৯. চূড়সকুলুদাযিসুত্তৱণ্ণনা

২৭১. পঞ্হোতি ঞাতুং ইচ্ছিতো অত্থো, তদেৱ ধম্মদেসনায নিমিত্তভাৱতো কাৰণং. উপট্ঠাতূতি ঞাণস্স গোচৰভাৱং উপগচ্ছতু. যেন কাৰণেনাতি যেন তুয্হং উপট্ঠিতেন কাৰণেন ধম্মদেসনা উপট্ঠহেয্য, তং পন পৰিব্বাজকস্স অজ্ঝাসযৱসেন তথা ৱুত্তং. তেনাহ ‘‘এতেন হি…পে… দীপেতী’’তি. একঙ্গণানীতি পিধানাভাৱেন একঙ্গণসদিসানি. তেনাহ ‘‘পাকটানী’’তি.

জানন্তোতি অত্তনো তথাভাৱং সযং জানন্তো. সক্কচ্চং সুস্সূসতীতি ‘‘তথাভূতংযেৱ মং তথা অৱোচা’’তি সাদৰং সুস্সূসতি. তস্মাতি দিব্বচক্খুলাভিনো অনাগতংসঞাণলাভতো. এৱমাহাতি ‘‘যো খো, উদাযি, দিব্বেন চক্খুনা’’তি আৰভিত্ৱা ‘‘সো ৱা মং অপৰন্তং আৰব্ভ পঞ্হং পুচ্ছেয্যা’’তি এৱং অৱোচ.

ইতৰন্তি অৱসিট্ঠং ইমস্মিং ঠানে ৱত্তব্বং. ৱুত্তনযমেৱাতি ‘‘যো হি লাভী’’তিআদিনা ৱুত্তনযমেৱ. অতীতেতি পুব্বেনিৱাসানুস্সতিঞাণস্স ৱিসযভূতে অত্থে. অনাগতেতি অনাগতংসঞাণস্স ৱিসযভূতে অনাগতে অত্থে.

পংসুপদেসে নিব্বত্তনতো পংসুসমোকিণ্ণসৰীৰতায পংসুপিসাচকং. একং মূলং গহেত্ৱাতি দীঘসো হেট্ঠিমন্তেন চতুৰঙ্গুলং, উপৰিমন্তেন ৱিদত্থিকং ৰুক্খগচ্ছলতাদীসু যস্স কস্সচি একং মূলং গহেত্ৱা অঞ্ঞজাতিকানং অদিস্সমানকাযো হোতি. অযং কিৰ নেসং জাতিসিদ্ধা ধম্মতা. তত্ৰাতি তস্স মূলৱসেন অদিস্সমানকতায. ন দিস্সতি ঞাণেন ন পস্সতি.

২৭২. ন চ অত্থং দীপেয্যাতি অধিপ্পেতমত্থং সা ৱাচা সৰূপতো ন চ দীপেয্য, কেৱলং ৱাচামত্তমেৱাতি অধিপ্পাযো. পটিহৰিতব্বট্ঠেন পৰসন্তানে নেতব্বট্ঠেন পটিহাৰিয-সদ্দদ্ৱাৰেন ৱিঞ্ঞাতব্বো ভাৱত্থো, সোৱ পাটিহীৰকো নিৰুত্তিনযেন, নত্থি এতস্স পাটিহীৰকন্তি অপ্পাটিহীৰকতং, ত-সদ্দেন পদং ৱড্ঢেত্ৱা তথা ৱুত্তং, অনিয্যানং. তেনাহ ‘‘নিৰত্থকং সম্পজ্জতী’’তি. সুভকিণ্হদেৱলোকে খন্ধা ৱিয জোতেতীতি ইমিনা – ‘‘দিব্বো ৰূপী মনোমযো সব্বঙ্গপচ্চঙ্গী অহীনিন্দ্ৰিযো অত্তা’’তি ইমমত্থং দস্সেতি.

