৮. ৱাসেট্ঠসুত্তৱণ্ণনা

৪৫৪. জাতিং সোধেতুকামা হোন্তীতি সহৱাসীনং ব্ৰাহ্মণানং কিৰিযা পৰাধেন ৱা অসাৰুপ্পত্তেন ৱা জাতিযা উপক্কিলেসং আসঙ্কায তং সোধেতুকামা হোন্তি. মন্তে সোধেতুকামা হোন্তীতি মন্তৱচনে আচৰিযমতিচোদনায অঞ্ঞেন ৱাক্যেন কেনচি কাৰণেন সংসযে উপ্পন্নে তং সোধেতুকামা হোন্তি. অন্তৰাতি ৱেমজ্ঝে, অঞ্ঞত্থেৱা অন্তৰাসদ্দোতি তস্স অঞ্ঞা কথাতি ৱচনং অৱগন্তব্বং. খন্তীমেত্তানুদ্দযাদিগুণসম্পন্নো এৱ ‘‘সীলৱাতি গুণৱা’’তিআহ. তেহি সীলস্স ৱিস্সজ্জনকালেপি ‘‘সীলৱা’’তি ৱুচ্চতি. সম্পন্নসীলত্তা ৱা তেহি সমন্নাগতো এৱ হোতীতি আহ ‘‘সীলৱাতি গুণৱা’’তি. আচাৰসম্পন্নোতি সাধু আচাৰৱত্তো.

৪৫৫. সিক্খিতাতি তেৱিজ্জানং সিক্খিতা তুম্হে, ন দানি তুম্হেহি কিঞ্চি কত্তব্বং অত্থীতি অত্থো. পটিঞ্ঞাতাতি পটিজানিত্ৱা ঠিতা.

ৱেদত্তযসঙ্খাতা তিস্সো ৱিজ্জা অজ্ঝযন্তীতি তেৱিজ্জা. তেনাহ ‘‘তিৱেদান’’ন্তি. তযো ৱেদে অণন্তি অজ্ঝযন্তীতি ব্ৰাহ্মণা, তেসং. যং একং পদম্পি অক্খাতং, তং অত্থতো ব্যঞ্জনতো চ কেৱলিনো অধিযিনো অপ্পপযোগেন. নিট্ঠাগতম্হাতি নিপ্ফত্তিং গতা অম্হা তেৱিজ্জায সকসমযস্স কথনে.

মনোকম্মতো হি ৱত্তসম্পদাতিকাৰণূপচাৰেনাযমত্থো ৱুত্তোতি আহ – ‘‘তেন সমন্নাগতো হি আচাৰসম্পন্নো হোতী’’তি.

খযাতীতন্তি ৱড্ঢিপক্খে ঠিতন্তি অত্থো. সুক্কপক্খপাটিপদতো পট্ঠায হি চন্দো ৱড্ঢতীতি ৱুচ্চতি, ন খীযতীতি. ৱন্দমানা জনা নমক্কাৰং কৰোন্তি.

অত্থদস্সনেনাতি ৱিৱৰণেন দস্সনপৰিণাযকট্ঠেন লোকস্স চক্খু হুত্ৱা সমুপ্পন্নং.

৪৫৬. তিট্ঠতু তাৱ ব্ৰাহ্মণচিন্তাতি – ‘‘কিং জাতিযা ব্ৰাহ্মণো হোতি উদাহু ভৱতি কম্মুনা’’তি অযং ব্ৰাহ্মণৱিচাৰো তাৱ তিট্ঠতু. জাতিদস্সনত্থং তিণৰুক্খকীটপটঙ্গতো পট্ঠায লোকে জাতিৱিভঙ্গং ৱিত্থাৰতো কথেস্সামীতি তেসং চিত্তসম্পহংসনত্থং দেসেতব্বমত্থং পটিজানাতি. তত্থ অঞ্ঞমঞ্ঞা হি জাতিযোতি ইদং কাৰণৱচনং, যস্মা ইমা জাতিযো নাম অঞ্ঞমঞ্ঞং ৱিসিট্ঠা, তস্মা জাতিৱিভঙ্গং ব্যাকৰিস্সামীতি.

