক্খণং ৱা. সোতাপত্তিমগ্গস্স দিট্ঠিৱিচিকিচ্ছাপহানং সন্ধায ৱুত্তং ‘‘সমূহতানি…পে… সল্ল’’ন্তি. অব্বুড়্হন্তি আৱহিযিত্থাতি অব্বুড়্হং, উদ্ধং ৱহিযিত্থাতি অত্থো. আত্যূপসগ্গো হি উদ্ধঙ্গমত্থো. তংদিৱসমেৱাতি তস্মিং সোতাপত্তিমগ্গস্স পটিলভনদিৱসেযেৱ. ভুম্মত্থে চেতং উপযোগৱচনং. তদহেৱাতি তস্মিং সোতাপন্নভৱনঅহনি এৱ.

তস্সাতি অঞ্ঞতিত্থিযপুব্বস্স. পাড়িযং পত্তস্স অনাগতত্তা ৱুত্তং ‘‘পত্তম্পি তথেৱা’’তি. যথা উপজ্ঝাযমূলকং চীৱৰং পৰিযেসিতব্বং, পত্তম্পি তথেৱাতি অত্থো. ইদন্তি পত্তচীৱৰং. ইমস্সাতি অঞ্ঞতিত্থিযপুব্বস্স. অঞ্ঞেতি উপজ্ঝাযতো অপৰে. তেহিপীতি অঞ্ঞেহিপি. ৱিলোমাতি পটিলোমা. আযত্তন্তি অধীনং. আযত্তজীৱিকত্তাতি অঞ্ঞতিত্থিযপুব্বস্স উপজ্ঝাযেন আযত্তজীৱিকত্তা. তস্সাতি উপজ্ঝাযস্স. ৱচনকৰোতি ৱচনং কৰো. ৱাক্যেপি সমাসেপি ৱচনসদ্দস্স ‘‘তস্সা’’তি পদমেৱ অপেক্খত্তা ‘‘ৱচনকৰো’’তি সমাসো হোতি. এসেৱ নযো ‘‘উপজ্ঝাযেন আযত্তজীৱকত্তা’’তি এত্থাপি. তেনাতি ৱচনকৰহেতুনা.

অগ্গিপৰিচৰণকাতি =০৬ অগ্গিপূজকা. ইমিনা অগ্গিং পৰিচৰন্তীতি অগ্গিকাতি ৱচনত্থং দস্সেতি. তাপসাতি জটাধৰা. তে হি যস্মা জটা চ তপো চ এতেসমত্থি, তস্মা ‘‘জটিলা’’তি চ ‘‘তাপসা’’তি চ ৱুচ্চন্তি. এতেতি জটিলকা. ‘‘কিৰিযং ন পটিবাহন্তী’’তি ৱুত্তৱচনস্স অত্থং দস্সেন্তো আহ ‘‘অত্থি কম্মং, অত্থি কম্মৱিপাকো’’তি. এতদেৱ পব্বজ্জন্তি এতং এৱ তাপসপব্বজ্জং. এতেসন্তি জটিলানং. সাসনেতি বুদ্ধস্স সাসনে. তেসন্তি ঞাতীনং, ইমং পৰিহাৰন্তি সম্বন্ধো. তেতি ঞাতযো. হীতি সচ্চং, যস্মা ৱা. ঞাতিসেট্ঠস্সাতি ঞাতিযেৱ সেট্ঠো, ঞাতীনং ৱাতি ঞাতিসেট্ঠো, তস্স, বুদ্ধস্সাতি সম্বন্ধো.