৬. চীৱৰসিব্বনসিক্খাপদং

১৭৫. ছট্ঠে উদাযীতি এত্থ মহাউদাযী, কাড়ুদাযী, লাড়ুদাযীতি তযো উদাযী হোন্তি. তেসু ততিযোৱাধিপ্পেতোতি আহ ‘‘লাড়ুদাযী’’তি. পভাৱেন ঠাতি পৱত্ততীতি পট্ঠোতি কতে পটিবলোৱ লব্ভতি. তেনাহ ‘‘পটিবলো’’তি. নিপুণোতি কুসলো. ‘‘পটিভানেন কতচিত্ত’’ন্তিইমিনা ‘‘পটিভানচিত্ত’’ন্তি পদস্স মজ্ঝে পদলোপং দস্সেতি. সোতি লাড়ুদাযী অকাসীতি সম্বন্ধো. তস্সাতি চীৱৰস্স. ‘‘যথাসংহট’’ন্তি এত্থ এৱসদ্দো অজ্ঝাহৰিতব্বোতি আহ ‘‘যথাসংহটমেৱা’’তি.

১৭৬. যং চীৱৰং নিৱাসিতুং ৱা পাৰুপিতুং ৱা সক্কা হোতি, তং চীৱৰং নামাতি যোজনা. এৱং হীতি এৱমেৱ. ‘‘দুক্কট’’ন্তিইমিনা ‘‘সযং সিব্বতি, আপত্তি পাচিত্তিযস্সা’’তি এত্থ অন্তৰাপত্তিং দস্সেতি. আৰাতি সূচি. সা হি অৰতি নিস্সঙ্গৱসেন গচ্ছতি পৱিসতীতি ‘‘আৰা’’তি ৱুচ্চতি, তস্সা পথো গমনং আৰাপথো, তস্মিং, আৰাপথস্স নীহৰণাৱসানত্তা ‘‘নীহৰণে’’তি ৱুত্তং. সতক্খত্তুম্পীতি অনেকক্খত্তুম্পি. আণত্তোতি আণাপীযতীতি আণত্তো. ‘‘আণাপিতো’’তি ৱত্তব্বে ণাপেসদ্দস্স লোপং, ইকাৰস্স চ অকাৰং কত্ৱা, ‘‘আদত্তে’’তি আখ্যাতপদে তেৱিভত্তিযা ৱিয তপচ্চযস্স চ দ্ৱিভাৱং কত্ৱা এৱং ৱুত্তং. তেনাহ ‘‘সকিং চীৱৰং সিব্বাতি ৱুত্তো’’তি. অথ পনাতি ততো অঞ্ঞথা পন. আণত্তস্সাতি আণাপিতস্স. সম্বহুলানিপি পাচিত্তিযানি হোন্তীতি সম্বন্ধো.

যেপি নিস্সিতকা সিব্বন্তীতি যোজনা, আচৰিযুপজ্ঝাযেসু সিব্বন্তেসূতি সম্বন্ধো. তেসন্তি আচৰিযুপজ্ঝাযানং. তেসম্পীতি নিস্সিতকানম্পি. ঞাতিকানং ভিক্খুনীনং চীৱৰন্তি সম্বন্ধো. ‘‘অন্তেৱাসিকেহী’’তিপদং ‘‘সিব্বাপেন্তী’’তিপদে কাৰিতকম্মং. তত্ৰাপীতি আচৰিযুপজ্ঝাযেহি সিব্বাপনেপি. ‘‘অন্তেৱাসিকে’’তিপদং ‘‘ৱঞ্চেত্ৱা’’তিপদে সুদ্ধকম্মং, ‘‘সিব্বাপেন্তী’’তিপদে কাৰিতকম্মং. ইতৰেসন্তি আচৰিযুপজ্ঝাযানন্তি. ছট্ঠং.