যস্মা ইধ উপাদিন্নকজাতি ব্যাকাতব্বভাৱেন আগতা, তস্সা পন নিদস্সনভাৱেন ইতৰা, তস্মা ‘‘জাতিৱিভঙ্গং পাণান’’ন্তি পাড়িযং ৱুত্তং. তেসং তেসং পাণানং জাতিযোতি অত্থো. এৱন্তি নিদস্সনং কথেত্ৱা নিদস্সিতব্বে কথিযমানে. তস্সাতি ৱাসেট্ঠস্স. কামং ‘‘তেসং ৱোহং ব্যক্খিস্স’’ন্তি উভোপি মাণৱে নিস্সায দেসনা আগতা, তথাপি তত্থ তত্থ ‘‘এৱং, ৱাসেট্ঠ, জানাহী’’তিআদিনা ৱাসেট্ঠমেৱ আলপন্তো ভগৱা তমেৱ ইমিনা নিযামেন পমুখং অকাসি. তেন ৱুত্তং ‘‘তস্সাতি ৱাসেট্ঠস্সা’’তি. জাতিভেদো জাতিৱিসেসো, জাতিযা ভেদো পাকটো ভৱিস্সতি নিদস্সনেন ৱিভূতভাৱং আপাদিতেন পটিঞ্ঞাতস্স অত্থস্স ৱিভূতভাৱাপত্তিতো. আম ন ৱট্টতীতি কম্মনানতায এৱ উপাদিন্ননানতায পটিক্খেপপদমেতং, ন বীজনানতায অনুপাদিন্ননানতায পটিক্খেপপদন্তি দস্সেতুং ‘‘কম্মং হী’’তিআদি ৱুত্তং. তস্সত্থো – তংতংযোনিখিপনমত্তং কম্মস্স সামত্থিযং, তংতংযোনিনিযতা পন যে ৱণ্ণৱিসেসা, তে তংতংযোনিসিদ্ধিযাৱ সিদ্ধা হোন্তীতি তং পন যোনিখিপনকম্মং তংতংযোনিৱিসিট্ঠ-ৱিসেসাভিভূতায পযোগনিপ্ফত্তিযা, অসংমুচ্ছিতায এৱ ৱা পচ্চযভূতায ভৱপত্থনায অভিসঙ্খতমেৱাতি ৱিঞ্ঞাতব্বপচ্চযৱিসেসেন ৱিনা ফলৱিসেসাভাৱতো এতং সমীহিতকম্মং পত্থনাদীহি চ ভিন্নসত্তিতং ৱিসিট্ঠসামত্থিযং ৱা আপজ্জিত্ৱা চক্খুন্দ্ৰিযাদিৱিসিট্ঠফলনিব্বত্তকং জাযতি, এৱং যোনিখিপনতংযোনিনিযতৱিসেসাৱহতা হোতীতি. থেৰেন হি বীজনানতা ৱিয কম্মনানতাপি উপাদিন্নকনানতায সিযা নু খো পচ্চযোতি চোদনং পটিক্খিপিত্ৱা পচ্চযৱিসেসৱিসিট্ঠা কম্মনানতা পন পচ্চযোতি নিচ্ছিতন্তি দট্ঠব্বং.

নানাৱণ্ণাতি নানপ্পকাৰৱণ্ণা. তালনাড়িকেৰাদীনং লোকে অভিঞ্ঞাততিণজাতিভাৱতো ৱিসেসেন গয্হতি অভিঞ্ঞাতসোতনযেন. জাতিযা ব্ৰাহ্মণোৱাতি অট্ঠানপযুত্তো এৱ-সদ্দো, জাতিযাৱ ব্ৰাহ্মণো ভৱেয্যাতি যোজনা. ন চ গয্হতীতি তিণৰুক্খাদীসু ৱিয ব্ৰাহ্মণেসু জাতিনিযতস্স লিঙ্গস্স অনুপলব্ভনতো, পিৱনভুঞ্জনকথনহসনাদিকিৰিযায ব্ৰাহ্মণভাৱেন একন্তিকলিঙ্গনিযতায মন্তজ্ঝেনাদিং ৱিনা অনুপলব্ভনতো চ. ৱচীভেদেনেৱাতি আহচ্চৱচনেনেৱ.

