৮. নাৱাভিৰুহনসিক্খাপদং

১৮৮. অট্ঠমে সহ অঞ্ঞমঞ্ঞং থৱনং অভিত্থৱনং সন্থৱো, সঙ্গমোতি ৱুত্তং হোতি. মিত্তভাৱেন সন্থৱো মিত্তসন্থৱো, লোকেহি অস্সাদেতব্বো চ সো মিত্তসন্থৱো চেতি লোকস্সাদমিত্তসন্থৱো, তস্স ৱসো পভূ, তেন ৱা আযত্তোতি লোকস্সাদমিত্তসন্থৱৱসো, তেন. উদ্ধং গচ্ছতীতি উদ্ধংগামিনীতি দস্সেন্তো আহ ‘‘উদ্ধ’’ন্তিআদি. উদ্ধন্তি চ ইধ পটিসোতো. তেনাহ ‘‘নদিযা পটিসোত’’ন্তি. ‘‘উদ্ধংগামিনি’’ন্তিমাতিকাপদং ‘‘উজ্জৱনিকাযা’’তিপদভাজনিযা সংসন্দেন্তো আহ ‘‘যস্মা পনা’’তিআদি. যোতি ভিক্খু. উদ্ধং জৱনতোতি পটিসোতং গমনতো. তেনাতি তেন হেতুনা. অস্সাতি ‘‘উদ্ধংগামিনি’’ন্তিপদস্স. অনুসোতং ইধ অধো নামাতি আহ ‘‘অনুসোত’’ন্তি. অস্সপীতি পিসদ্দো পুৰিমাপেক্খো. তত্থাতি ‘‘উদ্ধংগামিনিং ৱা অধোগামিনিং ৱা’’তিৱচনে. যন্তি নাৱং হৰন্তীতি সম্বন্ধো. সম্পটিপাদনত্থন্তি সম্মা পটিমুখং পাদনত্থং, উজুপজ্জাপনত্থন্তি অত্থো. এত্থাতি নাৱাযং. ‘‘ঠপেত্ৱা’’তিপদভাজনিমপেক্খিত্ৱা ‘‘উপযোগত্থে নিস্সক্কৱচন’’ন্তি আহ. ‘‘অঞ্ঞত্ৰা’’তি মাতিকাপদে অপেক্খিতে নিস্সক্কত্থে নিস্সক্কৱচনম্পি যুজ্জতেৱ.

১৮৯. একং তীৰং অগামকং অৰঞ্ঞং হোতীতি যোজনা. অদ্ধযোজনগণনায পাচিত্তিযানি হোন্তীতি সম্বন্ধো. মজ্ঝেন গমনেপীতি পিসদ্দো অগামকঅৰঞ্ঞতীৰপস্সেন গমনে কা নাম কথাতি দস্সেতি. ন কেৱলং নদিযাতি কেৱলং নদিযা এৱ অনাপত্তি নাতি যোজনা, অঞ্ঞেসুপি সমুদ্দাদীসু অনাপত্তীতি অধিপ্পাযো. যোপি ভিক্খু গচ্ছতীতি সম্বন্ধো. হীতি সচ্চং, যস্মা ৱা.

১৯১. কালৱিসঙ্কেতো, তিত্থৱিসঙ্কেতো, নাৱাৱিসঙ্কেতোতি তিৱিধো ৱিসঙ্কেতো. তত্থ কালৱিসঙ্কেতেন অনাপত্তিং সন্ধায ‘‘ৱিসঙ্কেতেন অভিৰুহন্তী’’তি ৱুত্তং. অঞ্ঞেন ৱিসঙ্কেতেন আপত্তিযেৱ, তমত্থং দস্সেন্তো আহ ‘‘ইধাপী’’তিআদীতি. অট্ঠমং.