৫. চঙ্কীসুত্তৱণ্ণনা

৪২২. তস্মিন্তি সালৱনে. উত্তৰেন ওপাসাদন্তি ওপাসাদগামস্স উত্তৰদিসাযং. উত্তৰেনাতি এন-সদ্দযোগেন হি ওপাসাদন্তি উপযোগৱচনং. অজ্ঝাৱসতীতি এত্থ অধি-আ-সদ্দানং অনত্থন্তৰতং হদযে কত্ৱা আহ ‘‘ৱসতী’’তি. ইদানি তেসং অত্থৱিসেসভাৱিতং দস্সেন্তো ‘‘অভিভৱিত্ৱা ৱা আৱসতী’’তিআদিমাহ. এত্থাতি ওপাসাদপদে. সত্তুস্সদন্তিআদীসু পন কথন্তি আহ – ‘‘তস্স অনুপ্পযোগত্তাৱ সেসপদেসূ’’তি. উপ-অনু-অধি-ইতি-এৱং-পুব্বকে ৱসনকিৰিযযাট্ঠানে উপযোগৱচনমেৱ পাপুণাতীতি সদ্দৱিদূ ইচ্ছন্তীতি আহ ‘‘লক্খণং সদ্দসত্থতো পৰিযেসিতব্ব’’ন্তি. তথা হি ৱুত্তং ‘‘উপসগ্গৱসেন পনেত্থ ভুম্মত্থে উপযোগৱচনং ৱেদিতব্ব’’ন্তি. উস্সদতা নামেত্থ বহুলতাতি তং বহুলতং দস্সেতুং ‘‘বহুজন’’ন্তিআদি ৱুত্তং. আৱজ্জিত্ৱাতি পৰিক্খিপিত্ৱা.

ৰঞ্ঞা ৱিয ভুঞ্জিতব্বন্তি ৱা ৰাজভোগ্গং. ৰঞ্ঞো দাযভূতন্তি কুলপৰম্পৰায ভোগ্গভাৱেন ৰঞ্ঞা লদ্ধদাযভূতং. তেনাহ ‘‘দাযজ্জন্তি অত্থো’’তি. ৰাজনীহাৰেন পৰিভুঞ্জিতব্বতো উদ্ধং পৰিভোগলাভস্স সেট্ঠদেয্যতা নাম নত্থীতি আহ – ‘‘ছত্তং উস্সাপেত্ৱা ৰাজসঙ্খেপেন পৰিভুঞ্জিতব্ব’’ন্তি. তিত্থপব্বতাদীসূতি নদীতিত্থপব্বতপাদগামদ্ৱাৰঅটৱীমুখাদীসু. নিস্সট্ঠপৰিচ্চত্তন্তি মুত্তচাগৱসেন পৰিচ্চত্তং কত্ৱা. এতেসং ব্ৰাহ্মণগহপতিকানং.

৪২৩. তি সন্নিপতিতা. যো কোচি ৱিঞ্ঞূনং ইচ্ছিতো পঞ্হো, তস্স পুচ্ছিতস্স যাথাৱতো কথনসমত্থো পুচ্ছিতপঞ্হব্যাকৰণসমত্থো.কুলাপদেসাদিনা মহতী মত্তা এতস্সাতি মহামত্তো.

