৮. অট্ঠমসিক্খাপদং

৯১৬. অট্ঠমে যে নাটকং নাটেন্তি, তে নটা নামাতি যোজনা. ইমিনা নটকং নাটেন্তীতি নটাতি ৱচনত্থং দস্সেতি. যে নচ্চন্তি, তে নাটকা নামাতি যোজনা. ইমিনা সযং নটন্তীতি নাটকাতি ৱচনত্থং দীপেতি. ৱংসৱৰত্তাদীসূতি এত্থ ৱংসো নাম ৱেণু. ৱৰত্তা নাম নদ্ধিকা. আদিসদ্দেন ৰজ্জুআদযো সঙ্গণ্হাতি. যে লঙ্ঘনকম্মং কৰোন্তি, তে লঙ্ঘকা নামাতি যোজনা. মাযাকাৰাতি এত্থ মাযা নাম মযনামকেন অসুৰেন সুৰে চলযিতুং কতত্তা মযস্স এসাতি মাযা, তং কৰোতীতি মাযাকাৰো, মযনামকো অসুৰোযেৱ. অঞ্ঞে পন ৰূড়্হীৱসেন ‘‘মাযাকাৰা’’তি ৱুচ্চন্তি. সোকেন ঝাযনং ডয্হনং সোকজ্ঝাযং, সুৰানং সোকজ্ঝাযং কৰোতীতি সোকজ্ঝাযিকো, মযনামকো অসুৰোযেৱ. অঞ্ঞে পন ৰূড়্হীৱসেন ‘‘সোকজ্ঝাযিকা’’তি ৱুচ্চন্তি. ইতি ইমমত্থং দস্সেতুং ৱুত্তং ‘‘সোকজ্ঝাযিকা নাম মাযাকাৰা’’তি. কুম্ভথুণিকা নামাতি এত্থ ৱিস্সট্ঠত্তা থৱীযতীতি থুণো, সদ্দো. কুম্ভস্স থুণো কুম্ভথুণো. তেন কীড়ন্তীতি কুম্ভথুণিকা, ইতি ইমমত্থং দস্সেতি ‘‘ঘটকেন কীড়নকা’’তি ইমিনা. বিম্বিসকন্তি চতুৰস্সঅম্বণতাড়নং, তং ৱাদেন্তীতি বিম্বিসকৱাদকাতি. অট্ঠমং.