কীটে পটঙ্গেতিআদীসু জাতিনানতা লব্ভতি অঞ্ঞমঞ্ঞলিঙ্গৱিসিট্ঠতাদস্সনা. কুন্থা কীটকা, খজ্জখাদকা কিপিল্লিকা. উপ্পতিত্ৱাতি উড্ডেত্ৱা উড্ডেত্ৱা. পটভাৱং গচ্ছন্তীতি ৱা পটঙ্গা, ন খুদ্দকপাণকা কীটা নাম. তেসম্পি কীটকানং.

কাড়কাদযোতি কলন্দকাদযো.

উদৰংযেৱ নেসং পাদা উদৰেনেৱ সম্পজ্জনতো.

সঞ্ঞাপুব্বকো ৱিধি অনিচ্চোতি দস্সেন্তো ‘‘উদকে’’তি আহ যথা ‘‘ৱীৰস্স ভাৱো ৱীৰিয’’ন্তি.

পত্তসমুদাযে পক্খসদ্দোতি ‘‘পত্তেহি যন্তী’’তি ৱুত্তং. ন হি অৱযৱব্যতিৰেকেন সমুদাযো অত্থি.

সঙ্খেপেন ৱুত্তো ‘‘জাতিৱসেন নানা’’তিআদিনা. এত্থ পদত্থে দুব্বিঞ্ঞেয্যং নত্থীতি সম্বন্ধমত্তং দস্সেতুং ‘‘তত্ৰাযং যোজনা’’তিআদি ৱুত্তং. ‘‘ন হি ব্ৰাহ্মণানং এদিসং সীসং হোতি, খত্তিযানং এদিসন্তি নিযমো অত্থি যথা হত্থিঅস্সমিগাদীন’’ন্তি ইদমেৱ ৱাক্যং সব্বত্থ নেতব্বং. তং সংঙ্খিপিত্ৱা দস্সেন্তো ‘‘ইমিনা নযেন সব্বং যোজেতব্ব’’ন্তি আহ.

তস্সাতি যথাৱুত্তনিগমনৱচনস্স অযং যোজনা ইদানি ৱুচ্চমানা যোজনা ৱেদিতব্বা.

৪৫৭. ৱোকাৰন্তি ৱোকৰণং, যেন ৱিসিট্ঠতায ন ৱোকৰীযতি জাতিভেদোতি অত্থো. তেনাহ ‘‘নানত্ত’’ন্তি.

গোৰক্খাদিউপজীৱনেন আজীৱৱিপন্নো, হিংসাদিনা সীলৱিপন্নো, নিক্খিত্তৱত্ততাদিনা আচাৰৱিপন্নোতি. সামঞ্ঞজোতনা ৱিসেসে নিৱিট্ঠা হোতীতি আহ ‘‘গোৰক্খন্তি খেত্তৰক্খ’’ন্তি. ‘‘গোতি হি পথৱিযা নাম’’ন্তি. তেহি তেহি উপাযেহি সিক্খিতব্বট্ঠেন সিপ্পং, তত্থ কোসল্লং. পৰেসং ঈসনট্ঠেন হিংসনট্ঠেন ইস্সো, সো অস্স অত্থীতি ইস্সো যোধাজীৱিকো, ইস্সস্স কম্মং পহৰণং, উসুং সত্তিঞ্চ নিস্সায পৱত্তা জীৱিকা ইস্সত্তং. তেনাহ ‘‘আৱুধজীৱিক’’ন্তি. যং নিস্সায অস্স জীৱিকা, তদেৱ দস্সেতুং ‘‘উসুঞ্চ সত্তিঞ্চা’’তি ৱুত্তং.