৪২৪. তেতি ‘‘নানাৱেৰজ্জকা’’তি ৱুত্তব্ৰাহ্মণা. ‘‘উভতো সুজাতো’’তি (দী. নি. টী. ১.৩০৩; অ. নি. টী. ৩.৫.১৩৪) এত্তকে ৱুত্তে যেহি কেহিচি দ্ৱীহি ভাগেহি সুজাততা ৱিঞ্ঞাযেয্য, সুজাতসদ্দো চ ‘‘সুজাতো চাৰুদস্সনো’’তিআদীসু (ম. নি. ২.৩৯৯; সু. নি. ৫৫৩; থেৰগা. ৮১৮) আৰোহপৰিণাহসম্পত্তিপৰিযাযোতি জাতিৱসেনেৱ সুজাততং ৱিভাৱেতুং ‘‘মাতিতো চ পিতিতো চা’’তি ৱুত্তং. অনোৰসপুত্তৱসেনপি লোকে মাতুপিতুসমঞ্ঞা দিস্সতি, ইধ পনস্স ওৰসপুত্তৱসেনেৱ ইচ্ছীযতীতি দস্সেতুং ‘‘সংসুদ্ধগহণীকো’’তি ৱুত্তং. পিতা চ মাতা চ পিতৰো, পিতূনং পিতৰো পিতামহা, তেসং যুগো পিতামহযুগো, তস্মা যাৱ সত্তমা পিতামহযুগাতি এৱমেত্থ অত্থো দট্ঠব্বো. যুগসদ্দো চেত্থ একসেসনযেন দট্ঠব্বো ‘‘যুগো চ যুগো চ যুগা’’তি. এৱঞ্হি তত্থ তত্থ দ্ৱিন্নং গহিতমেৱ হোতি. তেনাহ – ‘‘ততো উদ্ধং সব্বেপি পুব্বপুৰিসা পিতামহগ্গহণেনেৱ গহিতা’’তি. পুৰিসগ্গহণঞ্চেত্থ উক্কট্ঠনিদ্দেসৱসেন কতন্তি দট্ঠব্বং. এৱঞ্হি ‘‘মাতিতো’’তি পাড়িৱচনং সমত্থিতং হোতি. অক্খিত্তোতি অপ্পত্তখেপো. অনৱক্খিত্তোতি সদ্ধথালিপাকাদীসু ন অৱক্খিত্তো. জাতিৱাদেনাতি হেতুম্হি কৰণৱচনন্তি দস্সেতুং ‘‘কেন কাৰণেনা’’তিআদি ৱুত্তং. এত্থ চ উভতো…পে… পিতামহযুগাতি এতেন ব্ৰাহ্মণস্স যোনিদোসাভাৱো দস্সিতো সংসুদ্ধগহণিকভাৱকিত্তনতো. অক্খিত্তোতি ইমিনা কিৰিযাপৰাধাভাৱো. কিৰিযাপৰাধেন হি সত্তা খেপং পাপুণন্তি. অনুপকুট্ঠোতি ইমিনা অযুত্তসংসগ্গাভাৱো. অযুত্তসংসগ্গম্পি হি পটিচ্চ সত্তা অক্কোসং লভন্তি.

ইস্সৰোতি অধিপতেয্যসংৱত্তনিযকম্মফলেন ঈসনসীলো. সা পনস্স ইস্সৰতা ৱিভৱসম্পত্তিপচ্চযা পাকটা জাতাতি অড্ঢতাপৰিযাযভাৱেন ৱদন্তো ‘‘অড্ঢোতি ইস্সৰো’’তি আহ. মহন্তং ধনমস্স ভূমিগতঞ্চেৱ ৱেহাসট্ঠঞ্চাতি মহদ্ধনো. তস্সাতি তস্স তস্স. ৱদন্তি ‘‘অন্ৱযতো ব্যতিৰেকতো চ অনুপসঙ্কমনকাৰণং কিত্তেমা’’তি.

