৮. কুমাৰিভূতৱগ্গো

১-২-৩. পঠম-দুতিয-ততিযসিক্খাপদ-অত্থযোজনা

১১১৯. কুমাৰিভূতৱগ্গস্স পঠমদুতিযততিযেসু যা পন তা মহাসিক্খমানাতি সম্বন্ধো. সব্বপঠমা দ্ৱে মহাসিক্খমানাতি গব্ভিনিৱগ্গে সব্বাসং সিক্খমানানং পঠমং ৱুত্তা দ্ৱে মহাসিক্খমানা. তা পনাতি মহাসিক্খমানা পন. সিক্খমানাইচ্চেৱ ৱত্তব্বাতি সম্মুতিকম্মেসু সামঞ্ঞতো ৱত্তব্বা. ‘‘গিহিগতা’’তি ৱা ‘‘কুমাৰিভূতা’’তি ৱা ন ৱত্তব্বা, ৱদন্তি চে, সম্মুতিকম্মং কুপ্পতীতি অধিপ্পাযো. গিহিগতাযাতি এত্থ গিহিগতা নাম পুৰিসন্তৰগতা ৱুচ্চতি. সা হি যস্মা পুৰিসসঙ্খাতেন গিহিনা গমিযিত্থ, অজ্ঝাচাৰৱসেন, গিহিং ৱা গমিত্থ, তস্মা গিহিগতাতি ৱুচ্চতি. অযং সিক্খমানাতি সম্বন্ধো. কুমাৰিভূতা নাম সামণেৰা ৱুচ্চতি. সা হি যস্মা অগিহিগতত্তা কুমাৰী হুত্ৱা ভূতা, কুমাৰিভাৱং ৱা ভূতা গতা, তস্মা কুমাৰিভূতাতি ৱুচ্চতি. তিস্সোপীতি গিহিগতা কুমাৰিভূতা মহাসিক্খমানাতি তিস্সোপি. সিক্খমানাতি সিক্খং মানেতীতি সিক্খমানাতি. পঠম দুতিয ততিযানি.

৪. চতুত্থসিক্খাপদং

১১৩৬. চতুত্থে অনুত্তানৱচনং নত্থীতি. চতুত্থং.

৫. পঞ্চমসিক্খাপদং

পঞ্চমে এত্থ সিক্খাপদে ‘‘সঙ্ঘেন পৰিচ্ছিন্দিতব্বা’’তি যং ৱচনং ৱুত্তং, তস্সাতি যোজনাতি. পঞ্চমং.

৬-৭-৮. ছট্ঠ-সত্তম-অট্ঠমসিক্খাপদং

ছট্ঠসত্তমট্ঠমেসু অনুত্তানট্ঠানং নত্থীতি. ছট্ঠসত্তমট্ঠমানি.

৯. নৱমসিক্খাপদং

১১৫৮. নৱমে অন্তোতি অব্ভন্তৰে. ইমিনা আত্যূপসগ্গস্সত্থং দস্সেতি. ‘‘সোক’’ন্তিআদিনা অন্তো ৱাসেতি পৱেসেতীতি আৱাসা. সোকং আৱাসা সোকাৱাসাতি ৱচনত্থং দস্সেতি. ঘৰং ঘৰসামিকা আৱিসন্তি ৱিয, এৱং অযম্পি সোকং আৱিসতীতি যোজনা. ইতীতি এৱং. যন্তি সোকং. স্ৱাস্সাতি সো অস্সা. সোতি সোকো. অস্সাতি সিক্খমানায. আৱাসোতি আৱাসোকাসো. ‘‘এদিসা অয’’ন্তি ইমিনা ‘‘অজানন্তী’’তি এত্থ অজাননাকাৰং দস্সেতীতি. নৱমং.

১০. দসমসিক্খাপদং

১১৬২. দসমে অনাপুচ্ছাতি এত্থ ত্ৱাপচ্চযো লোপোতি আহ ‘‘অনাপুচ্ছিত্ৱা’’তি. দ্ৱিক্খত্তুন্তি দ্ৱে ৱাৰে. সকিন্তি একৱাৰং.

১১৬৩. অপুব্বং সমুট্ঠানসীসং ইমস্সাতি অপুব্বসমুট্ঠানসীসং. দ্ৱীসুপি ঠানেসূতি ৱাচাতো চ কাযৱাচাতো চাতি দ্ৱীসু ঠানেসুপি. অননুজানাপেত্ৱাতি মাতাপিতূহি চ সামিকেন চ ন অনুজানাপেত্ৱাতি. দসমং.

১১. একাদসমসিক্খাপদং

১১৬৭. একাদসমে তত্থাতি ‘‘পাৰিৱাসিযছন্দদানেনা’’তি ৱচনে. অঞ্ঞত্ৰাতি অঞ্ঞং ঠানং.

একং অজ্ঝেসন্তীতি একং ভিক্খুং ধম্মকথনত্থায নিয্যোজেন্তি. অঞ্ঞং পনাতি উপোসথিকতো অঞ্ঞং পন.

তত্ৰাতি তেসু ভিক্খূসু. সুভাসুভং নক্খত্তং পঠতীতি নক্খত্তপাঠকো. দাৰুণন্তি কক্খড়ং. তেতি ভিক্খূ. তস্সাতি নক্খত্তপাঠকস্স ভিক্খুস্স. ‘‘নক্খত্তং পটিমানেন্তং, অত্থো বালং উপচ্চগা’’তিজাতকপাড়ি (জা. ১.১.৪৯). অযং পনেত্থ যোজনা – নক্খত্তং পটিমানেন্তং বালং অত্থো হিতং উপচ্চগা উপসমীপে অতিক্কমিত্ৱা অগাতি. একাদসমং.

১২. দ্ৱাদসমসিক্খাপদং

১১৭০. দ্ৱাদসমে নপ্পহোতীতি ভিক্খুনিযো নিৱাসাপেতুং ন সক্কোতীতি. দ্ৱাদসমং.

১৩. তেৰসমসিক্খাপদং

১১৭৫. তেৰসমে একং ৱস্সন্তি এত্থ ৱস্সসদ্দো সংৱচ্ছৰপৰিযাযো, উপযোগৱচনঞ্চ ভুম্মত্থে হোতীতি আহ ‘‘একস্মিং সংৱচ্ছৰে’’তি. তেৰসমং.

কুমাৰিভূতৱগ্গো অট্ঠমো.