ব্ৰহ্মং ৱুচ্চতি ৱেদো, তং অণতি জানাতীতি ব্ৰাহ্মণো, জাননঞ্চ পোৰাণেহি ব্ৰাহ্মণেহি ৱিহিতনিযামেন ব্ৰাহ্মণেহি কতোপসমেন অনুট্ঠানতপেন যথা ‘‘আজীৱসীলাচাৰৱিপন্নো নত্থী’’তি ব্ৰাহ্মণধম্মিকেহি লোকিযপণ্ডিতেহি চ সম্পটিচ্ছিতো, তথা পটিপজ্জনমেৱাতি আহ ‘‘এৱং ব্ৰাহ্মণসমযেন…পে… সাধেত্ৱা’’তি. এৱং সন্তেতি এৱং আজীৱসীলাচাৰৱিপন্নস্স অব্ৰাহ্মণভাৱে সতি ন জাতিযা ব্ৰাহ্মণো হোতি, গুণেহি পন আজীৱসীলাচাৰসম্পত্তিসঙ্খাতেহি ব্ৰাহ্মণো হোতি, তস্মা গুণানংযেৱ ব্ৰাহ্মণভাৱকৰণতো চতুৱণ্ণৱিভাগে যত্থ কত্থচি কুলে জাতো যো সীলাদিগুণসম্পন্নতায গুণৱা, সো ৱুত্তলক্খণেন নিপ্পৰিযাযতো বাহিতপাপতায ব্ৰাহ্মণোতি অযমেত্থ ব্ৰাহ্মণভাৱে ঞাযোতি, এৱং ঞাযং অত্থতো আপন্নং কত্ৱা. নন্তি তমেৱ যথাৱুত্তং ঞাযং. যো ব্ৰাহ্মণস্স সংৱণ্ণিতাযাতি মাতুযা উভতোসুজাততাদিকুলৱণ্ণেন সংৱণ্ণিতায পসত্থায যথাৰূপায ব্ৰাহ্মণস্স মাতা ভৱিতুং যুত্তা, তথাৰূপায মাতৰিসম্ভূতো. এতেন চতুন্নং যোনীনং যত্থ কত্থচি ৱিসেসনিট্ঠা কতা. তেনাহ ‘‘তত্ৰাপি ৱিসেসেনা’’তি. এৱং সামঞ্ঞতো ৱিসেসনিট্ঠাৱসেন ‘‘যোনিজং মত্তিসম্ভৱ’’ন্তি পদস্স অত্থং ৱত্ৱা ইদানি সামঞ্ঞজোতনং অনাদিযিত্ৱা ৱিসেসজোতনাৱসেনেৱ অত্থং ৱত্তুং ‘‘যাচায’’ন্তিআদি ৱুত্তং. পৰিসুদ্ধউপ্পত্তিমগ্গসঙ্খাতা যোনি ৱুত্তাতি অনুপক্কুট্ঠভাৱেন পৰিসুদ্ধউপ্পত্তিমগ্গসঙ্খাতা যা চাযং যোনি ৱুত্তাতি সম্বন্ধো. ততোপি জাতসম্ভূতত্তাতি ততো যোনিতো জাতত্তা মাতাপেত্তিসম্পত্তিতো সম্ভূতত্তা.

ৱিসিট্ঠত্তাতি সমুদাযভূতা মনুস্সা ৰাগাদিনা ৱিসিট্ঠত্তা. ৰাগাদিনা সহ কিঞ্চনেনাতি সকিঞ্চনো. তথেৱ ৰাগাদিসঙ্খাতেন পলিবোধনট্ঠেন সহ পলিবোধেনাতি সপলিবোধো. সব্বগহণপটিনিস্সগ্গেনাতি উপাদানসঙ্খাতস্স সব্বস্স গহণস্স পটিনিস্সজ্জনেন. যস্মা বাহিতপাপো অত্তনো সন্তানতো বহিকতপাপো, তস্মা তমহং ব্ৰূমি ব্ৰাহ্মণন্তি অত্থো ৱত্তব্বো. এৱৰূপো এতিস্সা কথায উপদেসো নানপ্পকাৰতো ৱিভত্তো, তস্মা তত্থ তত্থ ৱুত্তনযেনেৱ ৱেদিতব্বো.

৪৫৮. গহিতদণ্ডেসূতি পৰেসং দণ্ডেন ৱিহেঠনং অনিধায আদিন্নদণ্ডেসু.

৪৫৯. কিঞ্চি গহণন্তি তণ্হাগাহাদীসু কিঞ্চি গাহং.

যেন কামভৱেন মানুসকেহি পঞ্চহি কামগুণেহি যুঞ্জতি, তং মানুসকং যোগং. ‘‘মানুসকং যোগ’’ন্তি এত্থ চ একদেসং গহেত্ৱা ৱুত্তং, এস নযো ‘‘দিব্বযোগ’’ন্তি এত্থাপি. সব্বযোগৱিসংযুত্তন্তি পদদ্ৱযেন ৱুত্তেহি সব্বকিলেসযোগেহি ৱিপ্পযুত্তং.

