৩. নগ্গৱগ্গো

১. পঠমসিক্খাপদ-অত্থযোজনা

৮৮৩. নগ্গৱগ্গস্স পঠমে ব্ৰহ্মচৰিযেন চিণ্ণেনাতি চিণ্ণেন ব্ৰহ্মচৰিযেন কিং নু খো নামাতি অত্থো. ‘‘ব্ৰহ্মচৰিযস্স চৰণেনা’’তি ইমিনা চিণ্ণসদ্দস্স চৰণং চিণ্ণন্তি ৱচনত্থং দস্সেতি. ‘‘ন অঞ্ঞং চীৱৰ’’ন্তি ইমিনা এৱত্থং দস্সেতি, অঞ্ঞত্থাপোহনং ৱাতি. পঠমং.

২. দুতিযসিক্খাপদং

৮৮৭. দুতিযে অনুত্তানট্ঠানং নত্থীতি. দুতিযং.

৩. ততিযসিক্খাপদং

৮৯৩. ততিযে অনন্তৰাযিকিনীতি এত্থ নত্থি অন্তৰাযো এতিস্সাতি অনন্তৰাযা, সা এৱ অনন্তৰাযিকিনীতি ৱচনত্থং দস্সেন্তো আহ ‘‘অনন্তৰাযা’’তি. ততিযং.

৪. চতুত্থসিক্খাপদং

৮৯৮. চতুত্থে পঞ্চাহন্তি সমাহাৰদিগু, ণিকপচ্চযো স্ৱত্থো. সঙ্ঘাটিচাৰোতিএত্থ কেনট্ঠেন সঙ্ঘাটি নাম, চাৰসদ্দো কিমত্থোতি আহ ‘‘পৰিভোগৱসেন ৱা’’তিআদি. তত্থ সঙ্ঘটিতট্ঠেনাতি সংহৰিতট্ঠেন. ইমিনা ‘‘কেনট্ঠেন সঙ্ঘাটি নামা’’তি পুচ্ছং ৱিসজ্জেতি. ‘‘পৰিৱত্তন’’ন্তি ইমিনা ‘‘চাৰসদ্দো কিমত্থো’’তি চোদনং পৰিহৰতি. পঞ্চসূতি তিচীৱৰং উদকসাটিকা সংকচ্চিকাতি পঞ্চসূতি. চতুত্থং.

৫. পঞ্চমসিক্খাপদং

৯০৩. পঞ্চমে ‘‘চীৱৰসঙ্কমনীয’’ন্তিএত্থ সঙ্কমেতব্বং পটিদাতব্বন্তি সঙ্কমনীযন্তি কমুধাতুস্স পটিদানত্থঞ্চ অনীযসদ্দস্স কম্মত্থঞ্চ, ‘চীৱৰঞ্চ তং সঙ্কমনীযঞ্চে’তি চীৱৰসঙ্কমনীযন্তি ৱিসেসনপৰপদভাৱঞ্চ দস্সেন্তো আহ ‘‘সঙ্কমেতব্বং চীৱৰ’’ন্তি. তত্থ ‘‘সঙ্কমেতব্বং চীৱৰ’’ন্তি ইমিনা কম্মত্থঞ্চ ৱিসেসনপৰপদভাৱঞ্চ দস্সেতি. ‘‘পটিদাতব্বচীৱৰ’’ন্তি ইমিনা কমুধাতুযা অত্থং দস্সেতি অধিপ্পাযৱসেনাতি. পঞ্চমং.

৬. ছট্ঠসিক্খাপদং

৯০৯. ছট্ঠে ‘‘অঞ্ঞং পৰিক্খাৰ’’ন্তিএত্থ পৰিক্খাৰস্স সৰূপং দস্সেন্তো আহ ‘‘যংকিঞ্চী’’তিআদি. যংকিঞ্চি অঞ্ঞতৰন্তি সম্বন্ধো. কিত্তকংঅগ্ঘনকন্তি কিং পমাণেন অগ্ঘেন অৰহং চীৱৰং. দাতুকামত্থাতি তুম্হে দাতুকামা ভৱথাতি অত্থো. কতিপাহেনাতি কতিপযানি অহানি কতিপাহং, যকাৰলোপো. কতিপযসদ্দোহি দ্ৱিতিৱাচকো ৰূড়্হীসদ্দো, তেন কতিপাহেন. সমগ্ঘন্তি অপ্পগ্ঘং. সংসদ্দো হি অপ্পত্থৱাচকোতি. ছট্ঠং.

