১৫. উপজ্ঝাযৱত্তকথা

৬৪. অনুপজ্ঝাযকাতি এত্থ ৱজ্জাৱজ্জং উপগন্ত্ৱা ঝাযতীতি উপজ্ঝাযো, সো নত্থি এতেসন্তি অনুপজ্ঝাযকাতি অত্থং দস্সেন্তো আহ ‘‘ৱজ্জাৱজ্জ’’ন্তিআদি. ‘‘পিণ্ডায চৰণকপত্ত’’ন্তি ইমিনা পিণ্ডায উদ্দিস্স, উট্ঠহিত্ৱা ৱা তিট্ঠতি অনেনাতি উত্তিট্ঠো, সোযেৱ পত্তো উত্তিট্ঠপত্তোতি অত্থং দস্সেতি. ‘‘উত্তিট্ঠে ন পমজ্জেয্যা’’তিআদীসু (ধ. প. ১৬৮) পন পিণ্ডায চৰণং ‘‘উত্তিট্ঠ’’ন্তি ৱুচ্চতি. তস্মা তত্থ পিণ্ডায উদ্দিস্স, উট্ঠহিত্ৱা ৱা তিট্ঠনং উত্তিট্ঠন্তি ৱচনত্থো কাতব্বো. ‘‘পিণ্ডায চৰণপত্ত’’ন্তি ইদং ৱচনং ‘‘তস্মিঞ্হি মনুস্সা উচ্ছিট্ঠসঞ্ঞিনো’’তিপদং লঙ্ঘিত্ৱা ‘‘তস্মা উত্তিট্ঠপত্তন্তি ৱুত্ত’’ন্তিপদেন যোজেতব্বং, তস্মা পিণ্ডায চৰণকপত্তত্তা উত্তিট্ঠপত্তন্তি ৱুত্তন্তি ৱুত্তং হোতি. তস্মিং মনুস্সা কিংসঞ্ঞিনোতি আহ ‘‘তস্মিঞ্হি মনুস্সা উচ্ছিট্ঠসঞ্ঞিনো’’তি. তস্মিঞ্হি তস্মিং এৱ উত্তিট্ঠপত্তে পব্বজিতানং পৰিভোগভাৱেন মনুস্সেহি অৱসজ্জিতব্বত্তা, অৱছড্ডেতব্বত্তা ৱা মনুস্সা উচ্ছিট্ঠসঞ্ঞিনো হোন্তীতি যোজনা. পব্বজিতানং পিণ্ডায চৰণকপত্তত্তা উত্তিট্ঠপত্তন্তি ৱুত্তং, মনুস্সানং পন অৱসজ্জিতপত্তত্তা উচ্ছিট্ঠপত্তন্তি ৱুত্তন্তি অধিপ্পাযো. উত্তিট্ঠ পত্তন্তিপদং ৱাক্যমেৱ, ন সমাসোতিপি দস্সেন্তো আহ ‘‘অথ ৱা’’তিআদি. ‘‘উট্ঠহিত্ৱা’’তি ইমিনা উত্তিট্ঠাতি এত্থ ত্ৱালোপোতি দস্সেতি. ‘‘গহেতু’’ন্তি ইমিনা পাঠসেসং দস্সেতি. গেহসিতপেমৱসেনাতি গেহে নিস্সিতপেমৱসেন, মেত্তাপুব্বঙ্গমপেমৱসেনাতি অত্থো. সগাৰৱা হুত্ৱা সপ্পতিস্সা হুত্ৱা ৱিহৰন্তাতি অত্থং দস্সেন্তো আহ ‘‘উপট্ঠপেত্ৱা’’তি. ‘‘সভাগজীৱিকা’’তি ইমিনা সভাগৱুত্তিকাতি এত্থ ৱুত্তিসদ্দো জীৱিকত্থোযেৱ, ন ৱিৱৰণাদ্যত্থোতি দস্সেতি. উপজ্ঝাযভাৱং সম্পটিচ্ছতি এতেহীতি উপজ্ঝাযভাৱসম্পটিচ্ছনানি, তানিযেৱ ৱেৱচনানি উপজ্ঝাযভাৱসম্পটিচ্ছনৱেৱচনানি. তিক্খত্তুন্তি উক্কট্ঠৱসেন ৱুত্তং, সকিম্পি ৱট্টতিযেৱ. পদস্স ৱসেন ৱিঞ্ঞাপেতীতি সম্বন্ধো. হীতি সচ্চং. এত্থাতি উপজ্ঝাযগহণট্ঠানে. যদিদং ৱাচায ৱা সাৱনং, যদিদং কাযেন ৱা অত্থৱিঞ্ঞাপনং অত্থি, ইদমেৱ সাৱনঅত্থৱিঞ্ঞাপনমেৱ উপজ্ঝাযগহণন্তি যোজনা. সাধূতি সম্পটিচ্ছনন্তি উপজ্ঝাযেন পঞ্চসু পদেসু যস্মিং কিস্মিংচি ৱুত্তে সদ্ধিৱিহাৰিকস্স ‘‘সাধূ’’তি সম্পটিচ্ছনং. তন্তি কেসঞ্চি ৱচনং. হীতি সচ্চং, যস্মা ৱা. এত্থাতি উপজ্ঝাযগহণে. ‘‘ন সম্পটিচ্ছনং অঙ্গ’’ন্তি ইমিনা আযাচনদানানিযেৱ অঙ্গানি নামাতি দস্সেতি. সদ্ধিৱিহাৰিকেনাপি ঞাতুন্তি সম্বন্ধো. ইমিনা পদেনাতি ‘‘সাধূ’’তি ইমিনা পদেন.

