৯. ছত্তুপাহনৱগ্গো

১. পঠমসিক্খাপদ-অত্থযোজনা

১১৮১. ছত্তৱগ্গস্স পঠমে কদ্দমাদীনীতি চিক্খল্লাদীনি. আদিসদ্দেন উদকাদীনি সঙ্গণ্হাতি. গচ্ছাদীনীতি খুদ্দপাদপাদীনি. আদিসদ্দেন অঞ্ঞানিপি ছত্তং ধাৰেতুং অসক্কুণেয্যানি সম্বাধট্ঠানানি সঙ্গণ্হাতীতি. পঠমং.

২. দুতিযসিক্খাপদং

১১৮৪. দুতিযে যানেনাতি যন্তি ইচ্ছিতট্ঠানং সুখেন গচ্ছন্তি অনেনাতি যানন্তি. দুতিযং.

৩. ততিযসিক্খাপদং

১১৯১. ততিযে ‘‘ৱিপ্পকিৰিযিংসূ’’তি কিৰিযাপদস্স কত্তুনা অৱিনাভাৱতো কত্তাৰং দস্সেতুং ৱুত্তং ‘‘মণযো’’তি. মণযোতি চ ৰতনানীতি. ততিযং.

৪. চতুত্থসিক্খাপদং

১১৯৪. চতুত্থে সীসূপগাদীসূতি আদিসদ্দেন গীৱূপগাদযো সঙ্গণ্হাতি. যং যন্তি অলঙ্কাৰন্তি. চতুত্থং.

৫. পঞ্চমসিক্খাপদং

১১৯৯. পঞ্চমে গন্ধেন চাতি গন্ধেতি অত্তনো ৱত্থুং সূচেতি পকাসেতীতি গন্ধো. ৱণ্ণকেন চাতি ৱিলেপনেন চ. তঞ্হি ৱণ্ণযতি ছৱিসোভং পকাসেতীতি ৱণ্ণকন্তি ৱুচ্চতি. চসদ্দেন সমাহাৰদ্ৱন্দৱাক্যং দীপেতীতি. পঞ্চমং.

৬. ছট্ঠসিক্খাপদং

১২০২. ছট্ঠে অনুত্তানৱচনং নত্থীতি. ছট্ঠং.

৭. সত্তমসিক্খাপদং

১২০৮. সত্তমে উম্মদ্দনেতি উপ্পীড়িত্ৱা মদ্দনে. সংবাহনেপীতি পুনপ্পুনং বাহনেপীতি. সত্তমং.

৮-১০. অট্ঠমাদিসিক্খাপদং

১২১০. অট্ঠমাদীসু তীসু অনুত্তানৱচনং নত্থীতি. অট্ঠমনৱমদসমানি.

১১. একাদসমসিক্খাপদং

১২১৪. একাদসমে অভিমুখমেৱাতি অভিমুখে এৱ. মুখস্স হি অভি অভিমুখন্তি ৱচনত্থো কাতব্বো, সত্তমিযা অংকাৰো. ইমিনা পুৰতোতি এত্থ তোপচ্চযো ভুম্মত্থে হোতীতি দস্সেতি. উপচাৰন্তি দ্ৱাদসহত্থূপচাৰন্তি. একাদসমং.

১২. দ্ৱাদসমসিক্খাপদং

১২১৯. দ্ৱাদসমে ‘‘অনোকাসকত’’ন্তিপদস্স অযুত্তসমাসভাৱঞ্চ ৱিসেসনপৰপদবাহিৰসমাসভাৱঞ্চ দস্সেতুং ৱুত্তং ‘‘অকতওকাস’’ন্তি. ওকাসো ন কতো যেনাতি অনোকাসকতো, ভিক্খু, তং. ‘‘অনিযমেত্ৱা’’তি ইমিনা ‘‘অনোদিস্সা’’তি পদস্স ত্ৱাপচ্চযন্তভাৱং দস্সেতীতি. দ্ৱাদসমং.

১৩. তেৰসমসিক্খাপদং

১২২৬. তেৰসমে উপচাৰেপীতি অপৰিক্খিত্তস্স গামস্স পৰিক্খেপাৰহট্ঠানসঙ্খাতে উপচাৰেপি.

১২২৭. ‘‘অচ্ছিন্নচীৱৰিকাযা’’তি সামঞ্ঞতো ৱুত্তেপি ৱিসেসোযেৱাধিপ্পেতোতি আহ ‘‘সঙ্কচ্চিকচীৱৰমেৱা’’তি. সমন্ততো পুৰিসানং দস্সনং কন্তীযতি ছিন্দীযতি এত্থাতি সঙ্কচ্চি, অধক্খকউব্ভনাভিট্ঠানং, সঙ্কচ্চে নিৱসিতব্বন্তি সংকচ্চিকং, তমেৱ চীৱৰন্তি সঙ্কচ্চিকচীৱৰন্তি. তেৰসমং.