ৰতিন্তি অভিৰতিং আসত্তিং. কুসলভাৱনাযাতি কাযভাৱনাদি কুসলধম্মভাৱনায উক্কণ্ঠিতং. ৱীৰিযৱন্তন্তি ৱীৰিযসব্ভাৱেন ৱীৰং নিদ্দিসতি, ৱীৰভাৱো হি ৱীৰিযন্তি.

সুন্দৰং ঠানন্তি নিব্বানং. সুন্দৰায পটিপত্তিযা অৰিযপটিপত্তিযা.

নিব্বত্তিন্তি পৰিযোসানং. অতীতেতি অতীতকোট্ঠাসে. কিঞ্চনকাৰকোতি পলিবোধহেতুভূতো.

অসেক্খে সীলক্খন্ধাদিকে মহন্তে গুণে. পঞ্চন্নং মাৰানং ৱিজিতত্তা ৱিজিতৱিজযং.

৪৬০. ইদং অজানন্তাতি ‘‘জাতিযা ব্ৰাহ্মণো’’তি ইদং লোকসমঞ্ঞামত্তন্তি অজানন্তা. যে ব্ৰাহ্মণেসু নামগোত্তং নাম ততিযং দিট্ঠাভিনিৱেসং জনেন্তি, সাৱ নেসং দিট্ঠি. কতং অভিসঙ্খতন্তি পৰিকপ্পনৱসেনেৱ কতং ঠপিতং তদুপচিতং, ন হেতুপচ্চযসমাযোগেন. সমুচ্চাতি সম্মুতিযা. কা পন সা সম্মুতীতি আহ ‘‘সমঞ্ঞাযা’’তি, লোকসমঞ্ঞাতেনাতি অত্থো. সম্মা পন পৰমত্থতো অজানন্তানং নামগোত্তং এৱং কপ্পেতীতি আহ ‘‘নো চে’’তিআদি. তং পন অসন্তম্পি পৰমত্থতো সন্ততাযেৱ অভিনিৱিসন্তি, তেসমযং দোসোতি দস্সেতুং ‘‘এৱং পকপ্পিত’’ন্তিআদি ৱুত্তং. তেনাহ ভগৱা – ‘‘জনপদনিৰুত্তিং নাভিনিৱেসেয্যা’’তি (ম. নি. ৩.৩৩১). অজানন্তা নোতি এত্থ নো-সদ্দো অৱধাৰণত্থো – ‘‘ন নো সমং অত্থি তথাগতেনা’’তিআদীসু (খু. পা. ৬.৩) ৱিযাতি আহ ‘‘অজানন্তাৱ এৱং ৱদন্তী’’তি.

নিপ্পৰিযাযন্তি ভাৱনপুংসকনিদ্দেসো, নিপ্পৰিযাযেন উজুকমেৱাতি অত্থো, ন পুব্বে ৱিয ‘‘যো হি কোচী’’তি পৰিযাযৱসেন. ‘‘ন জচ্চা’’তি গাথায পুব্বদ্ধেন জাতিৱাদং পটিক্খিপন্তো পচ্ছিমদ্ধেন কম্মৱাদং পতিট্ঠপেন্তো. তত্থাতি তিস্সং গাথাযং. উপড্ঢগাথায ৱিত্থাৰণত্থন্তি উপড্ঢগাথায অত্থং ৱিত্থাৰেতুং ‘‘কস্সকো কম্মুনা’’তি ৱুত্তং. তত্থ পুৰিমায চতূহি পাদেহি, পচ্ছিমে দ্ৱীহি দ্ৱিন্নম্পি সাধাৰণতো অত্থো ৱিত্থাৰিতো. তত্থ কসিকম্মাদীতি আদি-সদ্দেন সিপ্পকম্মৱাণিজাদি সঙ্গহো.