অধিকৰূপোতি ৱিসিট্ঠৰূপো উত্তমসৰীৰো. দস্সনং অৰহতীতি দস্সনীযো. তেনাহ ‘‘দস্সনযোগ্গো’’তি. পসাদং আৱহতীতি পাসাদিকো. তেনাহ ‘‘চিত্তপসাদজননতো’’তি. ৱণ্ণস্সাতি ৱণ্ণধাতুযা. সৰীৰন্তি সন্নিৱেসৱিসিট্ঠো কৰচৰণগীৱাসীসাদি অৱযৱসমুদাযো, সো চ সণ্ঠানমুখেন গয্হতীতি ‘‘পৰমায ৱণ্ণপোক্খৰতাযাতি পৰমায…পে… সম্পত্তিযা চা’’তি ৱুত্তং. সব্বৱণ্ণেসু সুৱণ্ণৱণ্ণোৱ উত্তমোতি ৱুত্তং ‘‘সেট্ঠেন সুৱণ্ণৱণ্ণেন সমন্নাগতো’’তি. তথা হি বুদ্ধা চক্কৱত্তিনো চ সুৱণ্ণৱণ্ণাৱ হোন্তি. ব্ৰহ্মৱচ্ছসীতি উত্তমসৰীৰাভো সুৱণ্ণাভোতি অত্থো. ইমমেৱ হি অত্থং সন্ধাযাহ ‘‘মহাব্ৰহ্মুনো সৰীৰসদিসেন সৰীৰেন সমন্নাগতো’’তি. ন ব্ৰহ্মুজুগত্ততং. অখুদ্দাৱকাসো দস্সনাযাতি আৰোহপৰিণাহসম্পত্তিযা অৱযৱপাৰিপূৰিযা চ দস্সনায ওকাসো ন খুদ্দকো. তেনাহ ‘‘সব্বানেৱা’’তিআদি.

যমনিযমলক্খণং সীলমস্স অত্থীতি সীলৱা, তং পনস্স ৰত্তঞ্ঞুতায ৱুদ্ধং ৱড্ঢিতং সীলং অস্স অত্থীতি ৱুদ্ধসীলী, তেন চ সব্বদা সমাযোগতো ৱুড্ঢসীলেন সমন্নাগতো. পঞ্চসীলমত্তমেৱ সন্ধায ৱদন্তি ততো পৰং সীলস্স তত্থ অভাৱতো তেসঞ্চ অজাননতো.

ঠানকৰণসম্পত্তিযা সিক্খাসম্পত্তিযা চ কত্থচিপি অনূনতায পৰিমণ্ডলপদানি ব্যঞ্জনানি অক্খৰানি এতিস্সাতি পৰিমণ্ডলপদব্যঞ্জনা. অথ ৱা পজ্জতি অত্থো এতেনাতি পদং, নামাদি, যথাধিপ্পেতমত্থং ব্যঞ্জেতীতি ব্যঞ্জনং ৱাক্যং, তেসং পৰিপুণ্ণতায পৰিমণ্ডলপদব্যঞ্জনা. অত্থঞাপনসাধনতায ৱাচাৱ কৰণন্তি ৱাক্কৰণং, উদাহৰণঘোসো. গুণপৰিপুণ্ণভাৱেন তস্স ব্ৰাহ্মণস্স, তেন ৱা ভাসিতব্বঅত্থস্স. পূৰে পুণ্ণভাৱে. পূৰেতি চ পুৰিমস্মিং অত্থে আধাৰে ভুম্মং, দুতিযস্মিং ৱিসযে. সুখুমালত্তনেনাতি ইমিনা তস্সা ৱাচায মুদুসণ্হভাৱমাহ. অপলিবুদ্ধায পিত্তসেম্হাদীহি. সন্দিট্ঠং সব্বং দস্সেত্ৱা ৱিয একদেসকথনং. ৱিলম্বিতং সণিকং চিৰাযিত্ৱা কথনং. ‘‘সন্দিদ্ধৱিলম্বিতাদী’’তি ৱা পাঠো. তত্থ সন্দিদ্ধং সন্দেহজনকং. আদি-সদ্দেন খলিতানুকড্ঢিতাদিং সঙ্গণ্হাতি. আদিমজ্ঝপৰিযোসানং পাকটং কত্ৱাতি ইমিনা চস্স ৱাচায অত্থপাৰিপূৰিং ৱদন্তি.