৭. সত্তমসিক্খাপদং

৯১১. সত্তমে ‘‘ৱিপক্কমিংসূ’’তি এত্থ ৱিৱিধং ঠানং পক্কমিংসূতি দস্সেন্তো আহ ‘‘তত্থ তত্থ অগমংসূ’’তি. অম্হাকম্পি আগমনন্তি সম্বন্ধো.

৯১৫. কতিপাহেন উপ্পজ্জিস্সতীতি কতিপাহেন চীৱৰং উপ্পজ্জিস্সতি. ততোতি তস্মিং চীৱৰুপ্পজ্জনকালেতি. সত্তমং.

৮. অট্ঠমসিক্খাপদং

৯১৬. অট্ঠমে যে নাটকং নাটেন্তি, তে নটা নামাতি যোজনা. ইমিনা নটকং নাটেন্তীতি নটাতি ৱচনত্থং দস্সেতি. যে নচ্চন্তি, তে নাটকা নামাতি যোজনা. ইমিনা সযং নটন্তীতি নাটকাতি ৱচনত্থং দীপেতি. ৱংসৱৰত্তাদীসূতি এত্থ ৱংসো নাম ৱেণু. ৱৰত্তা নাম নদ্ধিকা. আদিসদ্দেন ৰজ্জুআদযো সঙ্গণ্হাতি. যে লঙ্ঘনকম্মং কৰোন্তি, তে লঙ্ঘকা নামাতি যোজনা. মাযাকাৰাতি এত্থ মাযা নাম মযনামকেন অসুৰেন সুৰে চলযিতুং কতত্তা মযস্স এসাতি মাযা, তং কৰোতীতি মাযাকাৰো, মযনামকো অসুৰোযেৱ. অঞ্ঞে পন ৰূড়্হীৱসেন ‘‘মাযাকাৰা’’তি ৱুচ্চন্তি. সোকেন ঝাযনং ডয্হনং সোকজ্ঝাযং, সুৰানং সোকজ্ঝাযং কৰোতীতি সোকজ্ঝাযিকো, মযনামকো অসুৰোযেৱ. অঞ্ঞে পন ৰূড়্হীৱসেন ‘‘সোকজ্ঝাযিকা’’তি ৱুচ্চন্তি. ইতি ইমমত্থং দস্সেতুং ৱুত্তং ‘‘সোকজ্ঝাযিকা নাম মাযাকাৰা’’তি. কুম্ভথুণিকা নামাতি এত্থ ৱিস্সট্ঠত্তা থৱীযতীতি থুণো, সদ্দো. কুম্ভস্স থুণো কুম্ভথুণো. তেন কীড়ন্তীতি কুম্ভথুণিকা, ইতি ইমমত্থং দস্সেতি ‘‘ঘটকেন কীড়নকা’’তি ইমিনা. বিম্বিসকন্তি চতুৰস্সঅম্বণতাড়নং, তং ৱাদেন্তীতি বিম্বিসকৱাদকাতি. অট্ঠমং.

৯. নৱমসিক্খাপদং

৯২১. নৱমে তেসন্তি যে ‘‘ন মযং অয্যে সক্কোমা’’তি ৱদন্তি, তেসং. দস্সতীতি অচ্ছাদেস্সতীতি. নৱমং.

১০. দসমসিক্খাপদং

৯২৭. দসমে যস্সাতি কথিনস্স. উব্ভাৰমূলকোতি উদ্ধাৰমূলকো. সদ্ধাপৰিপালনত্থন্তি কথিনুদ্ধাৰং যাচন্তস্স সদ্ধায পৰিপালনত্থন্তি. দসমং.

নগ্গৱগ্গো ততিযো.