২২. নিস্সযপটিপ্পস্সদ্ধিকথা

আণত্তিৱিনিচ্ছযো

৮৩. ‘‘নিস্সযপটিপস্সদ্ধীসূ’’তি সমূহাধাৰো. ‘‘উপজ্ঝাযো পক্কন্তো ৱাতিআদীসূ’’তি অৱযৱাধাৰো. ‘‘ৱিপ্পৱসিতুকামো’’তি ইমিনা নিৰালযভাৱং দস্সেতি. এৱং গতেতি এৱং উপজ্ঝাযে গতেতি যোজনা. অঞ্ঞদাপীতি অঞ্ঞস্মিম্পি কালে. উপজ্ঝাযেন পৱাসিতকালেতি অত্থো. একসম্ভোগপৰিভোগোতি অত্তনা ৱা উপজ্ঝাযেন ৱা একো পচ্চযসম্ভোগো চ ধম্মপৰিভোগো চ. একদিৱসম্পীতি পিসদ্দো গৰহত্থো, দ্ৱিহাদিকং পন পগেৱাতি অত্থো. পৰিহাৰো নত্থীতি আপত্তিপৰিহাৰো নত্থি, আপত্তিযা পৰিহৰণং অপনযনং নত্থীতি অধিপ্পাযো. লজ্জী পেসলোতি লজ্জী হুত্ৱা পিযসীলো ভিক্খূতি সম্বন্ধো. তদহেৱাতি তস্মিং উপজ্ঝাযস্স পক্কন্তঅহনি এৱ. তথাতি যথা ‘‘উপজ্ঝাযো লহুং আগমিস্সতী’’তি পুচ্ছতি, তথা ‘‘অহং লহুং আগমিস্সামী’’তি ৱুত্তন্তি অত্থো. সচে ৱদতীতি সচে আচৰিযো ৱদতীতি যোজনা. অস্সাতি ভিক্খুস্স. সভাগতন্তি লজ্জিপেসলভাৱং.

যাৱ আগমনাতি উপজ্ঝাযস্স যাৱ আগমনা. নন্তি উপজ্ঝাযং. ‘‘ৱাসেন্তিযেৱা’’তিপদে কাৰিতকম্মং. তত্থাতি উপজ্ঝাযস্স গতট্ঠানে. তেনাতি উপজ্ঝাযেন. পৱত্তীতি পৱত্তনং. নদীপূৰেন ৱা উপদ্দুতোতি সম্বন্ধো. নদীপূৰত্তা উদকোসক্কনং আগমেতি, চোৰাদীনং উপদ্দুতত্তা সহাযে পৰিযেসতি. সোতি উপজ্ঝাযো.

‘‘নিস্সযপণামনা’’তি ইমিনা আণাপনং আণত্তীতি ৱচনত্থেন নিস্সযপণামনা আণত্তীতি ৱুচ্চতীতি দস্সেতি. নিস্সযপণামনাতি নিস্সযস্স উপজ্ঝাচৰিযস্স পণামনা. তস্মা পণামিতো হোতীতি সম্বন্ধো. ‘‘আপুচ্ছীতিআদিনা’’তি এত্থ আদিসদ্দেন ‘‘মা মং সুসানগমনং আপুচ্ছী’’তিআদযো সঙ্গণ্হাতি. তেনাতি সদ্ধিৱিহাৰিকেন. খমাপেতব্বোতি তিতিক্খাপেতব্বো.

তাৱাতি মহাথেৰেহি, মহাথেৰানং ৱা পঠমং. অঞ্ঞত্থাতি উপজ্ঝাযস্স ৱিহাৰতো অঞ্ঞং ৱিহাৰং. অপ্পেৱাতি অপি এৱ নাম খমেয্যাতি যোজনা. তত্ৰেৱাতি অঞ্ঞত্থেৱ. দুব্ভিক্খাদিদোসেনাতি এত্থ আদিসদ্দেন ঞাতিৱিযোগাদিদোসো গহেতব্বো. তংযেৱাতি অত্তনা ৱসিতং তমেৱ ঠানং. অঞ্ঞস্সাতি উপজ্ঝাযতো অঞ্ঞস্স ভিক্খুস্সাতি সম্বন্ধো. ইমিনা উপজ্ঝাযেন পৰিচ্চত্তত্তা উপজ্ঝাযসমোধানে নিস্সযপটিপ্পস্সদ্ধি নত্থীতি দীপেতি.

