৪. তুৱট্টৱগ্গো

১. পঠমসিক্খাপদ-অত্থযোজনা

৯৩৩. তুৱট্টৱগ্গস্স পঠমে ‘‘তুৱট্ট নিপজ্জায’’ন্তি ধাতুপাঠেসু (সদ্দনীতিধাতুমালাযং ১৮ টকাৰন্তধাতু) ৱুত্তত্তা ‘‘তুৱট্টেয্যুন্তি নিপজ্জেয্যু’’ন্তি ৱুত্তন্তি. পঠমং.

২. দুতিযসিক্খাপদং

৯৩৭. দুতিযে একত্থৰণপাৱুৰণন্তিএত্থ উত্তৰপদানং দ্ৱন্দভাৱং, পুব্বপদেন চ বাহিৰত্থসমাসভাৱং দস্সেতুং ৱুত্তং ‘‘এক’’ন্তিআদি. তত্থ চেৱ, চসদ্দেহি দ্ৱন্দভাৱং দীপেতি, ‘‘এতাস’’ন্তিইমিনা বাহিৰত্থসমাসভাৱং. এতন্তি ‘‘একত্থৰণপাৱুৰণা’’তি এতং নামন্তি. দুতিযং.

৩. ততিযসিক্খাপদং

৯৪১. ততিযে উড়াৰকুলাতি জাতিসেট্ঠকুলা, ইস্সৰিযভোগাদীহি ৱা ৱিপুলকুলা. গুণেহীতি সীলাদিগুণেহি. ‘‘উড়াৰাতি সম্ভাৱিতা’’তি ইমিনা ইতিলোপতুল্যাধিকৰণসমাসং দস্সেতি.

‘‘অভিভূতা’’তি ইমিনা ‘‘অপকতা’’তি এত্থ কৰধাতু সব্বধাত্ৱত্থৱাচীপি ইধ অপপুব্বত্তা ৱিসেসতো অভিভৱনত্থে ৱত্ততীতি দস্সেতি. এতাসন্তি ভিক্খুনীনং. ‘‘সঞ্ঞাপযমানা’’তি ইমিনা সঞ্ঞাপনং সঞ্ঞত্তীতি ৱচনত্থং দস্সেতি. হেতূদাহৰণাদীহীতি এত্থ আদিসদ্দেন উপমাদযো সঙ্গণ্হাতি. ‘‘ৱিৱিধেহি নযেহি ঞাপনা’’তি ইমিনা ৱিৱিধেহি ঞাপনং ৱিঞ্ঞত্তীতি ৱচনত্থং দস্সেতি.

৯৪৩. চঙ্কমনে পদৱাৰগণনায আপত্তিযা ন কাৰেতব্বোতি আহ ‘‘নিৱত্তনগণনাযা’’তি. পদাদিগণনাযাতি পদঅনুপদাদিগণনাযাতি. ততিযং.

৪. চতুত্থসিক্খাপদং

৯৪৯. চতুত্থে অনুত্তানট্ঠানং নত্থীতি. চতুত্থং.

৫. পঞ্চমসিক্খাপদং

৯৫২. পঞ্চমে আণত্তা ভিক্খুনীতি যোজনা. ইদঞ্চ পচ্চাসন্নৱসেন ৱুত্তং যংকিঞ্চিপি আণাপেতুং সক্কুণেয্যত্তাতি. পঞ্চমং.

৬-৯. ছট্ঠাদিসিক্খাপদং

৯৫৫. ছট্ঠ-সত্তম-অট্ঠম-নৱমেসু অনুত্তানৱচনং নত্থীতি. ছট্ঠ সত্তম অট্ঠম নৱমানি.

১০. দসমসিক্খাপদং

৯৭৩. দসমে অহুন্দৰিকাতি তস্মিং কালে, দেসে ৱা সম্বাধস্স নামমেতন্তি আহ ‘‘অহুন্দৰিকাতি সম্বাধা’’তি.

৯৭৫. যথা ‘‘উত্তৰিছপ্পঞ্চৱাচাহী’’তি (পাচি. ৬২-৬৫) এত্থ পঞ্চসদ্দো ন কোচি অত্থো, ৱাচাসিলিট্ঠত্থং লোকৱোহাৰৱসেন ৱুত্তো, ন এৱমিধ, ইধ পন অত্থো অত্থি, পঞ্চ যোজনানি গচ্ছন্তিযাপি অনাপত্তিযেৱাতি আহ ‘‘পৱাৰেত্ৱা…পে… অনাপত্তী’’তি. পচ্চাগচ্ছতীতি পটিনিৱত্তেত্ৱা আগচ্ছতীতি. দসমং.

তুৱট্টৱগ্গো চতুত্থো.