১২. উৰুৱেলপাটিহাৰিযকথা

৩৮. পৰিযাদিযেয্যন্তি এত্থ দাধাতুস্স পৰীতি চ আতি চ উপসগ্গৱসেন অভিভৱনত্থোতি আহ ‘‘অভিভৱেয্য’’ন্তি.

৩৯. পচ্ছা পক্খিত্তাতি সঙ্গীতিতো পৰং পোত্থকাৰূড়্হেহি ঠপিতাতি অত্থো.

৪৪. ‘‘এৱং ৱদন্তো ৱিয ওণতো’’তি ইমিনা ‘‘আহৰহত্থো’’তিপদস্স তদ্ধিতভাৱং দস্সেতি. ৱিত্থিণ্ণমুখত্তা মন্দং হীনং অতিমুখমেতাসন্তি ৱচনত্থেন অগ্গিকপালা মন্দামুখিযোতি ৱুচ্চন্তীতি আহ ‘‘অগ্গিভাজনানি ৱুচ্চন্তী’’তি.

৫১. যস্মা যো নাগদমনকালো চিৰং পততি পৱত্ততি, তস্মা সো চিৰপতিকোতি ৱুচ্চতি, তস্মা চিৰপতিকা পট্ঠায অভিপ্পসন্নাতি যোজনা. ইতি ইমমত্থং দস্সেন্তো আহ ‘‘চিৰকালতো পট্ঠাযা’’তি.

৫২. সব্বত্থাতি সব্বেসু ‘‘জটামিস্স’’ন্তিআদিপদেসু. খাৰিকাজন্তি এত্থ কমণ্ডলুআদিকা তাপসপৰিক্খাৰা খাৰীতি ৱুচ্চন্তি, খাৰিসঙ্খাতেন ভাৰেন পূৰিতো কাজো খাৰিকাজোতি অত্থং একদেসেন দস্সেন্তো আহ ‘‘খাৰিভাৰো’’তি.