২৩. উপসম্পাদেতব্বপঞ্চককথা

৮৪. ইদানি =০১ যং লক্খণং ৱুত্তন্তি সম্বন্ধো. সঙ্খেপতোতি অঙ্গানি অনুদ্ধৰিত্ৱা সমাসতো. তত্থাতি যং ‘‘পঞ্চহি ভিক্খৱে অঙ্গেহি সমন্নাগতেন ভিক্খুনা’’তিআদিমাহ, তত্থ. অগুণঙ্গেহীতি গুণৱিৰহিতেহি অঙ্গেহি. সোতি ভিক্খু. ন উপসম্পাদেতব্বন্তি এত্থ কম্মৱাচাচৰিযেন হুত্ৱা ন উপসম্পাদেতব্বন্তি আসঙ্কা ভৱেয্যাতি আহ ‘‘উপজ্ঝাযেন হুত্ৱা ন উপসম্পাদেতব্ব’’ন্তি. এত্থাতি এতেসু পঞ্চকেসু. আদীসূতি এত্থ পুব্বো নিদস্সনত্থো ইতিসদ্দো লোপো হোতি. ইতিআদীসূতি হি অত্থো. অযুত্তৱসেনাতি অননুৰূপৱসেন. যোতি ভিক্খু. হীতি সচ্চং, যস্মা ৱা. পৰে চ সমাদপেতুন্তি সম্বন্ধো. তত্থাতি সীলক্খন্ধাদিকে. পৰিহৰতীতি পৰিসং পৰিস্সযতো হৰতি অপনেতি. তস্সাতি ভিক্খুনো. ‘‘সীলাদীহী’’তিপদং ‘‘পৰিহাযতিযেৱা’’তিপদে অপাদানং, ‘‘ন ৱড্ঢতী’’তিপদে কৰণং. তস্মাতিআদি লদ্ধগুণং. তেনাতি ভিক্খুনা. কস্মা আপত্তিঅঙ্গৱসেন ন ৱুত্তন্তি আহ ‘‘ন হী’’তিআদি. হীতি যস্মা. তস্সেৱাতি খীণাসৱস্সেৱ. ন ৱদেয্যাতি খীণাসৱানং অনভিৰতিযা অনুপ্পন্নত্তা ন ৱদেয্য. যদি ন খীণাসৱস্সেৱ উপজ্ঝাযাচৰিযভাৱো অনুঞ্ঞাতো, অথ কস্মা খীণাসৱপঞ্চকো ৱুত্তোতি আহ ‘‘যস্মা পনা’’তিআদি. যস্মা ন পৰিহাযতীতি সম্বন্ধো.

অন্তগ্গাহিকাযাতি সস্সতুচ্ছেদসঙ্খাতং অন্তং লামকং গণ্হাতি, গণ্হাপেতীতি ৱা অন্তগ্গাহিকা, তায. দিট্ঠিযাতি মিচ্ছাদিট্ঠিযা. যত্তকং সুতন্তি ভিক্খুনোৱাদকসিক্খাপদে (পাচি. অট্ঠ. ১৪৫-১৪৭) ৱুত্তং যত্তকং সুতং. তেনাতি সুতেন ऋ. যং আপত্তাদি তেন জানিতব্বন্তি যোজনা.

আপত্তিং ন জানাতীতি এত্থ আপত্তিং আপন্নোতি ন জানাতীতি অত্থং দস্সেন্তো আহ ‘‘ইদং নামা’’তিআদি. তত্থ ‘‘আপন্নো’’তি ইমিনা ‘‘আপত্তি’’ন্তিপদং ‘‘আপন্নো’’তিপাঠসেসেন যোজেতব্বন্তি দস্সেতি.

আভিসমাচাৰিকাযাতি এত্থ উভতোৱিভঙ্গপৰিযাপন্নসীলতো অভিৱিসেসেন সম্মা চৰিতব্বন্তি আভিসমাচাৰং, খন্ধকপৰিযাপন্নং ৱত্তপটিপত্তিসীলং, তং আৰব্ভ পঞ্ঞত্তা আভিসমাচাৰিকা, খন্ধকপৰিযাপন্না সিক্খা, তায. আদিব্ৰহ্মচাৰিযকাযাতি এত্থ মগ্গসঙ্খাতস্স ব্ৰহ্মচৰিযস্স আদি মৰিযাদো আদিব্ৰহ্মচৰিযো, তস্মিং পৱত্তা আদিব্ৰহ্মচৰিযকা =০২, উভতোৱিভঙ্গপৰিযাপন্না সিক্খা, তায. সেক্খপণ্ণত্তিযন্তি সিক্খিতব্বট্ঠেন সিক্খা, সা এৱ ভগৱতা পঞ্ঞত্তত্তা সেক্খপণ্ণত্তি. অথ ৱা সিক্খনং সিক্খা, তায সিক্খনত্থায ভগৱতা পঞ্ঞপীযতীতি সেক্খপণ্ণত্তি উভতোৱিভঙ্গপৰিযাপন্নসিক্খাযেৱ, তস্সং. অভিধম্মেতি এত্থ সুত্তন্তপাড়িতো অভি অতিৰেকো, অভিৱিসিট্ঠো ৱা ধম্মো অভিধম্মোতি ৱুত্তে নামৰূপপৰিচ্ছেদকং অভিধম্মপিটকন্তি আহ ‘‘নামৰূপপৰিচ্ছেদে’’তি. অভিৱিনযেতি এত্থ অভিভৱিত্ৱা কাযৱাচং ৱিনেতীতি অভিৱিনযো, অভিভৱিত্ৱা কাযৱাচং ৱিনেতি এত্থ, এতেনাতি ৱা অভিৱিনযোতি ৱুত্তে ৱিনযপিটকন্তি আহ ‘‘সকলে ৱিনযপিটকে’’তি. সব্বত্থাতি সব্বেসু পদেসু, সব্বেসং ৱা পদানং. অত্থো দট্ঠব্বোতি যোজনা. ‘‘কাৰণেনা’’তি এত্থ কাৰণসদ্দেন ‘‘ধম্মতো’’তি এত্থ ধম্মসদ্দস্স সভাৱত্থাদযো নিৱাৰেত্ৱা কাৰণত্থতং দীপেতি, এনসদ্দেন তোপচ্চযস্স ৱিসেসনত্থং. ইতীতি এৱং যথাৱুত্তনযেনাতি অত্থো. চতুত্থেতি চতুত্থপঞ্চকে. চতুত্থপঞ্চকতো তীণি পদানি, পঞ্চমপঞ্চকতো দ্ৱে পদানি গহেত্ৱা পঞ্চকং কত্ৱা ৱুত্তং ‘‘চত্তাৰো পঞ্চকা’’তি. অট্ঠসু পঞ্চকেসূতি সম্বন্ধো.

ইতি সোড়সপঞ্চকৱিনিচ্ছযে যোজনা সমত্তা.