৪২৫. সদিসাতি একদেসেন সদিসা. ন হি বুদ্ধানং গুণেহি সব্বথা সদিসা কেচিপি গুণা অঞ্ঞেসু লব্ভন্তি. ইতৰেতি অত্তনো গুণেহি অসদিসগুণে. ইদন্তি ইদং অত্থজাতং. গোপদকন্তি গাৱিযা পদে ঠিতউদকং. কুলপৰিযাযেনাতি কুলানুক্কমেন.

তত্থাতি মঞ্চকে. সীহসেয্যং কপ্পেসীতি যথা ৰাহু অসুৰিন্দো আযামতো ৱিত্থাৰতো উব্বেধতো চ ভগৱতো ৰূপকাযস্স পৰিচ্ছেদং গহেতুং ন সক্কোতি, তথাৰূপং ইদ্ধাভিসঙ্খাৰং অভিসঙ্খৰোন্তো সীহসেয্যং কপ্পেসি.

পৰিসুদ্ধট্ঠেন অৰিযন্তি আহ ‘‘অৰিযং উত্তমং পৰিসুদ্ধ’’ন্তি. অনৱজ্জট্ঠেন কুসলং, ন সুখৱিপাকট্ঠেন. কত্থচি চতুৰাসীতি পাণসহস্সানি কত্থচি অপৰিমাণাপি দেৱমনুস্সা যস্মা চতুৱীসতিযা ঠানেসু অসঙ্খ্যেয্যা অপৰিমেয্যা মগ্গফলামতং পিৱন্তি. কোটিসতসহস্সাদিপৰিমাণেনপি বহূ এৱ. তস্মা অনুত্তৰাচাৰসিক্খাপনৱসেনেৱ ভগৱা বহূনং আচৰিযো. তেতি কামৰাগতো অঞ্ঞে ভগৱতা পহীনকিলেসে.

অপাপপুৰেক্খাৰোতি অপাপেহি পুৰক্খৰীযতি, ন ৱা পাপং পুৰতো কৰোতীতিপি অপাপপুৰেক্খাৰোতি ইমমত্থং দস্সেতুং ‘‘অপাপে নৱ লোকুত্তৰধম্মে’’তিআদি ৱুত্তং. তত্থ অপাপেতি পাপপপটিপক্খে পাপৰহিতে চ. ব্ৰহ্মনি ভৱা, ব্ৰহ্মুনো ৱা হিতা গৰুকৰণাদিনা, ব্ৰহ্মানং ৱা মগ্গং জানাতীতি ব্ৰহ্মঞ্ঞা, তস্সা ব্ৰহ্মঞ্ঞায পজায.

তিৰোৰট্ঠা তিৰোজনপদাতি এত্থ ৰজ্জং ৰট্ঠং ৰাজন্তি ৰাজানো এতেনাতি কত্ৱা. তদেকদেসভূতা পদেসা পন জনপদো জনা পজ্জন্তি এত্থ সুখজীৱিকং পাপুণন্তীতি কত্ৱা. পুচ্ছায দোসং সল্লক্খেত্ৱাতি সম্বন্ধো. ভগৱা ৱিস্সজ্জেতি তেসং উপনিস্সযসম্পত্তিং চিন্তেত্ৱাতি অধিপ্পাযো. নৱকাতি আগন্তুকভাৱেন অম্হাকং অভিনৱা.

৪২৬. ওপাতেতি নিপ্পাতেতীতি অত্থো. তথাভূতো চ তত্থ পেসিতা হোতীতি ৱুত্তং ‘‘পৱেসেতী’’তি. সংপুৰক্খৰোন্তীতি সক্কচ্চং পুব্বঙ্গমং কৰোন্তি. তেনাহ ‘‘পুৰতো কত্ৱা ৱিচৰন্তী’’তি.