তত্ৰাযং সম্মাৱত্তনাতি এত্থ তসদ্দস্স ৱিসযং দস্সেতুং ৱুত্তং ‘‘যং ৱুত্তং সম্মা ৱত্তিতব্ব’’ন্তি. ইমিনা কিৰিযাৱিসযভাৱমেৱ দীপেতি, ন দব্বৱিসযভাৱং. অযন্তি ৱুচ্চমানা. অস্সাতি সদ্ধিৱিহাৰিকস্স. ধোতপাদপৰিহৰণত্থাযাতি ধোতস্স পাদস্স পংসুমক্খনাদীনং পৰিহৰণত্থায. তাতি উপাহনাযো. কালস্সেৱাতি পচ্চূসকালতোযেৱ, নিস্সক্কত্থে চেতং সামিৱচনং. ততোতি তেহি তীহি দন্তকট্ঠেহি, ৱিভত্তঅপাদানমেতং. তেসু ৱা তীসু দন্তকট্ঠেসু. যন্তি যং দন্তকট্ঠং. অথাতি তস্মিং গহণে.

ততোতি সীতুণ্হোদকেহি, সীতুণ্হোদকেসু ৱা. ৱড়ঞ্জেতীতি পৰিভুঞ্জতি. উদকন্তি মুখধোৱনোদকং. ‘‘ৱচ্চকুটিতো’’তি ইমিনা পস্সাৱকুটীপি গহেতব্বা. এৱন্তি সম্মজ্জিযমানে. অসুঞ্ঞন্তি জনসদ্দতো অতুচ্ছং. আসনন্তি থেৰস্স আসনং. তস্মিন্তি আসনে. নিসিন্নস্স থেৰস্স ৱত্তং কাতব্বন্তি সম্বন্ধো. উক্লাপো অস্মিং দেসে অত্থীতি উক্লাপোতি অত্থং দস্সেন্তো আহ ‘‘কেনচি কচৱৰেন সংকিণ্ণো’’তি. এত্থ চ সঙ্কাৰো উচ্ছিট্ঠো কলাপো সমূহো উক্লাপোতি ৱচনত্থেন উক্লাপোতি ৱুচ্চতি. কচীযতি বন্ধীযতি অস্মিং দেসেতি কচো, সো ৱৰীযতি ইচ্ছীযতি অনেনাতি কচৱৰোতি ৱচনত্থেন কচৱৰোতি ৱুচ্চতি. হত্থেনপীতি এত্থ পিসদ্দো পিলোতিকেনপীতিআদিং সঙ্গণ্হাতি.

