২. অন্ধকাৰৱগ্গো

১. পঠমসিক্খাপদ-অত্থযোজনা

৮৩৯. অন্ধকাৰৱগ্গস্স পঠমে অপ্পদীপেতি উপলক্খণৱসেন ৱুত্তত্তা অঞ্ঞেপি আলোকা গহেতব্বাতি দস্সেন্তো আহ ‘‘পদীপচন্দসূৰিযঅগ্গীসূ’’তিআদি. অস্সাতি ‘‘অপ্পদীপে’’তিপদস্স.

৮৪১. নৰহোঅস্সাদাপেক্খা হুত্ৱা চ ৰস্সাদতো অঞ্ঞৱিহিতাৱ হুত্ৱা চাতি যোজনা. ইমিনা ‘‘সন্তিট্ঠতি ৱা সল্লপতি ৱা’’তি পদে কিৰিযাৱিসেসনভাৱং দস্সেতি. দানেন ৱা নিমিত্তভূতেন, পূজায ৱা নিমিত্তভূতায মন্তেতীতি যোজনাতি. পঠমং.

২. দুতিযসিক্খাপদং

৮৪২. দুতিযে ইদমেৱ পদং নানন্তি সম্বন্ধোতি. দুতিযং.

৩. ততিযসিক্খাপদং

৮৪৬. ততিযে ‘‘ইদমেৱা’’তি পদং অনুৱত্তেতব্বং. তাদিসমেৱাতি পঠমসদিসমেৱাতি অত্থোতি. ততিযং.

৪. চতুত্থসিক্খাপদং

৮৫০. চতুত্থে কণ্ণস্স সমীপং নিকণ্ণং, তমেৱ নিকণ্ণিকন্তি ৱুত্তে কণ্ণমূলন্তি আহ ‘‘কণ্ণমূলং ৱুচ্চতী’’তি. ‘‘কণ্ণমূলে’’তি ইমিনা ‘‘নিকণ্ণিক’’ন্তি এত্থ ভুম্মত্থে উপযোগৱচনন্তি দস্সেতি. আহৰণত্থাযাতি আহৰাপনত্থাযাতি. চতুত্থং.

৫. পঞ্চমসিক্খাপদং

৮৫৪. পঞ্চমে তেসন্তি ঘৰসামিকানং. ঘৰম্পীতি ন কেৱলং আসনমেৱ, ঘৰম্পি সোধেমাতি অত্থো. ততোতি পৰিৱিতক্কনতো, পৰন্তি সম্বন্ধো.

৮৫৮. চোৰা ৱা উট্ঠিতা হোন্তীতি যোজনাতি. পঞ্চমং.

৬. ছট্ঠসিক্খাপদং

৮৬০. ছট্ঠে অভিনিসীদেয্যাতি এত্থ অভিসদ্দো উপসগ্গমত্তোৱাতি দস্সেন্তো আহ ‘‘নিসীদেয্যা’’তি. এসেৱ নযো অভিনিপজ্জেয্যাতি এত্থাপি. দ্ৱে আপত্তিযোতি সম্বন্ধোতি. ছট্ঠং.

৭. সত্তমসিক্খাপদং

৮৬৪. সত্তমে সব্বন্তি সকলং ৱত্তব্বৱচনন্তি. সত্তমং.

৮. অট্ঠমসিক্খাপদং

৮৬৯. অট্ঠমে অনুত্তানৱচনং নত্থীতি. অট্ঠমং.

৯. নৱমসিক্খাপদং

৮৭৫. নৱমে অভিসপেয্যাতি এত্থ সপধাতুস্স অক্কোসনত্থং অন্তোকত্ৱা কৰধাতুযা অত্থং দস্সেন্তো আহ ‘‘সপথং কৰেয্যা’’তি. নিৰযে নিব্বত্তাম্হীতি অহং নিৰযে নিব্বত্তা অম্হীতি যোজনা. নিৰযে নিব্বত্ততূতি এসা ভিক্খুনী নিৰযে নিব্বত্ততূতি যোজনা. ঈদিসা হোতূতি মম সদিসা হোতূতি অত্থো. কাণাতি একক্খিকাণা, দ্ৱক্খিকাণা ৱা. কুণীতি হত্থপাদাদিৱঙ্কা.

৮৭৮. এদিসাতি ৱিৰূপাদিজাতিকা. ৱিৰমস্সূতি ৱিৰমাহি. অদ্ধাতি ধুৱন্তি. নৱমং.

১০. দসমসিক্খাপদং

৮৭৯. দসমে অনুত্তানট্ঠানং নত্থীতি. দসমং.

অন্ধকাৰৱগ্গো দুতিযো.