৪২৭. সুদ্দে বহি কত্ৱা ৰহো সাসিতব্বট্ঠেন মন্তা এৱ তংতংঅত্থপটিপত্তিহেতুতায পদন্তি মন্তপদং ৱেদং. তেনাহ ‘‘ৱেদো’’তি. এৱং কিৰাতি পৰম্পৰভাৱেন আভতন্তি আচৰিযপৰম্পৰায আভতং. পাৱচনসঙ্খাতসম্পত্তিযাতি পমুখৱচনম্হি উদত্তাদিসম্পত্তিযা. সাৱিত্তিআদীহি ছন্দবন্ধেহি ৱগ্গবন্ধেহি চাতি গাযত্তীআদীহি অজ্ঝাযানুৱাকাদীহি ছন্দবন্ধেহি চ ৱগ্গবন্ধেহি চ. সম্পাদেত্ৱাতি পদসম্পত্তিং অহাপেত্ৱা. পৱত্তাৰোতি ৱা পাৱচনৱসেন ৱত্তাৰো. সজ্ঝাযিতন্তি গাযনৱসেন সজ্ঝাযিতং, তং পন পদেনেৱ ইচ্ছিতন্তি আহ ‘‘পদসম্পত্তিৱসেনা’’তি. অঞ্ঞেসং ৱুত্তন্তি পাৱচনৱসেন অঞ্ঞেসং ৱুত্তং. ৰাসিকতন্তি ইৰুৱেদযজুৱেদসামৱেদাদিৱসেন, তত্থাপি পচ্চেকং মন্তব্ৰহ্মাদিৱসেন অজ্ঝাযানুৱাকাদিৱসেন ৰাসিকতং. দিব্বেন চক্খুনা ওলোকেত্ৱাতি দিব্বচক্খুপৰিভণ্ডেন যথাকম্মূপগঞাণেন সত্তানং কম্মস্সকতং, পচ্চক্খতো দস্সনট্ঠেন দিব্বচক্খুসদিসেন পুব্বেনিৱাসঞাণেন অতীতকপ্পে ব্ৰাহ্মণানং মন্তজ্ঝেনৱিধিঞ্চ ওলোকেত্ৱা. পাৱচনেন সহ সংসন্দেত্ৱাতি কস্সপসম্মাসম্বুদ্ধস্স যং ৱচনং ৱট্টসন্নিস্সিতং, তেন সহ অৱিৰুদ্ধং কত্ৱা. ন হি তেসং ৱিৱট্টসন্নিস্সিতো অত্থো পচ্চক্খো হোতি. অপৰাপৰেতি অট্ঠকাদীহি অপৰাপৰে, পচ্ছিমা ওক্কাকৰাজকালাদীসু উপ্পন্না. পক্খিপিত্ৱাতি অট্ঠকাদীহি গন্থিতমন্তপদেসু কিলেসসন্নিস্সিতপদানং তত্থ তত্থ পদে পক্খিপনং কত্ৱা. ৱিৰুদ্ধে অকংসূতি ব্ৰাহ্মণধম্মিকসুত্তাদীসু (খু. নি. ব্ৰাহ্মণধম্মিকসুত্তং) আগতনযেনেৱ সংকিলেসিকত্থদীপনতো পচ্চনীকভূতে অকংসু.

৪২৮. পটিপাটিযা ঘটিতাতি পটিপাটিযা সম্বদ্ধা. পৰম্পৰসংসত্তাতি আদানিযায যট্ঠিযা সংসত্তা. তেনাহ ‘‘যট্ঠিগ্গাহকেন চক্খুমতা’’তি. পুৰিমস্সাতি মণ্ডলাকাৰেন ঠিতায অন্ধৱেণিযা সব্বপুৰিমস্স হত্থেন সব্বপচ্ছিমস্স কচ্ছং গণ্হাপেত্ৱা. দিৱসম্পীতি অনেকদিৱসম্পি. চক্খুস্স অনাগতভৱং ঞত্ৱা যথাঅক্কন্তট্ঠানেযেৱ অনুপতিত্ৱা অক্কমনংৱ সল্লক্খেত্ৱা ‘‘কহং চক্খুমা কহং মগ্গো’’তি পৰিৱেদিত্ৱা.