একতো কত্ৱাতি একতো সমানপটলং কত্ৱা. কস্মা সঙ্ঘাটীতি আহ ‘‘সব্বং হী’’তিআদি. ‘‘সঙ্ঘটিতত্তা’’তি ইমিনা সংহৰিতব্বাতি সঙ্ঘাটীতি ৱচনত্থং দস্সেতি. নিৱত্তিত্ৱা ওলোকেন্তং উপজ্ঝাযং সংপাপুণাতীতি যোজনা. একেন ৱা পদৱীতিহাৰেনাতি সম্বন্ধো. পত্তোযেৱ উণ্হভাৰিকেসু পৰিযাপন্নোতি পত্তপৰিযাপন্নো, পত্তে পৰিযাপন্নো যাগুআদিকো পত্তপৰিযাপন্নোতিপি যুজ্জতিযেৱ. ভিক্খাচাৰেতি ভিক্খাচাৰট্ঠানে. যাগুযা ৱা লদ্ধাযাতি সম্বন্ধো. তস্সাতি উপজ্ঝাযস্স. সো পত্তোতি উণ্হাদীসু পৰিযাপন্নো সো পত্তো. অঞ্ঞত্ৰ ৱাতি আৰামাদীসু ৱা. তস্সাতি উপজ্ঝাযস্স. ৱচনে অনিট্ঠিতেতি সম্বন্ধো. ইতো পট্ঠাযাতি ‘‘ন উপজ্ঝাযস্স ভণমানস্সা’’তি এত্থ ৱুত্তনকাৰতো পট্ঠায. ইমিনা হেট্ঠা ৱুত্তেসু ‘‘নাতিদূৰে গন্তব্ব’’ন্তিআদীসু নকাৰপটিসিদ্ধেসু আপত্তি নত্থীতি দস্সেতি. যত্থ কত্থচীতি ‘‘ন চ উণ্হে চীৱৰং নিদহিতব্ব’’ন্তিআদীসু যেসু কেসুচি. অযন্তি দুক্কটাপত্তি. হীতি সচ্চং. আপত্তিসামন্তাতি এত্থ আপত্তিযা সামন্তা আপত্তিসামন্তাতি অত্থং দস্সেন্তো আহ ‘‘আপত্তিযা আসন্ন’’ন্তি. ‘‘আসন্ন’’ন্তি ইমিনা সামন্তাসদ্দস্স আসন্নৱেৱচনতঞ্চ উপযোগত্থে নিস্সক্কৱচনতঞ্চ দস্সেতি. ঈদিসং ৱচনং ভন্তে ৱত্তুং ৱট্টতি নামাতি যোজনা.

গামতো পঠমতৰন্তি গামতো উপজ্ঝাযস্স পঠমতৰং. তেনেৱাতি উপজ্ঝাযেনেৱ. নিৱত্তন্তেন সদ্ধিৱিহাৰিকেনাতি সম্বন্ধো. ‘‘তিন্ত’’ন্তি ৱত্ৱা তমেৱত্থং দস্সেতুং ৱুত্তং ‘‘সেদগ্গহিত’’ন্তি. ইমিনা সেদেন সীদতীতি সিন্নন্তি অত্থং দস্সেতি. ‘‘অতিৰেকং কত্ৱা’’তি ইমিনা উস্সাৰেত্ৱাতিপদস্স অধিপ্পাযত্থং দস্সেতি, উদ্ধং উদ্ধং সাৰেত্ৱাতি ৱুত্তং হোতি. পচ্ছিমৱাক্যস্স পুব্বৱাক্যকাৰণভাৱং দস্সেতুং ৱুত্তং ‘‘কিং কাৰণা’’তি. মজ্ঝে ভঙ্গস্স দোসং আৱিকৰোন্তো আহ ‘‘সমং কত্ৱা’’তিআদি. ততোতি সমং কত্ৱা সংহৰণতো, নিচ্চং ভিজ্জমানন্তি সম্বন্ধো. মজ্ঝে ভঙ্গতো ৱা, দুব্বলন্তি সম্বন্ধো. এতন্তি ‘‘চতুৰঙ্গুলং কণ্ণং উস্সাৰেত্ৱা’’তি এতং ৱচনং. যথাতি যেনাকাৰেন সংহৰিযমানেতি সম্বন্ধো. চীৱৰভোগস্স ওৰো অন্তো ওভোগোতি অত্থং দস্সেন্তো আহ ‘‘কাযবন্ধন’’ন্তিআদি.