ছত্তুপাহনৱগ্গো নৱমো.

সব্বানেৱ সিক্খাপদানীতি সম্বন্ধো. ততোতি তেহি অট্ঠাসীতিসতসিক্খাপদেহি, অপনেত্ৱাতি সম্বন্ধো.

তত্ৰাতি তেসু খুদ্দকেসু. এত্থাতি দসসু সিক্খাপদেসূতি.

ভিক্খুনিৱিভঙ্গে খুদ্দকৱণ্ণনায

যোজনা সমত্তা.

৫. পাটিদেসনীযসিক্খাপদ-অত্থযোজনা

খুদ্দকানং অনন্তৰা পাটিদেসনীযা নাম অট্ঠ যে ধম্মা সঙ্খেপেনেৱ সঙ্গহং আৰূড়্হা সঙ্গীতিকাৰেহি, তেসং অট্ঠন্নং পাটিদেসনীযনামকানং ধম্মানং সঙ্খেপেনেৱ এসা ৱণ্ণনা পৱত্ততেতি যোজনা.

১২২৮. যানি সব্বিতেলাদীনীতি সম্বন্ধো. হীতি ৱিত্থাৰো. এত্থাতি অট্ঠসু পাটিদেসনীযেসু. পাড়িৱিনিমুত্তকেসূতি পাড়িতো ৱিনিমুত্তকেসু. সব্বেসূতি অখিলেসু সব্বিতেলাদীসূতি.

ভিক্খুনিৱিভঙ্গে পাটিদেসনীযৱণ্ণনায যোজনা সমত্তা.

পনাতি পক্খন্তৰজোতকো. যে ধম্মা উদ্দিট্ঠাতি সম্বন্ধো. তেসন্তি পাটিদেসনীযানং. পুন তেসন্তি সেখিযঅধিকৰণসমথধম্মানং.

তন্তি অত্থৱিনিচ্ছযং, ৱিদূ ৱদন্তীতি সম্বন্ধো. যকাৰো পদসন্ধিকৰো. অযং পনেত্থ যোজনা – তেসং পাটিদেসনীযানং অনন্তৰা যে চ সেখিযা পঞ্চসত্ততি যে চ ধম্মা, চসদ্দো লুত্তনিদ্দিট্ঠো, অধিকৰণৱ্হযা অধিকৰণসমথনামকা সত্ত যে চ ধম্মা ভগৱতা উদ্দিট্ঠা, তেসং সেখিযঅধিকৰণসমথধম্মানং যো অত্থৱিনিচ্ছযো ৱিভঙ্গে মযা ৱুত্তো, তাদিসমেৱ তং অত্থৱিনিচ্ছযং ভিক্খুনীনং ৱিভঙ্গেপি ৱিদূ ৱদন্তি যস্মা, তস্মা তেসং ধম্মানং সেখিযঅধিকৰণসমথধম্মানং যা অত্থৱণ্ণনা তত্থ মহাৱিভঙ্গে ৱিসুং মযা ন ৱুত্তা. ইমা অত্থৱণ্ণনা ইধাপি ভিক্খুনীনং ৱিভঙ্গেপি, পিসদ্দো লুত্তনিদ্দিট্ঠো, মযা ন ৱুত্তাযেৱাতি. নকাৰো দ্ৱীসু কিৰিযাসু যোজেতব্বো.

‘‘সব্বাসৱপহং মগ্গং, পুঞ্ঞকম্মেন চিমিনা;

উপ্পাদেত্ৱা সসন্তানে, সত্তা পস্সন্তু নিব্বুতি’’ন্তি.

অযং গাথা এতৰহি পোত্থকেসু নত্থি, টীকাসু পন অত্থি. তস্মা এৱমেত্থ যোজনা ৱেদিতব্বা – ইমিনা পুঞ্ঞকম্মেন চ ৱিভঙ্গৱণ্ণনায কতেন ইমিনা পুঞ্ঞকম্মেন চ অঞ্ঞেন পুঞ্ঞকম্মেন চ. চসদ্দো হি অৱুত্তসম্পিণ্ডনত্থো. সত্তা সব্বে সত্তা সব্বাসৱপহং সব্বেসং আসৱানং ৱিঘাতকং মগ্গং অৰহত্তমগ্গং সসন্তানে অত্তনো নিযকজ্ঝত্তে উপ্পাদেত্ৱা জনেত্ৱা নিব্বুতিং খন্ধপৰিনিব্বানং ঞাণালোচনেন পস্সন্তূতি.

ইতি সমন্তপাসাদিকায ৱিনযসংৱণ্ণনায

ভিক্খুনিৱিভঙ্গৱণ্ণনায

যোজনা সমত্তা.

জাদিলঞ্ছিতনামেন, নেকানং ৱাচিতো মযা;

ভিক্খুনীনং ৱিভঙ্গস্স, সমত্তো যোজনানযোতি.

নমো তস্স ভগৱতো অৰহতো সম্মাসম্বুদ্ধস্স