২৭৩. সউপসগ্গপদস্স অত্থো উপসগ্গেন ৱিনাপি ৱিঞ্ঞাযতীতি আহ ‘‘ৱিদ্ধেতি উব্বিদ্ধে’’তি. সা চস্স উব্বিদ্ধতা উপক্কিলেসৱিগমেন সুচিভাৱেন উপট্ঠানন্তি আহ ‘‘মেঘৱিগমেন দূৰীভূতে’’তি. ইন্দনীলমণি ৱিয দিব্বতি জোতেতীতি দেৱো, আকাসো. ‘‘অড্ঢৰত্তসমযে’’তি ৱত্তব্বে ভুম্মত্থে ৱিহিতৱচনানং অচ্চন্তসংযোগাভাৱা উপযোগৱচনং ৱেদিতব্বং. পুণ্ণমাসিযঞ্হি গগনমজ্ঝস্স পুৰতো ৱা পচ্ছতো ৱা অন্তে ঠিতে অড্ঢৰত্তে সমযো ভিন্নো নাম হোতি, মজ্ঝে এৱ পন ঠিতো অভিন্নো নাম. তেনাহ ‘‘অভিন্নে অড্ঢৰত্তসমযে’’তি.

যে অনুভোন্তীতি যে দেৱা চন্দিমসূৰিযানং আভা অনুভোন্তি ৱিনিভুঞ্জন্তি ৱড়ঞ্জন্তি চ তেহি দেৱেহি বহূ চেৱ বহুতৰা চ চন্দিমসূৰিযানং আভা অননুভোন্তো. তেনাহ – ‘‘অত্তনো সৰীৰোভাসেনেৱ আলোকং ফৰিত্ৱা ৱিহৰন্তী’’তি.

২৭৪. পুচ্ছামূড়্হো পন জাতো ‘‘অযং পৰমো ৱণ্ণো’’তি গহিতপদস্স ৱিধমনেন. অচেলকপাড়িন্তি ‘‘অচেলকো হোতি মুত্তাচাৰো’’তিআদিনযপ্পৱত্তং (দী. নি. ১.৩৯৪) অচেলকপটিপত্তিদীপকগন্থং, গন্থসীসেনেৱ তেন পকাসিতৱাদানি ৱদতি. সুৰামেৰযপানমনুযুত্তপুগ্গলস্স সুৰাপানতো ৱিৰতি তস্স কাযং চিত্তঞ্চ তাপেন্তী সংৱত্ততীতি সুৰাপানৱিৰতি (তপো, সোযেৱ গুণো. তেনাহ ‘‘সুৰাপানৱিৰতীতি অত্থো’’তি).

২৭৫. একন্তং অচ্চন্তমেৱ সুখং অস্সাতি একন্তসুখং. পঞ্চসু ধম্মেসূতি ‘‘পাণাতিপাতা পটিৱিৰতী’’তিআদীসু পঞ্চসু সীলাচাৰধম্মেসু. ন জানিংসূতি সম্মোসেন অনুপট্ঠহন্তি তদত্থং ন বুজ্ঝন্তি. বুদ্ধুপ্পাদেন কিৰ ৱিহততেজানি মহানুভাৱানি মন্তপদানি ৱিয বাহিৰকানং যোগাৱচৰগন্থেন সদ্ধিং যোগাৱচৰপটিপদা নস্সতি. উগ্গণ্হিংসূতি ‘‘পঞ্চ পুব্বভাগধম্মে’’তিআদিৱচনমত্তং উগ্গণ্হিংসু. ততিযজ্ঝানতোতি কাৰণোপচাৰেন ফলং ৱদতি, ফলভূততো ততিযজ্ঝানতো.

২৭৬. একন্তসুখস্স লোকস্স পটিলাভেন পত্তিযা তত্থ নিব্বত্তি পটিলাভসচ্ছিকিৰিযা. একন্তসুখে লোকে অনভিনিব্বত্তিত্ৱা এৱ ইদ্ধিযা তত্থ গন্ত্ৱা তস্স সত্তলোকস্স ভাজনলোকস্স চ পচ্চক্খতো দস্সনং পচ্চক্খসচ্ছিকিৰিযা. তেনাহ ‘‘তত্থা’’তিআদি.

২৭৭. উদঞ্চনিকোতি উদঞ্চনো. ৱিঞ্ঝুপব্বতপস্সে গামানং অনিৱিট্ঠত্তা তিংসযোজনমত্তং ঠানং অটৱী নাম, তত্থ সেনাসনং, তস্মিং অটৱিসেনাসনে পধানকম্মিকানং ভিক্খূনং বহূনং তত্থ নিৱাসেন একং পধানঘৰং অহোসি.

চূড়সকুলুদাযিসুত্তৱণ্ণনায লীনত্থপ্পকাসনা সমত্তা.