যোতি উপজ্ঝাযো. ‘‘গামেযেৱা’’তি ৱত্ৱা তমেৱত্থং দস্সেতুং ৱুত্তং ‘‘অন্তৰঘৰে ৱা পটিক্কমনে ৱা’’তি. পটিক্কমনে ৱাতি ভোজনসালাযং ৱা. তস্সাতি উপজ্ঝাযস্স. লদ্ধা ভিক্খা যেনাতি লদ্ধভিক্খো, তস্স ৱা. পিণ্ডপাতো হোতীতি যোজনা. তস্সাতি উপজ্ঝাযস্স. পিণ্ডপাতো ন হোতীতি সম্বন্ধো. অত্তনা লদ্ধোপীতি পিসদ্দো উপজ্ঝাযেন লদ্ধোপীতি অত্থং সম্পিণ্ডেতি. আহৰিযতূতি এত্থ তুৱিভত্তি পুচ্ছাযং হোতি, আহৰিযতু কিন্তি অত্থো. কালোতি ভোজনকালো. ভুঞ্জিত্থাতি ভুত্তো, তস্মিং সতীতি সম্বন্ধো. উপকট্ঠোতি মজ্ঝন্হিকস্স আসন্নো.

অনন্তৰহিতাযাতি এত্থ অন্তৰধাযতীতি অন্তৰহিতো, তট্টিকচম্মখণ্ডাদি, নত্থি অন্তৰহিতো এতস্মিং পত্তভূমীনমন্তৰেতি অনন্তৰহিতোতি অত্থং দস্সেন্তো আহ ‘‘অনত্থতাযা’’তি. কাড়ৱণ্ণকতা ৱা সুধাবদ্ধা ৱা নিৰজমত্তিকা হোতীতি যোজনা. তন্তি পত্তং. ধোতৱালিকাযপীতি সুদ্ধৱালিকাযপি. তত্থাতি পংসুৰজসক্খৰাদীসু. পুন তত্থাতি পণ্ণাধাৰকেসু. ইদং ৱচনং ৱুত্তন্তি সম্বন্ধো. অভিমুখেনাতি অত্তনো অভিমুখেন. সণিকন্তি সিন্নং. অন্তে পনাতি চীৱৰস্স কোটিযং পন. নিক্খিপন্তস্স সদ্ধিৱিহাৰিকস্স চীৱৰস্স ভোগোতি যোজনা.

চুণ্ণং সন্নেতব্বন্তি এত্থ চুণ্ণসমোধানেন নেতব্বন্তি অত্থং দস্সেন্তো আহ ‘‘পিণ্ডি কাতব্বা’’তি. ‘‘একস্মিং নিদ্ধূমে ঠানে’’তি ইমিনা একমন্তন্তি এত্থ একস্মিং অন্তে ঠানেতি অত্থং দস্সেতি. জন্তাঘৰেতি অগ্গিসালাযং. সা হি জলতি দিব্বতি অগ্গি এত্থাতি জন্তা, জনেতি সৰীৰসেদমেত্থাতি ৱা জন্তা, সা এৱ ঘৰং জন্তাঘৰন্তি ৱুচ্চতি, তস্মিং. পৰিপূজাৱসেন কৰীযতীতি পৰিকম্মন্তি অত্থেন অঙ্গাৰদানাদিকং পৰিকম্মং নামাতি দস্সেন্তো আহ ‘‘পৰিকম্মং নামা’’তিআদি.