পটিচ্চসমুপ্পাদপধানৱচনৱিঞ্ঞেয্যো পচ্চযো পটিচ্চসমুপ্পাদসদ্দস্স অত্থো পচ্চযুপ্পন্নাপেক্খায হোতীতি আহ – ‘‘ইমিনা পচ্চযেন এতং হোতী’’তি. যং পনেত্থ ৱত্তব্বং, তং ৱিসুদ্ধিমগ্গে (ৱিসুদ্ধি. ২.৫৭০) তংসংৱণ্ণনাযঞ্চ (ৱিসুদ্ধি. মহাটী. ২.৫৭০) ৱুত্তনযেন ৱেদিতব্বং. সম্মানাৱমানাৰহকুলেতি সম্মানাৰহে খত্তিযাদিকুলে, অৱমানাৰহে চণ্ডালাদিকুলে কম্মৱসেন উপপত্তি হোতি কম্মস্স ৱিপচ্চমানোকাসকৰতায ৱিনা তাদিসায উচ্চনীচকুলনিব্বত্তিযা অভাৱতো. অড্ঢদলিদ্দতাদি অঞ্ঞাপি হীনপণীততা.

কম্মুনাতি চেত্থ যথা লোকপজাসত্তসদ্দেহি একো এৱত্থো ৱুত্তো, এৱং সেসসদ্দেহিপি, অধিপ্পাযৱিসেসো পন তত্থ অত্থীতি দস্সেতুং ‘‘পুৰিমপদেন চেত্থা’’তিআদি ৱুত্তং. নাযং লোকো ব্ৰহ্মনিম্মিতো কম্মেন উপ্পজ্জনতো. ন হি সন্নিহিতকাৰণানং ফলানং অঞ্ঞেন উপ্পত্তিদিট্ঠি যুজ্জতি. তেনাহ ‘‘দিট্ঠিযা পটিসেধো ৱেদিতব্বো’’তি. যং পনেত্থ ৱত্তব্বং তং ৱিসুদ্ধিমগ্গসংৱণ্ণনাদীসুৱুত্তনযেন ৱেদিতব্বং. তথা লোকস্স পঠমুপ্পত্তি ন ব্ৰহ্মুনাতি ‘‘কম্মুনা হি তাসু তাসূ’’তিআদি ৱুত্তং. ততিযেন ‘‘অযং লোকো আদিতো পভুতি পভৱকম্মুনা ৱত্ততী’’তি ৱুত্তমত্থং নিগমেতি.ৱুত্তস্সেৱত্থস্স সূচনঞ্হি নিগমনং. তং পন নিযমত্থং হোতীতি আহ ‘‘কম্মেনেৱ বদ্ধা হুত্ৱা পৱত্তন্তি, ন অঞ্ঞথা’’তি. চতুত্থেন পদেন. যাযতোতি গচ্ছতো. নিব্বত্ততোতি নিব্বত্তন্তস্স. পৱত্ততোতি পৱত্তন্তস্স.

ধুতধম্মা ৱিসেসতো তণ্হায সন্তত্তৱসেন ৱত্তন্তীতি আহ ‘‘তপেনাতি ধুতঙ্গতপেনা’’তি. মেথুনৱিৰতি ৱিসেসতো ব্ৰাহ্মণানং ব্ৰহ্মচৰিযন্তি সা ইধ ব্ৰহ্মচৰিযেনাতি অধিপ্পেতাতি আহ ‘‘ব্ৰহ্মচৰিযেনাতি মেথুনৱিৰতিযা’’তি. এতেনাতি ইমিনা ‘‘তপেনা’’তিআদীহি চতূহি পদেহি ৱুত্তেন. সেট্ঠেনাতি উত্তমেন. সংকিলেসৱিসুদ্ধিযা পৰিসুদ্ধেন. ব্ৰহ্মন্তি ব্ৰহ্মভাৱং সেট্ঠভাৱং. সো পনেত্থ অত্থতো ব্ৰাহ্মণভাৱোতি আহ ‘‘ব্ৰাহ্মণভাৱং আৱহতী’’তি.

ব্ৰহ্মা চ সক্কো চাতি সক্কগৰুকানং সক্কো সক্কেনপি গৰুকাতব্বতো, ব্ৰহ্মগৰুকানং ব্ৰহ্মা ব্ৰহ্মুনাপি গৰুকাতব্বতো. ৱিজানতন্তি পৰমত্থব্ৰাহ্মণস্স ৱিসেসং জানন্তানং ৱিঞ্ঞূনং. অৱিঞ্ঞুনো হি অপ্পমাণং. তেনাহ – ‘‘পণ্ডিতান’’ন্তি. সেসং সুৱিঞ্ঞেয্যমেৱ.

ৱাসেট্ঠসুত্তৱণ্ণনায লীনত্থপ্পকাসনা সমত্তা.