সমোধানৱিনিচ্ছযো

আপুচ্ছিত্ৱাতি =০০ অন্তেৱাসিকং আপুচ্ছিত্ৱা. তত্ৰাপীতি আচৰিযন্তেৱাসিকেসুপি. কদাতি কস্মিং কালে. সাযন্হে ৱা ৰত্তিংৱাতি অজ্জ সাযন্হে ৱা ৰত্তিং ৱা. তংখণেযেৱাতি তস্মিং সম্পটিচ্ছনক্খণেযেৱ.

সো চাতি অন্তেৱাসিকো চ. ততোতি গামতো. সুগতোতি সুট্ঠু গতো, নিস্সযো পটিপ্পস্সম্ভতীতি অধিপ্পাযো. অথাপীতি পুন চ পৰং. আপুচ্ছিত্ৱা পক্কমনে ৱিনিচ্ছযং দস্সেত্ৱা আপুচ্ছিত্ৱা পক্কমনে তং দস্সেন্তো আহ ‘‘আচৰিযং অনাপুচ্ছা’’তিআদি. উপচাৰসীমাতিক্কমেতি উপচাৰসীমায অতিক্কমে সতি, অতিক্কমনহেতু ৱাতি যোজনা. এত্থ চ উপচাৰসীমা নাম পৰিক্খিত্তস্স ৱিহাৰস্স পৰিক্খেপোযেৱ, অপৰিক্খিত্তস্স পৰিক্খেপাৰহট্ঠানং.

সাযন্হে ৱা ৰত্তিভাগে ৱাতি অজ্জ সাযন্হে ৱা ৰত্তিভাগে ৱা. স্ৱেতি সুৱে.

বহিসীমন্তি উপচাৰসীমতো বহি. ততোতি বহিসীমতো. দ্ৱিন্নং লেড্ডুপাতানন্তি অন্তেৱাসিকতো দ্ৱিন্নং লেড্ডুপাতানং. অতিক্কমিত্ৱাতি উপচাৰসীমতো বহি অন্তেৱাসিকসদ্ধিৱিহাৰিকানং ৱসনট্ঠানতো অতিক্কমিত্ৱা.

মুচ্চিতুকামোতি অন্তেৱাসিকম্হা মুচ্চিতুকামো এৱ. পণামেতীতি কাযৱাচাহি পণামেতি. সালযোতি আচৰিযে সাপেক্খো. ‘‘নিৰালযো’’তি ৱত্ৱা তস্স অত্থং দস্সেতুং ৱুত্তং ‘‘ন দানী’’তিআদি. এৱম্পীতি ধুৰে নিক্খিত্তেপি. উভিন্নং ধুৰনিক্খেপে সতি, ধুৰনিক্খেপহেতু ৱা পটিপ্পস্সম্ভতীতি যোজনা. পণামিতেন পটিপজ্জিতব্বন্তি সম্বন্ধো.

ৱুত্তমেৱত্থং ৱিত্থাৰেন্তো আহ ‘‘সচে হী’’তিআদি. আচৰিযন্তি নিস্সযাচৰিযং. চেতিযং ৱা ৱন্দন্তং উপজ্ঝাযন্তি সম্বন্ধো, মগ্গপ্পটিপন্নং ৱা উপজ্ঝাযন্তি যোজনা. দূৰত্তাতি দূৰভাৱতো. উপৰিপাসাদেতি পাসাদস্স উপৰি. তন্তি উপজ্ঝাযং. নিসিন্নং উপজ্ঝাযন্তি সম্বন্ধো.

সৱনৱসেন সমোধানে ৱিনিচ্ছযো এৱং ৱেদিতব্বোতি যোজনা. উপজ্ঝাযস্স সদ্দন্তি সম্বন্ধো.