পাড়িআগতেসু দ্ৱীসূতি সদ্ধা অনুস্সৱোতি ইমেসু দ্ৱীসু. এৱৰূপেতি যথা সদ্ধানুস্সৱা, এৱৰূপে এৱ পচ্চক্খগাহিনোতি অত্থো. তযোতি ৰুচিআকাৰপৰিৱিতক্কদিট্ঠিনিজ্ঝানক্খন্তিযো. ভূতৱিপাকাতি ভূতত্থনিট্ঠাযকা অধিপ্পেতত্থসাধকা, ৱুত্তৱিপৰিযাযেন অভূতত্থৱিপাকা ৱেদিতব্বা. এত্থাতি এতেসু সদ্ধাযিতাদিৱত্থূসু. একংসেনেৱ নিট্ঠং গন্তুং নালং অনেকন্তিকত্তা সদ্ধাদিগ্গাহস্স. উপৰি পুচ্ছায মগ্গং ৱিৱৰিত্ৱা ঠপেসি সচ্চানুৰক্খায ঞাতুকামতায উপ্পাদিতত্তা. পস্সতি হি ভগৱা – মযা ‘‘সচ্চমনুৰক্খতা…পে… নিট্ঠং গন্তু’’ন্তি ৱুত্তে সচ্চানুৰক্খণং ঞাতুকামো মাণৱো ‘‘কিত্তাৱতা’’তিআদিনা পুচ্ছিস্সতি, তস্স তং ৱিস্সজ্জেত্ৱা সচ্চানুবোধে পুচ্ছায অৱসৰং দত্ৱা তস্স উপনিস্সযে উপকাৰধম্মে কথেস্সামীতি. তেন ৱুত্তং – ‘‘উপৰি পুচ্ছায মগ্গং ৱিৱৰিত্ৱা ঠপেসী’’তি.

৪৩০. অত্তানঞ্ঞেৱ সন্ধায ৱদতি, যতো ৱুত্তং পাড়িযং – ‘‘যং খো পনাযমাযস্মা ধম্মং দেসেতি, গম্ভীৰো সো ধম্মো দুদ্দসো দুৰনুবোধো’’তিআদি. লুব্ভন্তীতি লোভনীযা যথা ‘‘অপাযগমনীযা’’তি আহ ‘‘লোভনীযেসু ধম্মেসূতি লোভধম্মেসূ’’তি. যথা ৱা ৰূপাদিধম্মা লোভনীযা, এৱং লোভোতি আহ ‘‘লোভনীযেসু ধম্মেসূতি লোভধম্মেসূ’’তি. তেনেৱাহ – ‘‘যং লোকে পিযৰূপং সাতৰূপং, এত্থেসা তণ্হা উপ্পজ্জমানা উপ্পজ্জতি, এত্থ নিৱিসমানা নিৱিসতী’’তি (দী. নি. ২.৪০০; ম. নি. ১.১৩৩; ৱিভ. ২০৩). এসে নযো সেসপদদ্ৱযেপি.