‘‘ন কেনচি গেলঞ্ঞেনা’’তিআদিনা উস্সহনস্স কাৰণং দস্সেতি. হীতি সচ্চং. অগিলানেন সট্ঠিৱস্সেন সদ্ধিৱিহাৰিকেনাপি কাতব্বন্তি যোজনা. অনাদৰেনাতি ৱত্তকৰণস্স অনাদৰেন. নকাৰপটিসংযুত্তেসূতি পটিসেধৱাচকেন নকাৰেন পটিসংযুত্তেসু. পদেসূতি ‘‘ন উপজ্ঝাযস্স ভণমানস্স অন্তৰন্তৰা কথা ওপাতেতব্বা’’তিআদীসু ৱাক্যেসু. ভূমিযন্তি উপলক্খণৱসেন ৱুত্তং ভিত্তিযম্পি অপটিঘংসিতব্বত্তা. ‘‘পিঠসঙ্ঘাটঞ্চা’’তি ইমিনা কৱাটপীড়ন্তি এত্থ পীঠসদ্দেন পিঠসঙ্ঘাটং ৱুচ্চতি উত্তৰপদলোপৱসেন ৱা একদেসৱোহাৰৱসেন ৱাতি দস্সেতি. ‘‘অচ্ছুপন্তেনা’’তি ইমিনা অপ্পটিঘংসন্তেনাতি এত্থ ঘংসধাতুযা অত্থং দস্সেতি. সম্মা তাযতি অত্তানঞ্চ পৰঞ্চ অনেনাতি সন্তানং, তমেৱ সন্তানকন্তি অত্থেন কীটকুলাৱকমক্কটকসুত্তাদি সন্তানকং নামাতি দস্সেন্তো আহ ‘‘সন্তানক’’ন্তিআদি. উল্লোকতোতি ৱিতানতো. তঞ্হি উদ্ধং লুচীযতে বন্ধীযতেতি উল্লোকন্তি ৱুচ্চতি, চকাৰস্স ককাৰমকত্ৱা ‘‘উল্লোচ’’ন্তিপি ৱুচ্চতি. তোসদ্দেন আকাৰস্স স্মাৱচনস্স কাৰিযভাৱং দস্সেতি. অপহৰিতব্বন্তি অপনেতব্বং. ‘‘অৱহৰিতব্ব’’ন্তিপি পাঠো, হেট্ঠা হৰিতব্বং পাতেতব্বন্তি অত্থো.

আলোকসন্ধিভাগাতি এত্থ ভাগসদ্দস্স দ্ৱন্দতো পৰত্তা পুব্বপদেসুপি পচ্চেকং যোজেতব্বোতি আহ ‘‘আলোকসন্ধিভাগা চ কণ্ণভাগা চা’’তি. তস্স অত্থং দস্সেন্তো আহ ‘‘অন্তৰবাহিৰা’’তিআদি. ‘‘ৱাতপানকৱাটকানী’’তি ইমিনা আলোকসন্ধিসদ্দস্স ৱাতপানকৱাটকপৰিযাযভাৱং দস্সেতি. ‘‘কোণা’’তি ইমিনা কণ্ণসদ্দস্স কোণৱেৱচনভাৱং দস্সেতি.

‘‘যথা পঠম’’ন্তিআদিনা পঠমপঞ্ঞত্তমেৱ পঞ্ঞপেতব্বং, ন অঞ্ঞথাতি দস্সেতি. ইদং পতিৰূপং পঠমপঞ্ঞত্তং সন্ধায ৱুত্তং. পঠমপঞ্ঞত্তে অপতিৰূপে অঞ্ঞথাপি পঞ্ঞপেতব্বং. এতদত্থমেৱাতি যথাপঞ্ঞত্তং পঞ্ঞপেতব্বস্স অত্থায এৱ. সচে পঞ্ঞত্তং অহোসি, এৱং সতীতি যোজনা. ইদন্তি ভিত্তিং মোচেত্ৱা পঞ্ঞাপনং. কটেসু কিড়ঞ্জেসু সাৰত্তা উত্তমত্তা কটসাৰকোতি ৱুচ্চতি. নিৱত্তেত্ৱাতি সংহৰিত্ৱা. পুৰত্থিমাতি এত্থ যকাৰলোপেন নিদ্দেসোতি আহ ‘‘পুৰত্থিমাযা’’তি.

ৱূপকাসেতব্বোতি এত্থ কসধাতু গত্যত্থোতি আহ ‘‘অঞ্ঞত্থ নেতব্বো’’তি. উপজ্ঝাযং গহেত্ৱা অঞ্ঞত্থ গন্তব্বোতি অত্থো. অঞ্ঞত্থাতি অঞ্ঞং ঠানং. ৱিৱেচেতব্বন্তি এত্থ দিট্ঠিগততো উপজ্ঝাযং ৱিৱেচেতব্বন্তি দস্সেন্তো আহ ‘‘ৱিস্সজ্জাপেতব্ব’’ন্তি. ‘‘অঞ্ঞো ৱত্তব্বো’’তি ৱত্ৱা তস্স আকাৰং দস্সেতি ‘‘থেৰ’’ন্তিআদিনা. সো সো ভিক্খু যাচিতব্বোতি সম্বন্ধো. অঞ্ঞেন দাপেতব্বোতি অত্তনা অঞ্ঞেন ভিক্খুনা উপজ্ঝাযস্স পৰিৱাসো দাপেতব্বোতি অত্থো. কিন্তি নু খোতি কেন এৱ উপাযেন দদেয্য নুখোতি অত্থো. ইতিসদ্দো হি অৱধাৰণত্থো. অট্ঠকথাযপি ইমমেৱ নযং দস্সেতি ‘‘কেন নু খো উপাযেনা’’তি ইমিনা. সব্বত্থাতি সব্বেসু ‘‘কিন্তি নু খো পটিকস্সেয্যা’’তিআদিৱাক্যেসু. সত্তসু কম্মেসু তিৱিধস্স উক্খেপনীযকম্মস্স গৰুকত্তা ৱুত্তং ‘‘উক্খেপনীযং অকত্ৱা’’তি. তমেৱত্থং ৱিত্থাৰেন্তো আহ ‘‘তেন হী’’তিআদি.

