৭. সংৱিধানসিক্খাপদং

১৮১. সত্তমে ‘‘তাসং ভিক্খুনীনং পচ্ছা গচ্ছন্তীন’’ন্তি পদানি ‘‘পত্তচীৱৰ’’ন্তি পাঠসেসেন যোজেতব্বানীতি আহ ‘‘পচ্ছা গচ্ছন্তীনং পত্তচীৱৰ’’ন্তি. তা ভিক্খুনিযো পচ্ছা গচ্ছন্তিযোতি ৱিভত্তিৱিপল্লাসং কত্ৱা ‘‘দূসেসু’’ন্তিপদেন যোজেতব্বানীতি আহ ‘‘তা ভিক্খুনিযো চোৰা দূসযিংসূ’’তি. অথ ৱা ৱিভত্তিৱিপল্লাসমকত্ৱা ‘‘অচ্ছিন্দিংসূ’’তি পদে ‘‘পত্তচীৱৰ’’ন্তিপদং অজ্ঝাহৰিত্ৱা ‘‘দূসেসু’’ন্তিপদে ‘‘সীল’’ন্তি পাঠং অজ্ঝাহৰিত্ৱা যোজেতব্বন্তি দট্ঠব্বং.

১৮২-৩. সংপুব্বো, ৱিপুব্বো চ ধাধাতু ত্ৱাপচ্চযো হোতীতি আহ ‘‘সংৱিদহিত্ৱা’’তি. কুক্কুটোতি তম্বচূড়ো. সো হি কুকতি আহাৰত্থং পাণকাদযো আদদাতীতি কুক্কুটো. অযন্তি গামো. অধিকৰণে ণোতি আহ ‘‘সম্পদন্তি এত্থা’’তি. এত্থাতি চ এতস্মিং গামে. উত্তৰপদস্স অধিকৰণত্থত্তা পুব্বপদেন ছট্ঠীসমাসোতি আহ ‘‘কুক্কুটান’’ন্তিআদি. এৱং ণসদ্দস্স অধিকৰণত্থং, পুব্বপদেন ছট্ঠীসমাসঞ্চ দস্সেত্ৱা ইদানি ণসদ্দস্স ভাৱত্থং, পুব্বপদেন বাহিৰত্থসমাসঞ্চ দস্সেতুং ৱুত্তং ‘‘অথ ৱা’’তি. তত্থাতি পচ্ছিমপাঠে. উপ্পতিত্ৱাতি উড্ডিত্ৱা উদ্ধং আকাসং লঙ্গিত্ৱাতি অত্থো. এত্থাতি পচ্ছিমপাঠে. দ্ৱিধাতি পদগমনপক্খগমনৱসেন দ্ৱিপকাৰেন. ‘‘উপচাৰো ন লব্ভতী’’তিইমিনা গামন্তৰো ন হোতি, একগামোযেৱ পন হোতি, তস্মা আপত্তিপি একাযেৱ হোতীতি দস্সেতি. পচ্চূসেতি পভাতে. সো হি পটিৱিৰুদ্ধং তিমিৰং উসেতি নাসেতীতি পচ্চূসোতি ৱুচ্চতি. ৱস্সন্তস্সাতি ৰৱন্তস্স. ‘‘ৱচনতো’’তিপদং ‘‘আপত্তিযেৱা’’তিপদে ঞাপকহেতু. ৰতনমত্তন্তৰোতি কুক্কুপমাণেন ব্যৱধানো.

তত্ৰাতি ‘‘গামন্তৰে গামন্তৰে’’তি ৱচনে. হীতি ৱিত্থাৰো. উভোপীতি ভিক্খুভিক্খুনিযোপি সংৱিদহন্তীতি সম্বন্ধো. ন ৱদন্তীতি অট্ঠকথাচৰিযা ন কথযন্তি. চতুন্নং মগ্গানং সমাগমট্ঠানং চতুক্কং, দ্ৱিন্নং, তিণ্ণং, চতুক্কতো অতিৰেকানং ৱা মগ্গানং সম্বদ্ধট্ঠানং সিঙ্ঘাটকং. তত্ৰাপীতি উপচাৰোক্কমনেপি. গামতোতি অত্তনো গামতো. যাৱ ন ওক্কমন্তি, তাৱাতি যোজনা. সন্ধাযাতি আৰব্ভ. অথাতি তস্মিং নিক্খমনকালে. দ্ৱেপীতি ভিক্খুভিক্খুনিযোপি গচ্ছন্তীতি সম্বন্ধো. তন্তি ৱচনং.

হীতি ৱিসেসো. ‘‘গামন্তৰে গামন্তৰে’’তি পুৰিমস্মিং নযে অতিক্কমে অনাপত্তি, ওক্কমনে আপত্তীতি অযং ৱিসেসো.

১৮৪. গতপুব্বত্থাতি গতপুব্বা অত্থ ভৱথাতি অত্থো. এহি গচ্ছামাতি ৱা আগচ্ছেয্যাসীতি ৱা ৱদতীতি যোজনা. চেতিযৱন্দনত্থন্তি থূপস্স ৱন্দিতুং.

১৮৫. ৱিসঙ্কেতেনাতি এত্থ কালৱিসঙ্কেতো, দ্ৱাৰৱিসঙ্কেতো, মগ্গৱিসঙ্কেতোতি তিৱিধো. তত্থ কালৱিসঙ্কেতেনেৱ অনাপত্তিং সন্ধায ‘‘ৱিসঙ্কেতেন গচ্ছন্তি, অনাপত্তী’’তি আহ. দ্ৱাৰৱিসঙ্কেতেন ৱা মগ্গৱিসঙ্কেতেন ৱা আপত্তিমোক্খো নত্থি. তমত্থং দস্সেন্তো আহ ‘‘পুৰেভত্ত’’ন্তিআদি. চক্কসমাৰুড়্হাতি ইৰিযাপথচক্কং ৱা সকটচক্কং ৱা সম্মা আৰুড়্হা. জনপদাতি জনকোট্ঠাসা. পৰিযাযন্তীতি পৰি পুনপ্পুনং যন্তি চ আযন্তি চাতি. সত্তমং.