৯. পৰিপাচিতসিক্খাপদং

১৯২. নৱমে মহানাগেসূতি মহাঅৰহন্তেসু তিট্ঠমানেসু সন্তেসু, চেতকে পেস্সভূতে নৱকে ভিক্খূ নিমন্তেতীতি অধিপ্পাযো. ইতৰথাতি ৱিভত্তিৱিপল্লাসতো ৱা পাঠসেসতো ৱা অঞ্ঞেন পকাৰেন. অন্তৰং মজ্ঝং পত্তা কথা অন্তৰকথাতি দস্সেন্তো আহ ‘‘অৱসান’’ন্তিআদি. পকিৰীযিত্থাতি পকতা, ন পকতা ৱিপ্পকতাতি ৱুত্তে কৰিযমানকথাৱাতি আহ ‘‘কৰিযমানা হোতী’’তি. অদ্ধচ্ছিকেনাতি উপড্ঢচক্খুনা. তেহীতি থেৰেহি.

১৯৪. লদ্ধব্বন্তি লদ্ধাৰহং. অস্সাতি ‘‘ভিক্খুনিপৰিপাচিত’’ন্তিপদস্স. সম্মা আৰভিতব্বোতি সমাৰম্ভোতি দস্সেন্তো আহ ‘‘সমাৰদ্ধং ৱুচ্চতী’’তি. পটিযাদিতস্সাতি পৰিপাচিতস্স ভত্তস্স. গিহীনং সমাৰম্ভোতি গিহিসমাৰম্ভো, কত্ৱত্থে চেতং সামিৱচনং. ততোতি ততো ভত্ততো. অঞ্ঞত্ৰাতি ৱিনা. তমত্থং ৱিৱৰন্তো আহ ‘‘তং পিণ্ডপাতং ঠপেত্ৱা’’তি. পদভাজনে পন ৱুত্তন্তি সম্বন্ধো. ‘‘ঞাতকপৱাৰিতেহী’’তিপদং ‘‘অসমাৰদ্ধো’’তিপদে কত্তা. অত্থতোতি ভিক্খুনিঅপৰিপাচিতঅত্থতো. তস্মাতি যস্মা অত্থতো সমাৰদ্ধোৱ হোতি, তস্মা.

১৯৫. পটিযাদিতন্তি পটিযত্তং. পকতিযা পটিযত্তং পকতিপটিযত্তন্তি দস্সেন্তো আহ ‘‘পকতিযা’’তিআদি. মহাপচ্চৰিযং পন ৱুত্তন্তি সম্বন্ধো. তস্সাতি তস্সেৱ ভিক্খুনো. অঞ্ঞস্সাতি ততো অঞ্ঞস্স ভিক্খুনো.

১৯৭. ভিক্খুনিপৰিপাচিতেপীতি পিসদ্দো ভিক্খুনিঅপৰিপাচিতে কা নাম কথাতি দস্সেতীতি. নৱমং.