৪৩২. নিৱেসেতীতি ঠপেতি পট্ঠপেতি. পযিৰুপাসতীতি উপট্ঠানৱসেন উপগন্ত্ৱা নিসীদতি. সুয্যতি এতেনাতি সোতন্তি আহ ‘‘পসাদসোত’’ন্তি. তঞ্হি সৱনায ওদহিতব্বন্তি. ধাৰেতি সন্ধাৰেতি তত্থেৱ মনং ঠপেতি. অত্থতোতি যথাৱুত্তস্স ধম্মস্স অত্থতো. কাৰণতোতি যুত্তিতো হেতুদাহৰণেহি উপপত্তিতো. ওলোকনন্তি এৱমেতন্তি যথাসভাৱতো পঞ্ঞাচক্খুনা দট্ঠব্বতং খমন্তি, তঞ্চ মহন্তস্স মণিনো পজ্জলন্তস্স ৱিয আৱিকত্ৱা অত্থস্স চিত্তে উপট্ঠানন্তি আহ ‘‘ইধা’’তিআদি. কত্তুকম্যতাছন্দোতি কত্তুকামতাসঙ্খাতো কুসলচ্ছন্দো. ৱাযমতীতিআদিতো চতুন্নম্পি ৱীৰিযানং ৱসেন ৱাযামং পৰক্কমং কৰোতি. মগ্গপধানং পদহতীতি মগ্গাৱহং মগ্গপৰিযাপন্নঞ্চ সম্মপ্পধানং পদহতি, পদহনৱসেন তং পৰিপূৰেতি. পৰমসচ্চন্তি অমোঘধম্মত্তা পৰমত্থসচ্চং. সহজাতনামকাযেনাতি মগ্গপঞ্ঞাসহজাতনামকাযেন. তদেৱাতি তদেৱ পৰমসচ্চং নিব্বানং. তেনেৱাহ – ‘‘সচ্ছিকিৰিযাভিসমযেন ৱিভূতং পাকটং কৰোন্তো পস্সতী’’তি.

৪৩৩-৪. মগ্গানুবোধোতি মগ্গপটিপাটিযা বোধো বুজ্ঝনং, যেসং কিলেসানং সমুচ্ছিন্দনৱসেন মগ্গপ্পটিৱেধো, তেসং পটিপস্সম্ভনৱসেন পৱত্তমানং সামঞ্ঞফলং, মগ্গেন পটিৱিদ্ধানি সচ্চানি, পৰমত্থসচ্চমেৱ ৱা অনুৰূপবুজ্ঝনন্তি অধিপ্পাযো. ‘‘সচ্চানুপ্পত্তীতি ফলসচ্ছিকিৰিযা’’তি ৱুত্তং. এৱঞ্হি সতি হেট্ঠা ৱুত্তা সদ্ধাপটিলাভাদযো দ্ৱাদস ধম্মা সচ্চানুপ্পত্তিযা উপকাৰা হোন্তি, তস্মা ৱুত্তং ‘‘তেসংযেৱাতি হেট্ঠা ৱুত্তানং দ্ৱাদসন্ন’’ন্তি. নাযং ‘‘তেসংযেৱা’’তি পদস্স অত্থো. সতিপি কুসলৱিপাকাদিভাৱেন নানত্তে ৱত্থাৰম্মণভূমিকিচ্চাদিৱসেন পন সদিসাতি উপাযতোৱ মগ্গধম্মা আসেৱিতা বহুলীকতা ফলভূতাতি ৱত্তব্বতং অৰহতীতি তংসদিসে তব্বোহাৰং কত্ৱা ‘‘তেসং মগ্গসম্পযুত্তধম্মান’’ন্তি ৱুত্তং. এৱঞ্হি আসেৱনাগহণং সমত্থিতং, ন অঞ্ঞথা. ন হি একচিত্তক্খণিকানং মগ্গধম্মানং আসেৱনা, বহুলীকম্মং ৱা অত্থীতি. তুলনাতি ৱিপস্সনা. সা হি ৱুট্ঠানগামিনিভূতা মগ্গপ্পধানস্স বহুকাৰা তস্স অভাৱে মগ্গপ্পধানস্সেৱ অভাৱতো, এৱং উস্সাহো তুলনায ছন্দো উস্সাহস্স বহুকাৰোতিআদিনা হেট্ঠিমস্স উপৰিমূপকাৰতং সুৱিঞ্ঞেয্যমেৱাতি আহ – ‘‘ইমিনা নযেন সব্বপদেসু অত্থো ৱেদিতব্বো’’তি. সেসং সুৱিঞ্ঞেয্যমেৱ.

চঙ্কীসুত্তৱণ্ণনায লীনত্থপ্পকাসনা সমত্তা.