তেন সদ্ধিৱিহাৰিকেন যাচিতব্বাতি সম্বন্ধো. সচে কৰোন্তিযেৱাতি ভিক্খূ সচে কম্মং কৰোন্তিযেৱ. পুন সচে কৰোন্তিযেৱাতি ভিক্খূ সচে উক্খেপনীযকম্মং কৰোন্তিযেৱ. অথাতি তস্মিং কম্মে কতে. ইতীতি এৱং যাচনেন. নন্তি তং উপজ্ঝাযং.

সম্পৰিৱত্তকন্তি এত্থ ‘‘পিণ্ডুক্খেপক’’ন্তিআদীসু (পাচি. ৬২০) ৱিয সম্পৰিৱত্তকন্তিপদং কিৰিযাৱিসেসনং, কপচ্চযো চ ৱিচ্ছত্থোতি আহ ‘‘সম্পৰিৱত্তেত্ৱা সম্পৰিৱত্তেত্ৱা’’তি. যদীতি যাৱ. যদিসদ্দো হি যাৱপৰিযাযো, তেন ৱুত্তং ‘‘ন তাৱ পক্কমিতব্ব’’ন্তি. যাৱ অপ্পমত্তকম্পি ৰজনং গলতি, ন তাৱ পক্কমিতব্বন্তি যোজনা. ৱিসভাগপুগ্গলেনাতি ৱিসভাগেন পুগ্গলেন কৰণভূতেন. ন উপজ্ঝাযং অনাপুচ্ছা গামো পৱিসিতব্বোতি এত্থ ন অঞ্ঞেনেৱ কৰণীযেন পৱিসিতব্বো. পিণ্ডায পন পৱিসিতব্বোতি আসঙ্কা ভৱেয্যাতি আহ ‘‘পিণ্ডায ৱা’’তিআদি. ‘‘অনাপুচ্ছিত্ৱা’’তি ইমিনা অনাপুচ্ছাতি এত্থ আকাৰো ত্ৱাপচ্চযস্স কাৰিযোতি দস্সেতি. ভিক্খাচাৰন্তি ভিক্খায চৰণট্ঠানং, উপজ্ঝাযেন গন্তব্বন্তি যোজনা. পৰিৱেণন্তি উপজ্ঝাযস্স পৰিৱেণং. পস্সতীতি উপজ্ঝাযং পস্সতি.

দস্সনত্থায ৱাতি অসুভদস্সনত্থায ৱা. ইমিনাপি ৱাসত্থায এৱ ন গন্তব্বন্তি আসঙ্কং নিৱত্তেতি. কম্মন্তি পক্কমনস্স কাৰণং কম্মং. অননুজাননং সন্ধায ৱুত্তং ‘‘যাৱততিয’’ন্তি. তন্তি উপজ্ঝাযং. অস্সাতি সদ্ধিৱিহাৰিকস্স. ‘‘ন সম্পজ্জতী’’তি ইমিনা সচে সম্পজ্জতি, ন পক্কমিতব্বাতি দস্সেতি. কেৱলন্তি ৱিনা উদ্দেসাদিসম্পজ্জনেহি. এৱৰূপে উপজ্ঝাযে নিৱাৰেন্তেপীতি যোজনা. ‘‘গেলঞ্ঞতো’’তি ইমিনা ৱুট্ঠানসদ্দস্স অৱধিঅপেক্খতং দস্সেতি. অস্সাতি উপজ্ঝাযস্স. অঞ্ঞোতি অত্তনা অঞ্ঞো. তস্সাতি অঞ্ঞস্স ভিক্খুস্স.